İmişlidə şəhidlərimizin, Vətən müharibəsində adlarını hərb tariximizə qızıl hərflərlə yazdıran igid oğullarımızın xatirəsi əziz tutulur. Vətən uğrunda canından keçən oğul və qızlarımız, onların ailələri daim yad olunur. Şanlı zəfər yürüşündə qəhrəmanlıq göstərərək canından keçmiş şəhid oğullarımızdan biri də Mehdizadə Rüfət İsrayıl oğludur. Vətən müharibəsində şəhidlik zirvəsinə yüksələn Mehdizadə Rüfət İsrayıl oğlunun doğum günü qeyd olundu. İmişli Rayon İcra Hakimiyyətinin başçısı Elçin Rzayev, YAP İmişli rayon təşkilatının əməkdaşları, şəhidin ailə üzvləri və kənd sakinləri tərəfindən şəhidimizin məzarı ziyarət edilib, üzərinə gül-çiçək düzülüb, əziz xatirəsi anılıb, ruhuna dualar oxundu. Şəhidin ata ocağında görüşdülər. Valideynləri ilə görüşdə rayon rəhbəri ailə üzvlərinin problemləri ilə maraqlandı. Ölkə Prezidenti, Ali Baş Komandan İlham Əliyevin rəhbərliyi ilə 44 günlük Vətən müharibəsində qüdrətli Azərbaycan Ordusunun qazandığı tarixi Qələbədən söz açan rayon icra hakimiyyətinin başçısı Elçin Rzayev həmin qələbədə payı olan Rüfət Mehdizadə kimi qəhrəman oğullarımızla hər birimizin fəxr etdiyini bildirdi.
Mehdizadə Rüfət İsrayıl oğlu 1996-cı il aprelin 1-də İmişli rayonunun Qulubəyli kəndində anadan olub. “Düşmən kimdir ki, biz ondan qorxaq. Onlar bizdən qorxsun ki, biz gəliri”. Rüfət Mehdizadə bu kəlməni deyərək Vətən müharibəsinə gedir. Rüfət Mehdizadə Vətən müharibəsində qəhrəman hərbçi kimi şərəfli döyüş yolu keçib. Füzuli və Cəbrayıl istiqamətlərində gedən döyüşlərdə xüsusi qəhrəmanlıqlar göstərərək düşmənin canlı qüvvəsini və texnikasını məhv edib. Şəhidimiz 2020-ci il sentyabrın 30-da Füzuli uğrunda gedən döyüşlərdə qəhrəmancasına şəhid olub. Azərbaycan Prezidenti İlham Əliyevin müvafiq sərəncamlarına əsasən ölkəmizin ərazi bütövlüyünün təmin edilməsi uğrunda döyüş əməliyyatlarında iştirakına, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Mehdizadə Rüfət İsrayıl oğlu ölümündən sonra “Vətən uğrunda”, “Füzulinin azad olunmasına görə” və “Xocavəndin azad olunmasına görə” medalları ilə təltif edilib. Şəhid hərbçimizin 2 övladı bizlərə əmanətdir.
Şəhidimizin ailəsi dövlət tərəfindən onlara göstərilən diqqət və qayğını hər zaman hiss etdiklərini, bu qayğını yüksək qiymətləndirərək Azərbaycan Prezidenti İlham Əliyevə və Birinci vitse-prezident Mehriban xanım Əliyevaya minnətdarlıqlarını bildirdilər.
Ərəstun ABDULOV,
“Respublika”.