Premyer Liqada yeni mövsüm başlayıb

Futbol üzrə Azərbaycan Premyer Liqasında 2024-2025-ci illər mövsümünə start verilib. Birinci turun ilk qarşılaşması "Araz-Naxçıvan" və "Qarabağ" komandaları arasında olub. "Liv Bona Dea Arena"da baş tutan görüş "Qarabağ"ın 4:1 hesablı qələbəsi ilə yekunlaşıb. Turun digər oyunları avqustun 3-4-də keçiriləcək.

Boksçularımız Avropa birinciliyində

Bosniya və Herseqovinanın Banya Luka şəhərində məktəbli qız və oğlan boksçular arasında Avropa birinciliyi start götürüb. 8 gün davam edəcək yarışda Azərbaycan milli komandaları da mübarizə aparır. Yığmamız oğlanların yarışında Sahib Baxışlı (40 kiloqram), Əli Abaslı (42 kiloqram), Ramiz Ağadadaşov (44 kiloqram), Oğuz İbrahimli (46 kiloqram), Tunar Mehtiyev (48 kiloqram), Yusif Həsənli (50 kiloqram), İbrahim Bədəlli (52 kiloqram), Adəm Aslanov (54 kiloqram), Anzor İsrafilov (57 kiloqram), Nurlan Müseyibli (60 kiloqram), Şükar Əliyev (63 kiloqram), Şahin Layıcov (66 kiloqram), İsmayıl Məmmədov (70 kiloqram), Mehran Rəsulov (75 kiloqram), Yusif Ağakişiyev (80 kiloqram) və Uğur Həsənovla (90 kiloqram) təmsil olunacaq. Qızların mübarizəsində Aysel Fərəcova (40 kiloqram), Ayşən Miriyeva (42 kiloqram), Saraxanım Səmədova (44 kiloqram), Sima İsmayılova (46 kiloqram), Cəmilə Muradlı (48 kiloqram), Kəmalə Həsənova (51 kiloqram), Səma Abbasova (60 kiloqram) və Fidan Bəkərovanın (64 kiloqram) iştirakı gözlənilir.

"Zirə" klubu növbəti mərhələyə yüksəlib

"Zirə" klubu UEFA Konfrans Liqasının III təsnifat mərhələsinə vəsiqə qazanıb. İlk görüşdə Slovakiyanın "Dunayska Ştreda" komandasına 4:0 hesabı ilə qalib gələn təmsilçimiz səfərdə də rəqibini məğlub edərək növbəti mərhələdə iştirakını təmin edib. Görüş 2:1 hesabı ilə başa çatıb. Komandanın növbəti raunddakı rəqibi Xorvatiyanın "Osiyek" komandası olacaq. Konfrans Liqasının III təsnifat mərhələsinin ilk oyunları avqustun 8-də, cavab qarşılaşmaları isə 15-də keçiriləcək.

"Sabah" "Makkabi"ni məğlub edib

UEFA Konfrans Liqasının II təsnifat mərhələsinin cavab oyunu çərçivəsində üz-üzə gələn "Sabah" və "Makkabi" (Hayfa, İsrail) komandaları qarşılaşıb. "Bank Respublika Arena"da keçirilən görüşün əsas və əlavə vaxtı rəqibin 6:3 hesablı qələbəsi ilə yekunlaşdığı üçün penaltilər seriyası oynanılıb. Burada daha dəqiq oynayan "Sabah" (3:2) adını növbəti raunda yazdırıb. "Sabah"ın III mərhələdəki rəqibi "Sent Patriks Atletik" (İrlandiya)-"Vaduts" (Lixtenşteyn) qarşılaşmasının qalibi olacaq. İlk görüşdə İrlandiya təmsilçisi 3:1 hesabı ilə qalib gəlib.

Nərgiz İSMAYILOVA,

"Respublika".