Müzəffər Ali Baş Komandan Azərbaycan Respublikası Prezidenti cənab İlham Əliyevin rəhbərliyi altında Azərbaycan torpaqlarının Ermənistan silahlı qüvvələri tərəfindən 30 illik işğalına son qoyuldu. Müqəddəs torpaqlarımız mənfur düşməndən təmizləndi. Hərbçilərimiz Vətən qarşısında borcunu şərəflə yerinə yetirdilər. Minlərlə hərbçimiz yüksək orden və medallarla təltif edilibdir. Onların qəhrəmanlığı, şücaəti, fədakarlığı hər bir azərbaycanlı üçün örnəkdir.
Vətən müharibəsində şəhid olmuş qəhrəmanlarımızın ailə üzvlərinə və müharibə iştirakçılarına ölkə Prezidenti cənab İlham Əliyevin tapşırığına əsasən qayğı və diqqət nəinki dövlət qurumlarının, həm də cəmiyyətin mühüm vətəndaşlıq borcuna və vəzifəsinə çevrilib. Bu isə cəmiyyətdə birliyin və qarşılıqlı etimadın yeni təzahür forması kimi bütün təbəqələrdən olan insanlar tərəfindən xoş ovqatla qarşılanır, onların dövlətimizə və qalib Prezidentimizə inam hisslərini, məhəbbətini gündən-günə artırır.
Naftalanda da şəhid ailələrinin, müharibə əlillərinin sosial rifahının daha da yaxşılaşdırılması, qayğının daha da gücləndirilməsi piroritet məsələlərdəndir. Naftalan Şəhər İcra Hakimiyyətinin başçısı Vüqar Novruzov və millət vəkili Anar Məmmədov mütəmadi olaraq şəhid ailələri və qazilərlə görüşür. Bu günlərdə növbəti dəfə Vətən müharibəsində yaralanmış və müxtəlif xəsarətlər almış qazilərin, çernobıl əlillərinin müalicə aldığı mərkəzdə onların sağlıqlarına qovuşması üçün aparılan müalicələrlə tanış olublar. Müasir, dünya standartlarına cavab verən “Möcüzəli Naftalan” sanatoriyasında müharibə iştirakçılarına və qazilərə diqqət və qayğı təqdirəlayiqdir. Sanatoriya rəhbərliyi şəhər rəhbərinə məlumat verərək bildirdi ki, mərkəzə göndəriş alan və yaxud müraciət edən əlillərə əsasən müalicə, reabilitasiya, yəni funksiyanın bərpa edilməsi xidmətləri göstərilir.Vətəndaşlarımıza, qazilərimizə xidmət göstərmək bizim üçün şərəfdir. Kimi isə ayağa qaldırmaqda köməyimiz olursa, o rahat, ağrısız gəzəndə, üzləri güləndə biz həkimlər də özümüzü xoşbəxt hiss edirik. Görüş zamanı qazilər müasir tələblər səviyyəsində qurulmuş müalicə mərkəzində səhhətlərində müsbət nəticə qeydə alındığını və onlara göstərilən diqqət və qayğıya görə ölkə başçısı cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını bildirmiş, vurğulamışlar ki, “İlham Əliyev bizə əvvəl Qarabağı, indi isə həyatı qaytardı. Biz qazilər üçün maksimum şərait yaradılıb, həkimlərin diqqətinin və qayğılarının əhatəsindəyik. Bəli, həkimlərimiz də bizim kimi Vətən müharibəsinin qəhrəmanlarıdır, onların misilsiz köməyi göz qabağındadır.”
Naftalan Şəhər İcra Hakimiyyətinin başçısı Vüqar Novruzov bildirdi ki, Azərbaycan Respublikasının Prezidenti cənab İlham Əliyevin qarşıya qoyduğu əsas vəzifələrdən biri də şəhid ailələrinə və qazilərə dövlət qayğısının göstərilməsidir. Məhz bunun bariz nümunəsi kimi biz bu gün şəhid ailələrinə və qazilərə göstərilən qayğı və ehtiramın dövlətin prioritet vəzifəsi olduğunun şahidi oluruq.
Sonra Naftalan Şəhər İcra Hakimiyyətinin başçısı Vüqar Novruzov Vətən müharibəsində Talış, Suqovuşan istiqamətində minaya düşərək sağ ayağını itirmiş Naftalan şəhər sakini-qazi Tağıyev Qiyas Fariz oğlunu ziyarət etmişdir. Şəhər rəhbəri, Naftalan Şəhər İcra Hakimiyyətinin müraciəti ilə Əmək və Əhalinin Sosial Müdafiəsi Nazirliyi tərəfindən son nəsil elektron, Avropa istehsalı olan əlil arabasını ona təqdim etmişdir.
Zabit XƏLİLOV,
“Respublika”.
