Bu günlərdə daha bir şəhidimizin - Göyçay rayonunun Məlikkənd kəndi sakini, İkinci Qarabağ müharibəsində müqəddəslik zirvəsinə ucalmış Xəyyam Hüseyn oğlu Hüseynovun doğum günündə xatirəsi ehtiramla yad edilib, məzarı üzərinə gül dəstələri düzülüb. Mərasimdə çıxış edənlər 25 yaşlı Vətən aşiqinin keçdiyi qısa və mənalı həyat yolundan danışıblar. Rayon İcra Hakimiyyətinin rəsmiləri, YAP rayon təşkilatının nümayəndələri, kənd sakinləri və ağsaqqallar Xəyyam Hüseynovun doğulub boya-başa çatdığı ünvana baş çəkərək, ailə üzvləri ilə görüşüblər.
Gənc Xəyyamın uşaqlıq və gənclik dövrünün xoş xatirələri səhifələnib.
Görüşdə Azərbaycan Ordusunun qüdrətindən, şəhidlərimizin döyüş zamanı göstərdiyi qəhrəmanlıqlardan söz açılıb və qeyd edilib ki, rəşadətli ordumuz, igid oğullarımız döyüş meydanında hünər göstərərək, həyatları bahasına torpaqlarımızı işğalçılardan azad ediblər.
Xəyyamın atası Hüseyn Hüseynov göstərilən diqqət və qayğıya görə ölkə başçısı İlham Əliyevə, Birinci vitse-prezident Mehriban xanım Əliyevaya, ailəsi adından təşəkkürünü bildirib.
Maarif RZAYEV,
“Respublika”.