Kosmosda kommersiya məqsədli ilk istixana
Son zamanlar Beynəlxalq Kosmik Stansiya (BKS) bir-birindən maraqlı layihələrin həyata keçirilməsinə evsahibliyi etməkdə davam edir. Bu dəfə də özəl kosmik şirkətlərdən biri "Redwire Corporation" orada kommersiya məqsədilə xüsusi istixana qurmağı hədəfləyir. Üstəlik şirkət layihəsini çox yaxın zamanda - yəni gələn ilin yazına qədər həyata keçirməyi planlaşdırır.
Qeyd edək ki, hazırda Beynəlxalq Kosmik Stansiyada kiçik bir istixana mövcuddur və orada mikroqravitasiya mühitində bitkilərin yetişdirilməsi üçün sınaqlar aparılır. Bununla belə, Redwire Korporasiyasının layihəsində ilk olaraq daha böyük istixananın quraşdırılması nəzərdə tutulur. Cazibə qüvvəsi olmayan bir mühitdə müxtəlif bitkilərin yetişdirilməsi insanların kosmosda uzunmüddətli qalmasına şərait yaradacaq. Həmçinin, şirkətin bu təşəbbüsü gələcək kosmik missiyalar üçün də faydalı məlumatlar verə bilər.
Layihənin meneceri Dave Reed NASA-nın digər missiyalarına, xüsusilə Artemis missiyasına da böyük töhfə verəcəklərini bildirib. Şirkətdən verilən məlumata görə, ABŞ-ın BKS-da laboratoriya işlərinə nəzarət edən Kosmosda Elmin İnkişafı Mərkəzi ilə müqavilə imzalanıb.
Şirkət yaxın günlərdə verdiyi açıqlama ilə diqqətləri üzərinə çəksə də, hələ kosmik istixana üçün heç bir konsepsiya hazırlamayıb. Bu isə onu göstərir ki, layihə tam olaraq formalaşmayıb. Bununla belə, şirkətin 2023-cü ilin yazını hədəfləməsi layihənin tezliklə reallaşacağı anlamına gəlir.
İnformasiya "Forschung und Wissen" jurnalında dərc edilib.
Bədənimiz batareya rolunu oynayacaq?
Gündəlik həyatımızın ayrılmaz hissəsinə çevrilən rəqəmsal və ya geyilə bilən cihazlar dedikdə ağla ilk olaraq onların şarj edilməsi problemi gəlir. Ancaq yaxın gələcəkdə bu problem də aradan qaldırıla bilər. Problemin aradan qaldırılması üçün alternativ enerji mənbələri axtaran elm adamları bədənimizi geyimlər vasitəsilə batareyaya çevirməyin yolunu tapıblar.
Sinqapurun Nanyang Texnologiya Universitetinin alimlərinin əsas məqsədi insanların təbii olaraq istehsal etdikləri enerjidən yararlanmaqdır.
Alimlər polimerdən istifadə edərək sıxıldıqda, sürtündükdə və ya dartıldıqda mexaniki gərginliyi elektrikə çevirə bilən 3x4 santimetr ölçüsündə parça hazırlayıblar. Hazırlanan xüsusi material 100 ədəd LED lampasını işlətmək üçün kifayət qədər enerji istehsal edib. Bu isə o deməkdir ki, evdə, yolda və ya işdə olarkən bədən hərəkətləri və dərinin geyimə sürtünməsilə əmələ gələn enerji cihazlarınızı şarj edə bilər. Elastik və suyadavamlı parçanın yuyulduqdan və ya qatlandıqdan sonra belə beş aya qədər eyni səviyyədə işləməyə davam edəcəyi bildirilib.
İşin texniki hissəsinə gəlincə isə yəni batareyanın yaradılması üçün ilkin olaraq gümüşdən və köpüyə bənzər kauçukdan elektrod nümunəsi hazırlanıb. Daha sonra elektrod güclü piezoelektrik material PVDF-HPF və kalsium titan oksid mineralları olan perovskitlərdən ibarət nanolif parçaya bərkidilib. PVDF-HPF gərildikdə və ya sıxıldıqda elektrik yükünü əmələ gətirir. Perovskit isə elm adamlarının demək olar ki, iki əsrdir tanıdığı günəş batareyası və LED-lərdə istifadə edilən kristal quruluşdur.
Qeyd edək ki, hazırlanan prototip hər kvadratmetri üçün 2,34 vatt elektrik enerjisi istehsal edərək rəqəmsal cihazları gün ərzində şarj edə biləcək.
İnformasiya "TechXplore" veb saytında yayımlanıb.
"Google"un yeni robotu mətbəxdə
ABŞ-ın nəhəng axtarış sistemi "Google" gündəlik həyatımızı daha da asanlaşdıracaq süni intellekt dəstəkli robotunu təqdim edib. PaLM-SayCan adlı robot hazırda evlərimizdə yalnız bir məqsəd üçün istifadə etdiyimiz kiçik robotlardan fərqli olaraq daha çox əməliyyatları yerinə yetirəcək.
Robot “Google” tərəfindən hazırlanmış süni zəka PaLM sayəsində 540 milyarda yaxın dil parametrlərini öyrənib. Hələ də öyrənmə prosesində olan robotun verilən əmrləri başa düşməsi, təhlil edərək ən doğru həll yolunu tapa və hətta ən mürəkkəb riyazi hesablamaların belə öhdəsindən gələ bilməsi gözlənilir.
Sınaq zamanı şirkətin tədqiqatçı alimi Fei Xia mətbəxdə oturaraq böyük stolüstü lampanı xatırladan təkqollu, təkərli robota qoşulmuş noutbuka "Mən acam" əmrini yazıb. Robot dərhal stola yaxınlaşıb və böyük bir plastik qaba taxıl tökərək tədqiqatçıya təqdim edib.
Şirkət analitiklərinin verdiyi məlumata görə, qabaqcıl süni intellektə və sensorlara malik olan robotun ənənəvi mühitlərdən kənarda sınaqdan keçirilməsinin səbəbi onun insanların davranışı və dilinə uyğunlaşa bilməsini təmin etməkdir.
"Dilin bütün incəliklərini başa düşmək robotdan asılıdır. Ona verilən tapşırıqların öhdəsindən gələ bilməsi və buna uyğunlaşması üçün robotun daha çox təlimə və təcrübəyə ehtiyacı var", - deyə şirkətin baş tədqiqatçısı Karol Hausman qeyd edib.
Qeyd edək ki, "Google"un əsas şirkətləri "Alphabet" və "Everyday Robots" tərəfindən hazırlanan robot "Tesla"nın yaxın günlərdə təqdim etdiyi "Tesla Bot" və "Xiaomi"nin "CyberOne" robotunun ən güclü rəqibidir.
İnformasiyanı "Phys.org" veb saytı yayıb.
6G texnologiyasının daha bir təhlükəsi
Qərbdə 5G texnologiyasının istifadəsi ilə bağlı müzakirələr davam edərkən çinli elm adamları 6G-nin yaratdığı terahers submillimetr radiasiya ölçüsü radiasiya dalğalarının beyin hüceyrələrinin artmasına səbəb ola biləcəyini aşkar ediblər.
"Science News" jurnalında dərc edilən araşdırmaya görə, siçanlar üzərində aparılan təcrübələr zamanı terahers radiasiyasının kiçik dozasının beyində neyronların böyüməsini stimullaşdıran bəzi zülalların istehsalına təsir göstərdiyi məlum olub. Neyronların radiasiyadan heç bir zərər görməsinə baxmayaraq, 6G dalğalarının beyinə təsiri narahatlığa səbəb olduğu üçün araşdırmalar davam etməkdədir. Qeyd edək ki, terahers dalğalarının 5G-də istifadə olunan millimetr dalğalarından (MMW) əhəmiyyətli dərəcədə yüksək tezliyə sahib olduğu məlumdur.
Alimlər narahatlığa başqa bir səbəb kimi Rusiya Elmlər Akademiyasının 2009-cu ildə apardığı araşdırmanı da əsas göstərirlər. Həmin araşdırmalara görə, beynin bir neçə saat ərzində terahers radiasiyasına məruz qalması hüceyrələrin temperaturunun artmasına səbəb ola bilər.
Pekinli tədqiqatçılar kəşfin yeni kommunikasiya texnologiyalarının qiymətləndirilməsinə və beyin xəstəliklərinin müalicəsi üçün yeni üsulların inkişaf etdirilməsinə kömək edə biləcəyini söyləyirlər.
Hazırladı:
Elenora HƏSƏNOVA,
"Respublika".