“Ermənistan başa düşməlidir ki, o, artıq yolun kənarındadır. Artıq ondan ötrü heç kim vuruşmayacaq... Lakin biz qarşıdurma istəmirik, biz sülh istəyirik, onların bizə və xalqımıza gətirdiyi bütün ağrı-acılara və faciələrə baxmayaraq”. Bu da növbəti xəbərdarlıq!.. Bəli, ölkə başçısının dediyi kimi, biz heç zaman qarşıdurma istəməmişik, sülh istəmişik. Biz müharibə istəməmişik, lakin torpaqlarımızı düşməndən geri almaq üçün başqa bir seçim də buraxmadı ermənilər. Azərbaycan ordusu müharibənin elə ilk günündən, ilk saatlarından “düşmənin gözünün odunu alıb”, onun dərsini verirdi. Hər gün qələbə xəbəri gəlirdi. 23 oktyabr!.. Bu günün də müjdəsi var.
Azərbaycan Respublikasının Müdafiə Nazirliyinin verdiyi məlumata görə oktyabrın 23-nə keçən gecə cəbhənin Ağdərə, Füzuli-Hadrut-Cəbrayıl və Qubadlı istiqamətlərində döyüş əməliyyatları müxtəlif intensivliklə davam edib. Prezident İlham Əliyev özünün “Twitter” səhifəsində Xocavənd rayonunun Dolanlar, Bünyadlı, Cəbrayıl rayonunun Dağ Tumas, Nüsüs, Xələfli, Minbaşılı, Veysəlli, Zəngilan rayonunun Vənədli və Mirzəhəsənli, Qubadlı rayonunun Zilanlı, Kürd Mahrızlı, Muğanlı, Alaqurşaq kəndlərinin işğaldan tam azad edildiyini açıqlayıb.
Bununla da, Ordumuz müharibənin ilk günündən Xocavənd rayonunun 21, Cəbrayıl rayonunun 59, Zəngilan rayonunun 38 və Qubadlı rayonunun 4 kəndini düşməndən geri almışdır.
ABŞ-a işgüzar səfəri çərçivəsində Azərbaycan Respublikasının Xarici İşlər naziri Ceyhun Bayramov ABŞ Dövlət katibi Mayk Pompeo ilə görüşüb. Nazir Ermənistan-Azərbaycan Dağlıq Qarabağ münaqişəsində son vəziyyətlə bağlı müzakirə aparıb, Ermənistan tərəfinin destruktiv siyasəti, azərbaycanlı dinc əhalinin məqsədyönlü şəkildə atəşə tutulması, xaricdən muzdluların və terrorçuların kütləvi cəlb olunması və sair məsələlər barədə ətraflı məlumat verib. Ceyhun Bayramov onu da vurğulayıb ki, Azərbaycanın haqlı mövqeyi BMT Təhlükəsizlik Şurasının dörd məlum qətnaməsinə və digər beynəlxalq təşkilatların sənədlərinə əsaslanır.
Kimin-kim olduğu yavaş-yavaş dünyaya bəlli olur. Dünyanın ən nüfuzlu media qrupları haqq səsimizi eşitməyə başlayırlar, deyəsən. Bu mənada Fransanın TF1 televiziya kanalının cəbhə xəttindən hazırladığı reportaj da marağa səbəb olmuşdu. Azərbaycandakı vəziyyət, ordumuzun şücaəti, Ermənistan silahlı qüvvələrinin mülki insanları və infrastrukturu hədəfə alması, Gəncənin yaşayış massivini bombardman etməsindən bəhs edən reportajda cəbhə xəttinə yaxın yerlərdə insanların gündəlik həyatının çətin olduğu, onların erməni silahlı qüvvələri tərəfindən atəşə tutulduğu göstərilib. Mülki əhalinin evlərinin, mal-qarasının məhv edilməsindən, ölən və yaralananlardan danışılıb.
Azərbaycan Respublikasının Baş Prokurorluğu Ermənistanın təxribatları nəticəsində sentyabrın 27-dən oktyabrın 23-ü saat 17:00-dək dinc əhaliyə qarşı törədilmiş cinayətlərin statistikasını təqdim edib. Məlumatda bildirilib ki, ümumilikdə bu müddət ərzində Ermənistan silahlı qüvvələrinin yaşayış məntəqələrimizi ağır artilleriya qurğularından və raket sistemlərindən atəşə tutması nəticəsində mülki şəxslərdən 63 nəfər həlak olub, 298 nəfər isə xəsarət alıb.
Torpaqlarımız qarış-qarış azad edilirdi. Təəssüf ki, itkilərimiz də vardı. Azərbaycan oğulları canından keçirdi bu yolda. Üzülürdük... Təbii ki, dövlət başçısı da şərik olurdu acımıza, hər çıxışında şəhidlərimizi ehtiramla yad edir, Azərbaycan Ordusunun ünvanına alqışlar deyirdi. Ümidimiz artırdı, belə qəhrəman oğulları olan xalq heç vaxt məğlub olmaz. Günlərimizi sayırdıq, qulaqlarımız səsdə idi. Sabah bizi nə gözləyirdi, görəsən? Sevimli Prezidentimizin daha bir xoş müjdəsi...
“Respublika”.
