İnnovasiya həyati zərurətdir və daim inkişafdadır. Buna görə də Kənd Təsərrüfatı Nazirliyi sahədəki elmi -texniki yeniliklərin təbliği və tətbiqinə ciddi fikir verir. Nazirliyin mətbuat xidməti bildirir ki, Aqrar İnnovasiya Mərkəzinin təşkilatçılığı ilə növbəti Aqrar İnnovasiya Festivalı Şəmkir rayonunda təşkil edilib. Şəmkir Aqroparkın ərazisində təşkil olunan festivalda kənd təsərrüfatı təyinatlı innovativ məhsul və texnologiyalar nümayiş olunub. Müxtəlif texnika, avadanlıq və kənd təsərrüfatı bitkilərinin nümayiş olunduğu festival sərgi, startapzonalar, dəyirmi masa, təlim və məlumat sessiyalarından ibarət olmaqla təşkil olunub.
Festivalın açılış hissəsində çıxış edən Şəmkir Rayon İcra Hakimiyyətinin başçısı Rəşad Tağıyev, Kənd Təsərrüfatı Nazirliyinin aparat rəhbəri Rafail Quliyev, İqtisadi Zonaların İnkişafı Agentliyinin sədri Elşad Nuriyev, Şəmkir Aqroparkın rəhbəri Faiq Baxşıyev regionlarda təşkil edilən belə festivalların əhəmiyyəti barədə danışıblar. Aqrar İnnovasiya Mərkəzinin direktoru Anar Cəfərov “Agroinnofest” layihəsinin təqdimatı ilə çıxış edərək festival barədə ətraflı məlumat verib.
Festival zamanı mütəxəssislər tərəfindən kənd təsərrüfatı məhsul istehsalçılarına məsləhət xidməti göstərilib, nümayiş olunan innovativ texnologiyaların iş prinsipi və onlardan istifadənin üstünlükləri barədə məlumat verilib. Eyni zamanda, “Kənd təsərrüfatında sığortalanan bitki növləri”, “İntensiv yemləmənin təşkili”, “İstixanalarda ağıllı monitorinq sistemləri”, “Sahibkarlara dəstək mexanizmləri”, “Süd sağım sistemləri”, “Gübrələr” mövzularında təlimlər keçirilib.
Qeyd edək ki, aqrar innovasiyaların kənd təsərrüfatı məhsul istehsalçılarına əlçatanlığının təmin edilməsi məqsədilə Aqrar İnnovasiya Mərkəzi tərəfindən ölkənin müxtəlif bölgələrində innovasiya festivalları keçirilir. Gəncə, Şəki, Füzuli, Lənkəran, Quba, Ucar, Qobustan, Ağstafa, Zaqatala, İmişli rayonlarında təşkil olunan bu festivallarda minlərlə fermer müxtəlif kənd təsərrüfatı təyinatlı innovativ məhsul və texnologiyaları ilə tanış olmaq imkanı əldə ediblər.
Nəriman CAVADOV,
“Respublika”.
