NASA rəhbərindən qəribə iddia: kainatdakı “yadplanetli”lər bir gün bizimlə təmasa girəcək

Uşaq vaxtlarından hamımızı belə bir sual maraqlandırır. Görəsən, başqa planet və orada yaşayan insanlar, yaxud məxluqlar varmı? Bu barədə o qədər xəbər və məlumat var ki, insan bilmir hansına inansın. Belə bir sual ortaya çıxır: Əgər yadplanetlilər varsa, niyə indiyə qədər bizimlə əlaqə qurmayıblar? Amma NASA rəhbərliyindən verilən məlumatda deyilir ki, yadplanetlilər bizimlə təmasa girə bilər.

NASA-nın rəhbəri Bill Nelson müsahibəsində kainatdakı mədəni canlıların yalnız insanlardan ibarət olmadığını, daha ağıllı məxluqların var olma ehtimalının yüksək olduğunu söyləyib.

ABŞ Müdafiə Nazirliyi Pentaqonun 2004-2021-ci illər arası hesabatına görə, yadplanetlilərin nəqliyyat vasitəsi UFO ilə bağlı qeydə alınan 144 hadisədən yalnız biri təsdiqlənib.

“Başqa bir planetdəki ağıllı məxluqlardan hər hansı bir mesaj və siqnallar alırıq. Bir gün onların bizimlə əlaqə quracağı zamanın gələcəyi şübhəsizdir”-deyə Nelson bildirib.

Yadplanetlilər yer üzündə mövcud olan 1715 ulduzun ətrafında fırlanırlar. Bu ulduzlar Yerdən 325 işıq ili məsafəsində mövcuddur. Elm adamları yadplanetlilərin hər tərəfdən dünyaya göz dikdiklərini təxmin edirlər. Mütəxəssislər bu məlumatları əldə etmək üçün ulduzlarla Yer arasında mübadilə olunan radio və digər dalğaların növlərini təhlil ediblər. Onlar Lisa, Jackie, Gaia Kosmik Teleskopundan alınan məlumatla ulduzların 10.000 illik hərəkət simulyasiyasını hazırlayıblar. Bu simulyasiya ilə ulduzların ətrafında dövrə vuran yadplanetlilərin yer üzünə baxdıqları aşkar edilib. Alimlərin fərziyyələrinə görə, yadplanetlilərin bizdən daha güclü teleskoplarının olması və radio dalğalarımızı tutma ehtimalı da yüksəkdir.

Məqalə “Futurism” veb saytında yayımlanıb.

Tezliklə insanları “super qəhrəman” edəcək gücə sahib peyvənd

Hər bir kəs həyatda inanılmaz bir fantastik gücə, yaxud müdrikliyə sahib olmaq arzusundadır. Ancaq bilirik ki, bu yalnız nağıllarda, cizgi filmlərində, ya da fantastik kinolarda gerçək ola bilər. Lakin bir genetika professoru bu yaxınlarda bizi “super qəhrəman” edə biləcək peyvəndin gələcəyini iddia edir. Bu o demək deyil ki, Şaktimaan kimi şeytanlarla mübarizə aparacağıq və ya Supermen olub uça biləcəyik. Əslində, peyvəndin üstünlüyü bizi bir sıra xəstəliklərə tutulmamaq üçün qorumaqdan ibarət olacaq.

Stanford Universitetinin genetika professoru Euan Ashley yaxın gələcəkdə insanları Alzheimer və ürək xəstəlikləri kimi problemlərdən qurtaran “super qəhrəman” peyvəndinin hazırlanacağını söyləyib. Onun sözlərinə görə bu peyvənd sayəsində insanlar bir sıra ölümcül xəstəliklərdən qurtularaq uzun ömür sürə biləcəklər.

Tibb dünyasında möcüzəvi inqilab yarada biləcək “Superhero” adlı peyvənd, olimpiya idmançılarının bədənindəki ideal hüceyrələrdən hazırlanacaq. Bir sözlə, gen mühəndisliyi sayəsində insanların DNT-ləri dəyişdirilərək ömür boyu təhlükəli xəstəliklərə qarşı immunitet qazanması təmin ediləcək. Ancaq bu toxunulmazlıq hər bir insanın orqanizminə görə dəyişəcək və bədəndə virus, yaxud bakteriya mutasiyasını belə təsirsiz hala gətirəcəkdir.

Professor peyvəndin təxminən 10-15 ilə hazırlanacağını söyləyib. Çünki mövcud “CRİSPER” genetik redaktə texnologiyası ilə bağlı bir sıra yeni dəyişikliklər olacaq. Elm adamları insan genomunun mürəkkəbliyi, xəstəliklərin genetik cəhətdən qarışıqlığı baxımından daha geniş və səviyyəli araşdırmalara ehtiyac olduğunu söyləyiblər.

Məlumat “Study finds” veb saytında işıq üzü görüb.

Niyə kişilər qadınlardan çox riskə meyillidirlər?

Çoxlarımız həyatda hər hansı bir məqsədə çatmaq üçün müəyyən risklər edirik. Uduzmaq ehtimalı olması səbəbindən insanların çoxu riski sevmir. İlk əvvəl bəlkə də əyləncəli, ya da rahat görünən risk, bəzən bizi uçuruma da sürükləyə bilər. Lakin risk, həmçinin udmaq şansıdır. Kişilər qadınlara nisbətən daha çox riskə meyilli olurlar. Bəs, bu, nə ilə bağlıdır?

SATƏM Universitetinin tədqiqatçıları kişilərin və qadınların riskə münasibətini beyin tellərinin ritmləri ilə əlaqəli olduğunu söyləyirlər. Komanda beyindəki teta ritminin riskdə, şans qazanmaqda böyük rol oynadığını aşkar edib. Alimlər, beynin siqnalları ötürdükcə neyronların elektromaqnit sahəsi yaratdığını izah edirlər. Mütəxəssislər bu qənaətə elektroensefaloqrafiya metodu vasitəsilə gəliblər.

Elm adamları kişi və qadınlarda beynin sağ, sol alın payında teta ritmlərinin gücünü risk almaq istəyi ilə əlaqələndiriblər. Sınaqlara cəlb edilmiş iştirakçıların beyinləri maqnitoensefaloqrafiya skanından istifadə edilərək analiz edilib və kişilərin qadınlardan daha çox teta ritmlərinə sahib olduğu ortaya çıxıb. Teta ritmləri ilə yanaşı, tədqiqatçılar testosteron kimi hormonların da riskdə böyük rol oynadığını bildiriblər.

“Qərarların potensial ölçülməsində yalnız gender fərqləri deyil, ətraf mühitin stimullarına qarşı duyğusal cavab vermə də öz təsirini göstərir”-deyə aparıcı müəllif Maria Azanova qeyd edib.

Məqalə “Frontiers in Neuroscience” jurnalında dərc edilib.

Hörümçəklər özlərindən 30 dəfə böyük ilanı yeyə bilirlərmiş

Hörümçək qorxunuz varmı? Əgər varsa, yeni araşdırma səkkizayaqlı arxnidlərə qarşı qorxunuzu bir az da artıracaq. Amerika Birləşmiş Ştatları və İsveçrədən olan tədqiqatçılar bu kiçik yırtıcı heyvanların əsir götürdükləri yüzlərlə ilanı yediklərini aşkar ediblər.

Planetimizdə çox sayda olan arxnid növlərinin içərisində ən təhlükəlisi “qara dul” adı ilə tanınan hörümçəkdir. Hörümçək qeyri-adi görünüşü ilə məşhurdur. Bu növə ən çox Amerikada rast gəlinir. Bu qorxunc adı daşıma səbəbi isə öz partnyorunu öldürməsidir. Məşhur arxnidlər heyvanların sinir sistemini hədəfə alan, son dərəcə güclü, zəhərə sahibdirlər. Bu toksin ilanlarla yanaşı, insanlar üçün də çox təhlükəlidir. Son dərəcə sərt və davamlı iplikdən qurulan torları qurbağa, siçan, quş, ilan kimi böyük heyvanları tutacaq qədər böyükdür.

Tədqiqatın maraqlı məqamı isə 11 fərqli hörümçək növünün özündən 30 dəfə böyük ilanı yeməsidir.

“Bu qədər fərqli hörümçək qrupunun böyük ilanları yeməsi yeni bir tapıntıdır. “Qara dul”un xüsusi olaraq onurğalıların sinir sistemini hədəfə alması və zəhərinin hansı komponentlərdən ibarət olmasını öyrənmək üçün daha çox araşdırmaya ehtiyac var. Tədqiqatımızın ən heyrətləndirici məqamlarından biri də bu hörümçəklərin dünyanın ən zəhərli ilanlarından olan kobraları məğlub etməsidir” — deyə Basel Universitetinin professor Martin Nyffeler izah edib.

Hazırladı:

Elenora HƏSƏNOVA,

“Respublika”.