Bu xarakter yaşla düz mütənasib imiş
Yeni bir araşdırmada insanların yaşlandıqca, daha səxavətli və mərhəmətli olması ortaya çıxıb. Belə ki, Kaliforniya ştatındakı Claremont Graduate Universitetinin tədqiqatçıları yaşlı insanların gənclərdən daha səxavətli olduğunu iddia edirlər.
"Daily Mail" qəzetində yayımlanan xəbərdə alimlər bunu yaşlandıqca "sevgi hormonu" olaraq da bilinən oksitosinin ifrazının artması ilə əlaqələndirirlər. Tədqiqatçılar məhz bu səbəblə təqaüdçülərin daha səxavətli olduğunu söyləyirlər.
Tədqiqat zamanı 18-99 yaş arası 103 nəfər sınaq iştirakçısına beyin xərçəngindən ölmək üzrə olan bir atanın iki yaşlı oğlu ilə bağlı duyğularını izah edən tükürpədici videosu nümayiş etdirilib. Videoda körpənin xəstəxanada atasının yanında oynaması da əks olunub. Daha sonra isə iştirakçılardan bu xəstəyə anonim olaraq ianə etmələri istənilib. Yaşı 65-dən yuxarı olanlar 18-35 yaş arası cavanlarla müqayisədə təxminən üç dəfə çox ianə veriblər.
Həmçinin videodan əvvəl və sonra aparılan qan analizləri yaşlıların videoya baxarkən daha çox oksitosin ifraz etdiyini göstərib.
"Təcrübə zamanı oksitosin ifrazı daha çox olan insanlar səxavətli olmaqla yanaşı, eyni zamanda xeyriyyəçilik davranışları da nümayiş etdirdilər. Biz gördük ki, başqalarına kömək edən insanların məmnunluq hissi artdığı üçün bu, onların xoşbəxtliyinə səbəb olur", - deyə tədqiqat rəhbəri dr. Paul Zak qeyd edib.
Araşdırma "Frontiers in Behavioral Neuroscience" jurnalında dərc olunub.
Orta hesabla niyə 80 il yaşayırıq?
Deyirlər sağlam olmaq və uzun ömür sürmək insanın özündən asılıdır. İnsanlıq yaranandan hər kəs uzun ömür sürmək arzusu ilə yaşayır, amma təəssüf ki, bu, hamıya nəsib olmur. Sağlamlıq qaydalarına nə qədər riayət etməyə çalışsaq da, ən yaxşı halda 70-80-i haqlaya bilmirik. Elə bu məqsədlə də, ingiltərəli alimlər bu sirri çözməyə çalışıblar. Onlar insanların ortalama ömür uzunluğunun digər məməlilərlə müqayisədə nə üçün az olduğunu öyrənməyə müvəffəq olublar.
Cambridge Wellcome Sanger İnstitutunun alimləri tərəfindən edilən araşdırmada canlıların ömür uzunluğunun uğradıqları mutasiyalarla tərs mütənasib olduğu ortaya çıxıb. Bundan əlavə, bir insanın DNT-sinin isə ildə orta hesabla 47 mutasiyaya məruz qaldığı məlum olub.
Alimlər genetik zərər sürətinin sağlamlığın "açarı" ola biləcəyini söyləyirlər. "Nature" jurnalında dərc olunan araşdırmada hər hansı bir canlının ömür müddətinin müəyyən edilməsində DNT-də baş verən xətaların sürətinin vacib olduğu irəli sürülüb.
Tədqiqatçılar məməlilər qrupuna aid, cəmi altı ay yaşayan Cənubi Asiya siçanlarından tutmuş 200 il yaşayan balinalaradək bütün heyvanları araşdırıblar. Canlılarda baş verən hər bir genetik dəyişkənliklərə diqqət yetirən tədqiqatçılar heyvanların DNT-dəki mutasiya sürətinin uğurlu bir şəkildə ləngiməsi üçün ölçünün böyük rol oynadığını müəyyənləşdiriblər.
Mütəxəssislər daha kiçikölçülü heyvanların enerjini daha sürətlə yandırdığı və daha çox hüceyrə dövrü tələb etdiyi üçün az yaşadığını söyləyirlər. Bu səbəblə də elm adamları ölçünün uzunömürlülüyün "açarı" olduğunu deyirlər.
Araşdırma zamanı insanlarda ortalama ömür uzunluğunun 83,6 il olduğu bildirilib.
Yağ yandıran meyvələr
Meyvələr sağlam və balanslı pəhrizin ayrılmaz bir hissəsidir. Gözəl rəngi və özünəməxsus dadı ilə yanaşı, orqanizmimiz üçün gərəkli olan bəzi meyvələr tərkibindəki əhəmiyyətli miqdarda həll olunan və olunmayan liflərlə seçilir. Lif bağırsaqların daha yaxşı çalışmasına kömək etməklə yanaşı, həmçinin toxluq hissinə sahib olmaq və qida qəbulunu tənzimləmək üçün arıqlamağımıza da kömək edir. Həmçinin qan şəkəri və xolesterolun səviyyəsini tənzimləməsi səbəbindən bəzi meyvələr arıqlamaq üçün olan xüsusi pəhrizlərə əlavə edilir.
Meyvələr içərisində ən faydalı hesab edilən alma bu məqamda da ön plana çıxır. Kalori və şəkər miqdarı baxımından az olan bu meyvə tərkibindəki flavonoidlər və liflərin köməyi ilə qarın yağlarının yandırılmasına kömək edir. Bilavasitə almanın tərkibindəki pektin adlı maddə yavaş-yavaş parçalanaraq toxluq hissini də artırır.
Hər bir arıqlama pəhrizinin vazgeçilməzi olan çiyələk süfrələrimizə ayrıca bir rəng qatmaqla bərabər, həm də kalori baxımdan əlverişlidir. 100 qramında cəmi 33 kalori olan bu giləmeyvə yağların yandırılması üçün əla seçimdir.
Təbii olaraq həzmi yaxşılaşdıran kivi də arıqlamağa kömək edən meyvələr sırasındadır. Tərkibindəki aktinidain adlı ferment sayəsində bədəndəki zülalları parçalamağa kömək etməklə yanaşı, qıcıqlanmış bağırsaq sindromu olan insanlara da müsbət təsir edir.
Antiinflamatuar xüsusiyyətləri ilə zülalları metabolizə edərək qarın yağını azaltmağa kömək edən ananasın bu işdə əsas köməkçisi tərkibindəki lif və bromelain fermentidir.
Bəziləri qarpızın insanı kökəltdiyinə inansa da, amma bu, belə deyil. 94 faiz sudan və demək olar ki, sıfır kaloridən ibarət olan qarpız kalori yandırmaqda "mahirdir". Odur ki, qarın piyləri ilə vidalaşmaq istəyirsinizsə, onu pəhrizinizə əlavə edə bilərsiniz.
Araşdırmalar göstərir ki, gündəlik avokado istehlakı obez (piylənmə xəstəliyi) və kilolu qadınlarda qarın yağlarını azaldır. Maraqlıdır ki, bu meyvə həm tərkibindəki yağın miqdarına görə, həm də yağ yandıran meyvələr cərgəsində birinci yerdədir. Yüksək miqdarda sağlam mono doymamış yağlar ehtiva edən avokado maddələr mübadiləsini sürətləndirərək yağın enerjiyə çevrilməsinə kömək edir. Avokado həm də toxluğu artıraraq lazımsız qəlyanaltıların qarşısını alır.
Qreyfrutun orqanizmimizə faydalı olan ən sağlam sitrus meyvələrindən biri olduğunu bilirdinizmi? Bəzi mütəxəssislərin fikrincə, bu meyvə pəhrizdə ciddi dəyişikliklərə ehtiyac olmadan arıqlamağı sürətləndirə bilər. Tərkibindəki yüksək su və yağ yandıran fermentlərin sayəsində qreyfrut orqanizmi təmizləyir, toxluq hissini artıraraq, arıqlamağa kömək edir.
Araşdırmalara görə, narın tərkibindəki güclü antioksidantlar, polifenollar maddələr mübadiləsini sürətləndirir və orqanizmi toksinlərdən azad edir. Üstəlik, qarın yağını yandıran bu meyvə şirni istəklərini də azaldır.
Sağlamlığın "düsturu" açıqlandı...
Sağlamlıq həyatın ən böyük sərvətlərindən biri hesab olunur. Sağlam yaşamın "açarı" isə ilk növbədə düzgün qidalanmaqla bədən çəkisini nəzarətdə saxlamaqdadır. Məlumdur ki, bədən çəkisinin artıq olması təhlükəli xəstəliklərə düçar olma riskini artırır. Çəkini nəzarətdə saxlamağın ən vacib amillərdən biri olduğunu vurğulayan mütəxəssislər bununla bağlı bir formula irəli sürüblər. Alimlər boyumuzu bel ətrafının ölçüsünə bölərək alınan nisbətlə sağlam olub-olmadığımızı müəyyən etməyin mümkün olduğunu söyləyirlər.
İngiltərənin National İnstitute for Health and Care Excellence (NİCE) İnstitunun alimləri insanların bel-boy nisbətlərini ölçməyə təşviq edilməsinin vacib olduğunu deyirlər. Bu üsulun sağlam olmaq üçün ideal bir metod olduğu bildirilir.
Mütəxəssislər bel nahiyəsində olan artıq piyləri yüksək qan təzyiqi, Tip 2 diabet və ürək xəstəliyi riskinin artması ilə əlaqələndirirlər. Elm adamları bütün dünyada insanlar arasında günü-gündən artan piylənmə nisbətləri ilə mübarizə aparmaq üçün tövsiyələr veriblər.
NİCE-nin pofessoru Paul Chrisp təklif etdikləri metodun insanların sağlamlıqlarına nəzarət etmələri üçün sadə və təsirli bir yol olduğunu deyir.
"Sağlam bir bel-boy nisbəti 0,4 ilə 0,49 arasında təsnif edilir. 0,5 ilə 0,59 arasında olan nisbət sağlamlığın risk altında olduğunu göstərir. Bu göstəricilərin daha da artıq olması isə ən yüksək risk qrupuna aiddir və ya hər hansı bir təhlükəli xəstəliklə qarşı-qarşıya olduğunuzun əlamətidir", - deyə professor bildirib.
İnformasiya "Apetite" jurnalında dərc edilib.
Hazırladı:
Elenora HƏSƏNOVA,
"Respublika".