BU ÖLKƏ TÜRKİYƏ ÜÇÜN BÜTÜN RESURSLARINI SƏFƏRBƏR EDƏCƏK
Cənubi Koreya prezidenti Yun Sok Yol hökumətə şiddətli zəlzələdən zərər çəkən Türkiyəyə mümkün qədər çox dəstək vermək üçün bütün mövcud resursları səfərbər etmək təlimatı verib. “Teleqraf.com”un verdiyi xəbərə görə, prezidentin sözçüsü Li Do Vun dövlət başçısının qardaş xalq Türkiyəyə maksimum dəstək əmri verdiyini bildirib.
“Türkiyə hazırda çadır, dərman, tibbi ləvazimatlar və elektrik avadanlıqlarına daha çox ehtiyac duyur. Hər bir nazirliyə, o cümlədən xarici işlər, müdafiə və sənaye nazirliklərinə bütün mövcud resursları səfərbər və mümkün qədər çox yardım təchiz etmək təlimatı verilib”, - deyə mətbuat katibi vurğulayıb.
Eyni zamanda, təkcə təcili yardım deyil, həm də yenidənqurma dəstəyi üçün hərəkətə keçməyə çağırış edən Yun Sok Yol Cənubi Koreya baş naziri Xan Dok Su ilə keçirdiyi görüşdə qardaş xalq olaraq xarakterizə etdiyi Türkiyəyə mümkün olan ən yüksək dəstəyin verilməsinin vacibliyini bəyan edib.
PENTAQONDAN VURULAN UNO-LARLA BAĞLI AÇIQLAMA
Bazar günü ABŞ hərbçiləri tərəfindən ölkənin şimalındakı Huron gölü üzərində vurulan uçan naməlum obyekt “potensial kəşfiyyat imkanlarına görə” təhlükə yaradırdı, çünki o, mühüm milli təhlükəsizlik əhəmiyyəti olan hərbi obyektlərin yaxınlığından hərəkət edirdi. “Trend” xəbər verir ki, bu barədə Pentaqonun açıqlamasında qeyd olunur.
“Uçuş yolunu və mövcud məlumatları nəzərə alaraq, bu obyekti Montana üzərindəki hava məkanında qəbul edilən radar siqnalı ilə əsaslı şəkildə əlaqələndirə bilərik: həmin obyekt Müdafiə Nazirliyinin milli təhlükəsizlik baxımından həssas obyektlərinin yaxınlığından uçub”, - deyə açıqlamada bildirilir.
Eyni zamanda, açıqlamaya əsasən, sözügedən naməlum obyekt heç bir yerüstü hədəf üçün birbaşa hərbi təhdid yaratmayıb, lakin onun uçuşların təhlükəsizliyi baxımından, həmçinin potensial kəşfiyyat imkanlarına görə təhlükə yaratdığı düşünülür.
Xatırladaq ki, naməlum obyekt fevralın 11-də Montana ştatı üzərində görünüb. Fevralın 12-si sözügedən obyekt ABŞ hərbçiləri tərəfindən vurulub.
Məlumat üçün qeyd edək ki, son bir neçə gün ərzində uçan naməlum obyektlər Kanada, Çin və Uruqvayda da müşahidə edilib.
UKRAYNANIN XİN BAŞÇISI: YAXIN GÜNLƏRDƏ BÖYÜK HADİSƏLƏR BAŞ VERƏCƏK
Ukrayna xarici işlər naziri Dmitri Kuleba Rusiya ilə müharibənin başlamasının birinci ildönümündə - fevralın 24-də böyük hadisələrin gözlənildiyini açıqlayıb. “Teleqraf.com”un xəbərinə görə, nazir yaxın günlərdə ciddi qərarların veriləcəyini bəyan edib.
“Çox vacib siyasi siqnallar, sanksiyalar, silahlarla bağlı qərarlar, birlik mesajları olacaq və bu, bütün səviyyələrdə baş verəcək. Yəni Rusiya Ukraynaya qarşı genişmiqyaslı hücumunun bir illiyini dünyanın necə qeyd edəcəyini xatırlayacaq”, - deyə Dmitri Kuleba vurğulayıb.
Eyni zamanda, verilən xəbərə görə, Ukrayna prezidenti Volodimir Zelenski BMT Baş Assambleyasının sessiyasında çıxış etmək üçün fevralın 24-də Nyu-Yorka getməyi planlaşdırır.
“Bloomberg" agentliyinin məlumatına əsasən, “G7” ölkələri fevralın 24-də sanksiyalardan yayınaraq Rusiyaya kömək etdiklərinə görə Çin, İran və Şimali Koreyaya sanksiyalar tətbiq edə bilər.
NATO-nun İNTERNET RESURSLARI HAKER HÜCUMUNA MƏRUZ QALIB
NATO-nun internet saytları, o cümlədən alyansın Xüsusi Əməliyyatlar Qərargahı haker hücumuna məruz qalıb. “Report” xəbər verir ki, bu barədə “DPA” agentliyi təşkilatın nümayəndəsinə istinadən məlumat yayıb.
Bununla yanaşı, qeyd olunub ki, kibertəhlükəsizlik üzrə ekspertlər NATO-nun bir neçə internet saytına təsir edən insidenti fəal şəkildə araşdırırlar.
Agentlik bildirir ki, alyans heç bir açıqlama verməyib, yalnız qeyd edib ki, qurum daim haker təhdidləri ilə üzləşir və kiberməkanda təhlükəsizliyin təmin edilməsi məsələsinə çox ciddi yanaşır.
Eyni zamanda, “DPA” agentliyinin xəbərinə görə, sosial şəbəkələrdə, xüsusən də “Twitter”də hücumun arxasında rusiyayönümlü “Killnet” qrupunun fəalları dayanır.
RİŞİ SUNAKIN AVROPA İTTİFAQI İLƏ ƏLAQƏDAR PLANI
Böyük Britaniyanın baş naziri Rişi Sunak nazirlərdən və rəsmilərdən ölkənin Avropa İttifaqı ilə əlaqələrini bərpa etmək üçün plan hazırlamağı xahiş edib. “Teleqraf.com”un xəbərinə əsasən, bu barədə “Bloomberg” agentliyi mənbələrinə istinadən məlumat yayıb.
Bildirilir ki, söhbət müdafiə, miqrasiya, ticarət, enerji və beynəlxalq standartlar kimi sferalarda daha sıx əməkdaşlıqdan gedir.
Eyni zamanda, verilən xəbərə görə, Böyük Britaniya tezliklə Avropa İttifaqı ilə Şimali İrlandiya üçün ticarət sazişləri ilə bağlı uzun müddətdir davam edən mübahisə ilə bağlı qərarını açıqlaya bilər.
Agentlik qeyd edir ki, Rişi Sunakın komandasının qənaətinə görə, bu, Brüssel və London arasında münasibətlərin yaxşılaşdırılması üçün əsasdır.
TÜRKİYƏDƏ 131 TİKİNTİ ŞİRKƏTİNİN NÜMAYƏNDƏSİ SAXLANILIB
Türkiyədə baş verən güclü zəlzələ zamanı dağılan evlərin tikinti ilə məşğul olan 131 şirkətin işçisi saxlanılıb. “Trend”in məlumatına görə, bu barədə “Assoşieyted Press” agentliyi Türkiyənin Ədliyyə Nazirliyinə istinadən xəbər verib.
Nazirliyin açıqlamasına əsasən, binaların uçmasına görə bütün məsuliyyət daşıyan şəxslər cavab verəcəklər. Həmçinin qeyd olunur ki, artıq prokurorlar bəzi dağılmış binaların tikildiyi materialların nümunələrini toplamağa başlayıblar.
Eyni zamanda, verilən xəbərə görə, Türkiyənin Ədliyyə Nazirliyi bəzi məsuliyyətsiz podratçıları, həmçinin memarları, geoloqları və mühəndisləri müəyyən edəcək xüsusi qrup yaratmaq planlarını açıqlayıb.
Bununla yanaşı, Türkiyənin ədliyyə naziri Bəkir Bozdağ qeyd edib ki, zəlzələ bölgəsində baş verən soyğunçuluq və oğurluqla bağlı 75 hadisədə 64 şübhəli barəsində cinayət işi açılıb, onlardan 57-si həbs edilib, 7 şübhəli barəsində məhkəmə nəzarəti həyata keçirilib.
ABŞ SƏFİRLİYİ RUSİYADAKI VƏTƏNDAŞLARINI BU ÖLKƏNİ TƏRK ETMƏYƏ ÇAĞIRIB
ABŞ-ın Moskvadakı səfirliyi öz ölkəsinin vətəndaşlarına Rusiyada terror təhlükəsi barədə xəbərdarlıq edib. “Report” xəbər verir ki, bu barədə diplomatik nümayəndəliyin saytında dərc olunmuş məlumatda qeyd edilir.
Bildirilir ki, ABŞ-ın Moskvadakı səfirliyi Amerika vətəndaşlarına Ukraynada keçirilən hərbi əməliyyatla əlaqədar Rusiyaya getməməyi tövsiyə edib və bu ölkədə yaşayan, eləcə də səyahət edənləri dərhal oranı tərk etməyə çağırıb.
Sənəddə qeyd olunur ki, səfirlik amerikalıların sonrakı həbsi üçün mümkün təqiblərə məruz qalması səbəbindən, qanunun özbaşına icrası, eləcə də səfirliyin Rusiyada ABŞ vətəndaşlarına yardım göstərmək imkanlarının məhdudluğu və terror ehtimalına görə ölkə vətəndaşlarına Rusiyaya səyahətdən çəkinməyə çağırıb.
Eyni zamanda, ABŞ diplomatik missiyası bildirib ki, Rusiya hakimiyyəti ikili vətəndaşlığı olan şəxslərin ABŞ vətəndaşlığını tanımaqdan imtina edə, onlara ABŞ konsulluq yardımı almaqda maneçilik törədə, Rusiyanı tərk etmələrinin qarşısını ala və ya hərbi xidmətə çağıra bilər.
Hazırladı:
Vamiq ABBASOV,
“Respublika”.