Ölkəmizin ərazi bütövlüyünün bərpasının, əzəli və əbədi torpaqlarımızın azadlığının təcəssümü olan milli bayram - Zəfər Günü münasibətilə noyabrın 5-də Baş Prokurorluqda tədbir keçirilib.
Baş Prokurorluğun mətbuat xidmətindən AZƏRTAC-a bildiriblər ki, əvvəlcə Baş Prokurorluğun rəhbər heyəti xalqımızın ümummilli lideri Heydər Əliyevin büstü önünə gül dəstələri qoyaraq dahi şəxsiyyətin unudulmaz xatirəsini ehtiramla yad edib.
Tədbirdə vətən torpaqlarının azadlığı uğrunda şəhid olmuş hərbçilərin və mülki vətəndaşların əziz xatirəsi bir dəqiqəlik sükutla anıldıqdan sonra Baş prokuror Kamran Əliyev prokurorluq orqanları əməkdaşlarını və xalqımızı bayram münasibətilə təbrik edib.
Zəfər Gününün ikinci ildönümünün Ali Baş Komandan İlham Əliyevin rəhbərliyi ilə müzəffər Ordumuzun qəhrəmanlığı sayəsində Qarabağımıza qovuşmağımızın və uzun illər davam edən münaqişəyə ölkəmizin möhtəşəm Qələbəsi ilə nida qoyulmasının, müasir tariximizdə ən əlamətdar və tarixi bir hadisə olaraq ölkəmizin hər bir diyarında üçrəngli bayrağımızın dalğalanmasının sevinci və təntənəsi ilə qeyd edildiyi bildirilib.
Kamran Əliyev deyib ki, xalqımızın, dövlətimizin qazandığı Zəfərin təməli ulu öndər Heydər Əliyevin əsasını qoyduğu dövlətçilik konsepsiyası və ordu quruculuğunun Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyev tərəfindən inamla reallaşdırılması olub.
Ölkə başçısının həyata keçirdiyi köklü islahatların və kompleks tədbirlərin nəticəsi olaraq Silahlı Qüvvələrimizin maddi-texniki bazasının möhkəmləndirildiyi, arsenalının ən müasir silah-sursat və hərbi texnika ilə zənginləşdirildiyi, bir sözlə müasir tələblərə tam cavab verən, istənilən döyüş tapşırığını ən yüksək səviyyədə yerinə yetirməyə qadir Azərbaycan Silahlı Qüvvələrinin formalaşdırıldığı diqqətə çatdırılıb.
Bununla yanaşı, həyata keçirilən uğurlu xarici siyasətin və görülən böyük işlərin nəticəsində bütün mötəbər beynəlxalq təşkilatlar tərəfindən Ermənistanın Azərbaycanın 20 faiz ərazisini, beynəlxalq səviyyədə tanınmış tarixi torpaqlarını işğal altında saxlamasının təsbit edildiyi qeyd edilib.
Xüsusi vurğulanıb ki, həm ordu quruculuğu, həm də balanslaşdırılmış effektiv xarici siyasət Ali Baş Komandan İlham Əliyevin rəhbərliyi ilə ordumuzun düşmən üzərində parlaq Qələbəsini təmin edib, siyasi-diplomatik yolla Ağdam, Laçın və Kəlbəcər rayonları bir güllə belə atılmadan azad edilərək ölkəmizin ərazi bütövlüyü bərpa olunub, Zəfərimiz ölkəmizin regional liderliyini birmənalı təsbit etməklə yeni geosiyasi reallıqlar yaradıb.
Baş prokuror azad edilmiş bölgələrdə gerçəkləşən və bütün dünyanı heyrətləndirən quruculuq və bərpa işlərinin əbədi azadlığına qovuşmuş Qarabağ və Şərqi Zəngəzura "Böyük Qayıdış"ın yüksək səviyyədə icrasına rəvac verdiyini bildirməklə dövlətimizin başçısı İlham Əliyev və Birinci vitse-prezident Mehriban xanım Əliyevanın yaxından iştirakı ilə həyata keçirilən nəhəng infrastruktur layihələrinin, strateji infrastruktur obyektlərinin açılışının, "ağıllı kənd" layihələrinin icrasının əzəli torpaqlarımızın dirçəldilməsinin təminatı olmaqla ölkəmizin gələcək onilliklər üçün dinamik tərəqqisini şərtləndirən strateji inkişaf konsepsiyasına müstəsna töhfə olduğunu diqqətə çatdırıb.
Tədbirdə hərbi-siyasi qələbəmizlə başa çatan Vətən müharibəsi zamanı xalqımızla, dövlətimizlə bir cəbhədə dayanan prokurorluq orqanlarının üzərinə düşən vəzifələrin layiqincə yerinə yetirdiyi, xüsusən döyüş əməliyyatlarının aparıldığı şəraitdə mümkün olan bütün istintaq-əməliyyat tədbirlərini uğurla icra etdikləri qeyd olunub.
Kamran Əliyev bildirib ki, hazırda işğaldan azad edilmiş ərazilərdə fəaliyyət göstərən prokurorluqlarda hüquq qaydasının möhkəmləndirilməsi, prokuror təsir tədbirlərindən istifadə etməklə aidiyyəti dövlət qurumları ilə birlikdə aparılan quruculuq işlərinə səlahiyyətləri daxilində dəstək göstərilməsi istiqamətində prokurorluq əməkdaşlarının xidmətlərinin daha səmərəli və peşəkar təşkil edilməsi məqsədilə yüksək şərait yaradılıb, növbətçilik əsasında fəaliyyət göstərilməsi üçün ayrılmış inzibati binalarda müasir maddi-texniki təchizat təmin edilib.
Bununla yanaşı, prokurorluq orqanları tərəfindən Ermənistan Silahlı Qüvvələrinin törətdikləri müharibə cinayətləri, sülh və insanlıq əleyhinə cinayətlərə görə təqsirli şəxslərin müəyyənləşdirilərək beynəlxalq hüquq normaları çərçivəsində məsuliyyətə cəlb edilməsi, həmçinin işğal nəticəsində ölkəmizə vurulmuş maddi ziyanın hesablanması istiqamətində müvafiq işlərin davam etdirildiyi qeyd olunub.
Sonda 44 günlük Vətən müharibəsinə həsr olunmuş sənədli film nümayiş etdirilib.
AZƏRTAC
