İmişlidə şəhidlərimizin, Vətən müharibəsində adlarını hərb tariximizə qızıl hərflərlə yazdıran igid oğullarımızın xatirəsi əziz tutulur. Vətən uğrunda canlarından keçən oğul və qızlarımız, onların ailələri daim ziyarət olunur. Şanlı zəfər yürüşündə qəhramanlıq göstərərək canından keçmiş şəhid oğullarımızdan biri də Bayramov Elnur Şəmsi oğludur. İmişli rayonunun Şahverdili kəndində şəhid Bayramov Elnur Şəmsi oğlunun adının əbədiləşdirilməsi məqsədilə oxuduğu məktəbdəki sinif otağına onun adı verilib. Sinif otağında şəhidimizin həyat və döyüş fəaliyyətini əks etdirən guşə yaradılıb.
Elnur Bayramov oktyabrın 28-də Şuşa ətrafında Daşaltı uğrunda gedən ağır döyüşlərdə qəhrəmancasına şəhid olub. Ölkəmizin ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Bayramov Elnur Şəmsi oğlu olümündən sonra Azərbaycan Prezidenti İlham Əliyevin müvafiq Sərəncamlarına əsasən “Vətən uğrunda” və “Xocavəndin azad olunmasına görə” medalları ilə təltif edilib.
Tədbirdə iştirak edən İmişli Rayon İcra Hakimiyyətinin başçısı Elçin Rzayev bildirdi ki, 44 günlük Vətən müharibəsində Ali Baş Komandanımız cənab İlham Əliyevin rəhbərliyi ilə Müzəffər Azərbaycan Ordusu Zəfər çalıb və Elnur kimi oğullarımızın qanı, canı bahasına torpaqlarımız mənfur düşməndən azad edilib. “Şəhidlərin adlarını daim yaşatmaq, onların xatirəsini əziz tutmaq bizim ən müqəddəs amalımızdır”-- deyən icra başçısı sinif otağına şəhidin adının verilməsinin də məhz bu amala xidmət etdiyini bildirdi. Tədbirdə digər çıxış edənlər sinif otağına şəhidimizin adının verilməsində şagirdlərin üzərinə böyük məsuliyyət düşdüyünü, göstərilən etimadı doğrultmaq üçün təhsildə müvəffəqiyyət qazanmalarının və vətənpərvər olmalarının vacibliyini vurğuladılar. Məktəblilər vətənpərvərlik mövzusunda şeirlər səsləndirdilər. Mərasim iştirakçıları şəhidin evində yas mərasimində iştirak etdilər.
Ərəstun ABDULOV,
“Respublika”.