Azərbaycan Ordusu İkinci Qarabağ müharibəsində öz zəfər yürüşü ilə dünya hərb tarixinə parlaq səhifə yazdı. Xarici havadarlarının köməyi ilə işğal etdiyi ərazilərdə düşmənin tikdiyi hərbi istehkamlar, topladığı döyüş texnikaları və canlı qüvvəsi Azərbaycan Ordusu tərəfindən 44 gün ərzində darmadağın edildi. Vətən müharibəsində fəal iştirak edən şəhid Hüseynov Eldəniz Tahir oğlunun doğum günü qeyd edildi. Yaşasaydı Eldəniz Tahir oğlu Hüseynovun 25 yaşı olacaqdı. Bu münasibətlə İmişli Rayon İcra Hakimiyyətinin başçısı Elçin Rzayev, Aparatın məsul işçiləri və şəhidin yaxınları tərəfindən Eldənizin dəfn olunduğu şəhər qəbiristanlığında məzarı ziyarət edilib. Məzarına gül dəstələri qoyulub, ruhuna dualar oxunub və əziz xatirəsi ehtiramla yad edilib.
Şəhidimiz Eldəniz Hüseynovun doğum günündə adını daşıyan xatirə bulağının da açılışı oldu. Tədbirdə ölkə Prezidenti, Ali Baş Komandan İlham Əliyevin rəhbərliyi altında 44 günlük Vətən müharibəsində qüdrətli Azərbaycan Ordusunun qazandığı tarixi Qələbədən söz açan İmişli Rayon İcra Hakimiyyətinin başçısı Elçin Rzayev həmin qələbədə payı olan Eldəniz Hüseynov kimi qəhrəman oğullarımızla hər birimizin fəxr etdiyini bildirdi. Qeyd etdi ki, Azərbaycanın tarixi zəfərinin mənbəyi xalqımızın həmrəyliyi, Ali Baş Komandanın ətrafında sıx birləşən xalqın inamı, Azərbaycan Ordusunun məğlubedilməzliyi, hünəri və qətiyyəti idi. Çıxış edənlər 44 günlük müharibədə əldə etdiyimiz şanlı Qələbəyə görə Ali Baş Komandana, şanlı Azərbaycan Ordusuna, şəhidlərimizə, qazilərimizə borclu olduğumuzu söylədilər.
Şəhidimiz Vətən müharibəsində Füzuli, Xocavənd və Cəbrayılın azadlığı uğrunda gedən döyüşlərdə savaşıb. Oktyabrın 8-də Cəbrayıl uğrunda gedən döyüşlərdə qəhrəmancasına şəhid olub. Eldəniz Hüseynov vəzifə borcunu şərəflə yerinə yetirdiyinə görə Azərbaycan Prezidenti, Ali Baş Komandan İlham Əliyevin müvafiq sərəncamları ilə ölümündən sonra “Vətən uğrunda”, “Cəbrayılın azad olunmasına görə”, “Füzulinin azad olunmasına görə” və “Hərbi Xidmətə görə” medalları ilə təltif edilib.
Ərəstun ABDULOV,
“Respublika”.