Biləsuvar Rayon İcra Hakimiyyəti, Səfərbərlik və Hərbi Xidmətə Çağırış üzrə Dövlət Xidmətinin Biləsuvar rayon şöbəsinin birgə təşkilatçılığı ilə keçirilən tədbirdə Azərbaycan Respublikasının Prezidenti İlham Əliyevin müvafiq sərəncamlarına əsasən ölkəmizin ərazi bütövlüyünün təmin edilməsi uğrunda döyüş əməliyyatlarında iştirakına və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirərək Vətən müharibəsi zamanı şəhidlik zirvəsinə yüksəlmiş biləsuvarlı igidlərin medalları ailələrinə təqdim olundu.
Biləsuvar Rayon İcra Hakimiyyətinin başçısı Faiq Qürbətov şəhid İbadlı Ruslanın təltif olunduğu 3-cü dərəcəli "Vətənə xidmətə görə" ordenini atası Sakit İbadova, şəhid Zöhrab Kərimovun təltif olunduğu 3-cü dərəcəli "Vətənə xidmətə görə" ordenini və "Vətən uğrunda" medalını atası Azad Kərimova təqdim etdi.
İcra başçısı xalqımızın 30 illik yurd həsrətinə son qoyan Müzəffər Ali Baş Komandanın rəhbərlik etdiyi Azərbaycan Ordusunun müsəlləh əsgər və zabitlərinin 44 günlük Vətən müharibəsində böyük şücaət göstərdiklərini vurğulayıb. Qələbəyə görə Ali Baş Komandana, şanlı Azərbaycan Ordusuna, şəhidlərimizə, qazilərimizə borclu olduğumuzu qeyd edib. Dövlətimizin Vətən uğrunda sağlamlıqlarını itirən qazilərimizi, yaralılarımızı, şəhid ailələrini daim diqqət mərkəzində saxlayacağını söyləyib.
Şəhid ailələri onlara göstərilən diqqət və qayğıya görə ölkə Prezidenti, Silahlı Qüvvələrin Ali Baş Komandanı İlham Əliyevə və Birinci vitse-prezident Mehriban xanım Əliyevaya öz minnətdarlıqlarını bildirdilər.
Ərəstun ABDULOV,
"Respublika".