Azərbaycan Respublikası Xarici İşlər Nazirliyinin Mətbuat xidməti idarəsinin rəisi Leyla Abdullayeva Ukraynadakı vəziyyətlə əlaqədar həyatını itirən vətəndaşlarımızın nəşlərinin ölkəmizə gətirilməsi ilə bağlı kütləvi informasiya vasitələrinin sualını cavablandırıb.
XİN-in Mətbuat xidməti idarəsindən AZƏRTAC-a bildiriblər ki, Leyla Abdullayeva bununla bağlı deyib: "Ukraynadakı vəziyyətlə əlaqədar həlak olan 5 Azərbaycan vətəndaşının, o cümlədən Odessadan Moldova istiqamətində şəxsi təşəbbüsləri ilə təxliyəyə çalışan və Kuçurqan keçid məntəqəsində naməlum şəxslər tərəfindən odlu silahlardan açılan atəş nəticəsində həyatını itirən 1975-ci il təvəllüdlü İsmayılov Nemət, 1966-cı il təvəllüdlü İsmayılov Rəhim, 1994-cü il təvəllüdlü Əlizadə Azər, 1997-ci il təvəllüdlü Salmanov Camal, habelə Xarkovda açılmış atəş nəticəsində həlak olan 1987-ci il təvəllüdlü Məmmədov Qoşqarın nəşi martın 14-də Moldovanın Kişineu şəhərindən xüsusi avtomobillərlə Rumıniya və Bolqarıstan ərazisindən keçməklə Türkiyəyə, oradan isə təyyarə ilə Azərbaycana yola salınıb.
Həlak olan vətəndaşların cəsədləri martın 15-də Azərbaycan Hava Yollarının İstanbul-Bakı reysi ilə Vətənə gətiriləcək və yaxınlarına təhvil veriləcək".
AZƏRTAC