Vətən müharibəsində şəhid olmuş Maarif Rahim oğlu Həsənovun əbədi xatirəsinə ehtiram əlaməti olaraq, şəhərin Şəhidlər Xiyabanına yaxın ərazidə yerləşən Şəhriyar küçəsində yeni bulağın açılış mərasimi keçirilib.
Göyçay Rayon İcra Hakimiyyətinin başçısı Mehdi Səlimzadə, hüquq-mühafizə orqanlarının rəsmiləri, şəhidin ailə üzvləri, qazilər, din xadimləri və ictimaiyyət nümayəndələri tədbirdə iştirak ediblər. Mərasimdə rayon icra hakimiyyətinin başçısı M.Səlimzadə qeyd edib ki, torpaqlarımızın azadlığı, Vətənimizin bütövlüyü uğrunda canından keçmiş hər bir igidimizin adı tarixə qızıl hərflərlə yazılmışdır. İllər ötsə də, gələcək nəsillər onları daim ehtiramla yad edəcək.
Bulağın açılış mərasimində şəhid Maarif Həsənovun keçdiyi şərəfli döyüş yolundan, göstərdiyi şücaətdən danışıldı, məktəblilərin ifasında vətənpərvərlik ruhunda şeirlər söylənildikdən sonra Azərbaycan və qardaş Türkiyənin bayraqları ilə bəzədilmiş bulaq kompleksin önünə gül dəstələri düzülərək, qəhrəmanın xatirəsi bir dəqiqəlik sükutla yad edilib.
Maarif Rahim oğlu Həsənov 2020-ci il noyabrın 17-də Suqovuşan uğrunda gedən döyüşlərdə şəhid olub. Ölümündən sonra “Vətən uğrunda” medalı ilə təltif edilib.
Göyçay Rayon İcra Hakimiyyətində Vətən müharibəsi və Şəhid Ailələri ilə İşin Təşkili Şöbəsindən bildirildi ki, hazırda İkinci Qarabağ savaşında şəhid olmuş 43 nəfər göyçaylı igidlərin adlarının əbədiləşdirilməsi istiqamətində işlər davam etdirilir. Onlardan 6 nəfərin adına küçələr verilmiş, 20 nəfərin adları isə şəhərin müxtəlif yerlərində inşa edilmiş bulaq komplekslərində əbədiləşdirilmişdir.
Maarif RZAYEV,
”Respublika”.