Avropa İttifaqının (Aİ) və Ümumdünya Səhiyyə Təşkilatının (ÜST) birgə icra etdikləri "Sağlamlıq üçün həmrəylik təşəbbüsü" layihəsi və Aİ-ÜST COVID-19 peyvəndlərinin və peyvəndlənmənin tətbiqinə dəstək aksiyası çərçivəsində keçirilmiş təlim proqramlarının aralıq nəticələrinin təqdim olunması məqsədilə ÜST-nin ölkə ofisi tərəfindən Gəncə Tibb Kollecində konfrans təşkil edilib.

Tədbirdə Gəncə Şəhər İcra Hakimiyyətinin başçısı Niyazi Bayramov, ÜST-nin Azərbaycandakı nümayəndəsi və ölkə ofisinin rəhbəri Hande Harmancı, Azərbaycan Respublikasının Səhiyyə Nazirliyinin, İcbari Tibbi Sığorta üzrə Dövlət Agentliyinin, Tibbi Ərazi Bölmələrini İdarəetmə Birliyinin (TƏBİB) və "Regional İnkişaf" ictimai birliyinin (RİİB) nümayəndələri, habelə Türkiyənin Ondokuz Mayıs, Hacettepe, Ege və Dokuz Eylül universitetlərinin ekspertləri və yerli tibb məktəblərinin, Gəncə şəhər tibb müəssisələrinin və milli təlim mərkəzlərinin mütəxəssisləri iştirak ediblər.

AZƏRTAC-ın bölgə müxbiri xəbər verir ki, tədbir zamanı ÜST-nin ölkə ofisinin layihə rəhbərləri Azərbaycanda tibb işçiləri üçün COVID-19 ilə bağlı Davamlı Peşəkar İnkişafa dəstək çərçivəsində həyata keçirilmiş tədbirlərin aralıq qiymətləndirilməsini təqdim ediblər. Səhiyyə işçilərinin Davamlı Peşəkar İnkişafına həsr olunmuş minisimpoziumda çıxış edən türkiyəli mütəxəssislər tibb bacısı ixtisası və onun vəzifə və öhdəlikləri, səhiyyə işçilərinin təhsilindəki təməl müddəalar, tibb personalı üçün keçirilən təlim proqramlarının səmərəsi, həmçinin səhiyyə işçilərinin bacarıqlarının təkmilləşdirilməsi kimi mövzulara toxunublar. Nande Harmancının moderatorluğu ilə keçirilən dəyirmi masada isə Azərbaycanda tibb bacısı ixtisası üzrə təhsil, onun hazırkı vəziyyəti və gələcək istiqamətləri kimi məsələlər müzakirə edilib.

Aİ və ÜST tərəfindən təşkil edilən COVID-19 vaksinasiyası, təməl və təkmil həyat dəstəyi və COVID-19 xəstələrinin stasionarda idarəedilməsi mövzusundakı təlim kursları 2021-ci il iyulun 1-dən etibarən Gəncə Tibb Kolleci də daxil olmaqla Azərbaycanın müxtəlif bölgələrində yerləşən 15 təlim mərkəzində həyata keçirilir. Dekabr ayının sonunadək davam edəcək təlimlər Aİ tərəfindən maliyyələşdirilən və ÜST-nin icra etdiyi iki layihə - "COVID-19 əleyhinə vaksinasiyaya dəstək" və "Sağlamlıq üçün həmrəylik təşəbbüsü" çərçivəsində "Regional İnkişaf" ictimai birliyi ilə birgə həyata keçirilir. Bu günədək təlim kursları çərçivəsində ümumilikdə 5240, COVID-19 vaksinasiyası üzrə 1850, təməl həyat dəstəyi üzrə 3000, təkmil həyat dəstəyi üzrə 190, COVID-19 xəstələrinin stasionarda idarəedilməsi üzrə isə 200 tibb işçisi təlim keçib.

Qeyd edək ki, Azərbaycan da daxil olmaqla, 6 Şərq Tərəfdaşlığı ölkəsində COVID-19 pandemiyası ilə mübarizəni dəstəkləmək və gündəlik immunizasiya proqramlarını gücləndirmək məqsədilə 2021-ci ilin iyun ayından etibarən Avropa İttifaqının maliyyə dəstəyi ilə Ümumdünya Səhiyyə Təşkilatı üçillik "COVID-19 əleyhinə vaksinasiyaya dəstək" layihəsini həyata keçirməyə başlayıb.

"Sağlamlıq üçün Həmrəylik Təşəbbüsü" layihəsi isə Avropa İttifaqı tərəfindən maliyyələşdirilən və ÜST-nin Azərbaycandakı nümayəndəliyi tərəfindən həyata keçirilən COVID-19 pandemiyasına qarşı mübarizəyə dəstək layihəsidir. Layihə gələcəkdə baş verə biləcək pandemiyalara qarşı dayanıqlı cavab potensialının formalaşdırılmasına yardım göstərilməsini hədəfləyir.

Bu layihələr Avropa İttifaqı və ÜST-nin Azərbaycana davamlı dəstəyinin tərkib hissəsidir.

AZƏRTAC