23 MAY Ekologiya və Təbii Sərvətlər Nazirliyi işçilərinin peşə bayramı
Azərbaycan Respublikasının Prezidenti İlham Əliyevin 16 may 2007-ci il tarixdə imzaladığı Sərəncama əsasən hər il 23 may Ekologiya və Təbii Sərvətlər Nazirliyi işçilərinin peşə bayramı günü kimi qeyd edilir. Ekoloji vəziyyətin yaxşılaşdırılması, ətraf mühitin mühafizəsi istiqamətində ölkə Prezidentinin rəhbərliyi ilə ardıcıl, məqsədyönlü işlər görülür, ekoloji problemlər həlli üçün müvafiq addımlar atılır. Bu çərçivədə Dövlət proqramları təsdiq edilir, ekologiya və ətraf mühitin mühafizəsi üçün ictimai savadlılıq, maarifləndirmə tədbirləri artırılır.
Ekologiya və Təbii Sərvətlər Nazirliyinin ümummilli lider Heydər Əliyevin 2001-ci il 23 may tarixli Fərmanı ilə yaradılması qeyd edilən xüsusda qlobal təhlükə halına gəlmiş problemin aradan qaldırılması üçün atılan ən vacib addımlardandır. Ekologiya və Təbii Sərvətlər Nazirliyi ölkə ərazisində, həmçinin Xəzər dənizinin Azərbaycana aid hissəsində ətraf mühitin qorunması, təbiətdən istifadənin təşkili, hidrometeoroloji proseslərin müşahidəsi və proqnozlaşdırılması istiqamətində davamlı işlər görür. Xalqımızın sağlamlığına xidmət etməklə yanaşı, məqsəd qlobal çirklənmənin də qarşısını almaqdır. İqtisadi potensialın qorunması, təbii ehtiyatlardan səmərəli istifadə edilməsi nazirliyin qarşısında duran başlıca məsələlərdir ki, bütün bunlar ekoloji aktların düzgün yerinə yetirilməsinin əsas tələbidir.
Ölkə başçımızın imzaladığı "Xəzər dənizinin çirklənmədən qorunması üzrə bəzi tədbirlər haqqında" və "Əhalinin ekoloji cəhətdən təmiz su ilə təminatının yaxşılaşdırılması ilə əlaqədar bəzi tədbirlər haqqında" sərəncamlara əsasən ekoloji problemlərin həlli üçün beynəlxalq standartlara cavab verən modul tipli lokal təmizləyici qurğular alınmışdır. Abşeron yarımadasının şimal hissəsinin 61 kilometrlik sahil zolağında quraşdırılaraq istismara buraxılmış, Kür və Araz çaylarının suyundan istifadə edən 50 yaşayış məntəqəsində Beynəlxalq Səhiyyə Təşkilatının standartlarına cavab verən sutəmizləyici qurğular quraşdırılaraq əhalinin istifadəsinə verilmişdir. Qeyd etmək lazımdır ki, Xəzər dənizində ekoloji tarazlığı qorumaq olduqca çətin olsa da, innovativ yeniliklər və məsuliyyətli yanaşma ilə bu problem aradan qaldırılır.
Ekoloji cəhətdən dayanıqlı sosial-iqtisadi inkişafa, meşələrin bərpa edilməsi və artırılmasına, hidrometeorologiyanın inkişafına dair milli proqramlar uğurla yerinə yetirilir. Dövlət başçısının "Ekologiya ili" elan etdiyi 2010-cu ildə bu sahəyə diqqət daha da artırılmışdır. Həmin il yaşıllaşdırma kampaniyalarının sayı artırılmışdır ki, bu da qlobal əhəmiyyətə malikdir. Təsadüfi deyil ki, həmin il ərzində respublikamızda14 milyona yaxın ağac əkilib, yeni parklar salınıb. Prezident İlham Əliyevin bu kampaniyada iştirakı isə ətraf mühitə xüsusi diqqətin göstəricisi idi. Görülən işlər artıq ölkə ərazisində ənənə halını almışdır.
Heydər Əliyev Fondunun ekologiyanın, ətraf mühitin qorunmasına xidmət edən "Hərəmiz bir ağac əkək" layihəsi də təbiətin mühafizəsi və zənginləşdirilməsinə böyük töhfələr verir. Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın təşəbbüsü ilə həyata keçirilən layihə çərçivəsində yüz hektarlarla sahə yaşıllaşdırılmışdır.
Bundan əlavə, ətraf-mühitin mühafizəsi istiqamətində IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin fəaliyyəti də təqdirəlayiqdir. Təşkilat 2011-ci il iyulun 12-də Heydər Əliyev Fondunun vitse-prezidenti Leyla Əliyevanın təşəbbüsü ilə fəaliyyətə başlamışdır. Bu qeyri-hökumət təşkilatının əsas məqsədi ətraf mühit məsələləri və fəaliyyətlər barədə ictimai maarifləndirmə, gənclərlə əməkdaşlıq, ətraf mühit problemlərinin həlli üsulunu tapmaqdır.
Ətraf mühitin mühafizəsi, ekoloji problemlərin həlli, yaşıllaşdırma, yeni meşələrin salınması dövlətin prioritetləri sırasındadır. 1-12 may tarixlərində İsveçrənin Cenevrə şəhərində ətraf mühit üzrə Bazel, Rotterdam və Stokholm Konvensiyaları tərəflərinin konfransı keçirilmişdir. Üzv dövlətlərin, Birləşmiş Millətlər Təşkilatının Ətraf Mühit Proqramının, bu sahədə fəaliyyət göstərən Avropa və beynəlxalq qeyri-hökumət təşkilatları nümayəndələrinin qoşulduğu tədbirdə Azərbaycandan Ekologiya və Təbii Sərvətlər Nazirliyinin Dövlət Ekoloji Ekspertiza Agentliyi və nazirliyin əməkdaşlarından ibarət nümayəndə heyəti də iştirak etmişdir. Konfransda plastik, elektron, nano tullantılarla yanaşı, digər təhlükəli tullantıların sərhədlərarası qanunsuz daşınmasının qarşısının alınması, plastik maddələrin tətbiqinin məhdudlaşdırılması, onların ətraf mühitə və su hövzələrinə təsirinin azaldılması və təhlükəsiz idarə edilməsinin vacibliyi vurğulanmışdır.
Mayın 20-də isə Ekologiya və Təbii Sərvətlər Nazirliyi, Sabunçu Rayon İcra Hakimiyyəti və "Təmiz Şəhər" ASC-nin təşkilatçılığı, bələdiyyə və icra nümayəndələrinin, Azərbaycan Könüllü Təşkilatları İttifaqı üzvlərinin, eləcə də EcoHub ekoloji platforması könüllülərinin iştirakı ilə Xəzər dənizinin Bilgəh sahilində təmizlik aksiyası keçirilmişdir. Aksiya zamanı sahil zolağı plastik və digər tullantılarından təmizlənmiş, 240 kiloqram tullantı çeşidlənərək aidiyyəti üzrə daşınmışdır. Aksiyanın keçirilməsində məqsəd dəniz sahillərində təmizliyə riayət olunmasını təbliğ etmək, sahilyanı ərazilərin məişət tullantıları ilə zibillənməsinin qarşısını almaq və ictimaiyyəti dəniz ətraf mühitinin mühafizəsi sahəsində mübarizəyə cəlb etməkdir. Ekologiya və Təbii Sərvətlər Nazirliyi hər kəsi ətraf mühitin mühafizəsinə yönələn bu cür tədbirlərdə fəal iştirak etməyə, təbiətə qayğı və həssas münasibət göstərməyə çağırır.
Təsadüfi deyil ki, milli inkişaf strategiyası prioritet istiqamətlərindən biri məhz ətraf mühitin mühafizəsi və insanların sağlam təbii mühitdə yaşamasını ən yüksək səviyyədə təmin etməkdir.
Nurlan ABDALOV,
"Respublika".