Biləsuvarda 5 Oktyabr-Müəllimlər Gününə həsr olunmuş tədbir keçirilib. Tədbirdə Biləsuvar Rayon İcra Hakimiyyətinin başçısı Faiq Qürbətov, Milli Məclisin deputatı Bəhruz Məhərrəmov, Səfərbərlik və Hərbi Xidmətə Çağırış üzrə Dövlət Xidmətinin Biləsuvar rayon şöbəsinin rəisi Nağı Cəfərov, təhsil işçiləri, məktəb direktorları və müəllimlər iştirak edib.
İştirakçılar əvvəlcə Heydər Əliyev parkında ulu öndərin abidəsinin önünə tər çiçəklər qoyublar.
Tədbiri giriş sözü ilə açan Biləsuvar rayon Təhsil Şöbəsinin müdiri Aqşin Bağırov müəllimləri peşə bayramları münasibətilə təbrik edərək rayonda təhsilin inkişafı istiqamətində görülən işlərdən və müəllimlərin qazandığı uğurlardan danışıb. Qeyd edib ki, Azərbaycan Respublikasının Prezidenti cənab İlham Əliyevin, Birinci vitse-prezident Mehriban xanım Əliyevanın ölkəmizdə təhsil sisteminin maddi-texniki bazasının möhkəmləndirilməsinə göstərdikləri yüksək diqqət və qayğı rayonumuzda da öz müsbət nəticələrini verir. Yeni təhsil müəssisələri inşa edilir, əsaslı təmir olunur və təhsil ocaqlarının maddi-texniki bazası yenilənərək informasiya-kommunikasiya texnologiyaları ilə təminatı yaxşılaşdırılır. Rayonumuzda yeni istifadəyə verilən təhsil ocaqları, inşa və əsaslı təmir olunan məktəb binaları təhsilin keyfiyyətinin yüksəlməsinə birbaşa təsir göstərən mühüm amillərdir.
“Azərbaycan Respublikasının təhsil işçilərinə fəxri adların verilməsi haqqında” Azərbaycan Respublikası Prezidentinin 05 oktyabr 2021-ci il tarixli Sərəncamı ilə rayonumuzun müəllimi Əhmədova Təranə Sarxan qızı “Tərəqqi” medalı ilə təltif olunmuşdur.
Tədbirdə Biləsuvar Rayon İcra Hakimiyyətinin başçısı Faiq Qürbətov çıxış edərək rayonun təhsil işçilərini peşə bayramları münasibətilə təbrik edib, onlara fəaliyyətlərində yeni-yeni uğurlar arzulayıb. Faiq Qürbətov qeyd edib ki, “Mən dünyada müəllimdən şərəfli ad tanımıram” deyən ümummilli lider Heydər Əliyev Azərbaycana rəhbərlik etdiyi bütün illərdə müəllim əməyini yüksək qiymətləndirib, onlara böyük hörmətlə yanaşıb, təhsil işçilərinin maddi vəziyyətinin, rifah halının yaxşılaşdırılmasının qayğısına qalıb. Bu gün dövlət rəhbərimiz İlham Əliyev də müəllim əməyini yüksək qiymətləndirərək onlara daim diqqət və qayğı göstərir.
Rayon rəhbəri bildirib ki, Azərbaycan Respublikasının Prezidenti İlham Əliyevin və Birinci vitse-prezident Mehriban xanım Əliyevanın rəhbərliyi ilə son dövrlər ölkəmizdə inşa olunan yeni, müasir məktəblər, yeni təhsil kompleksləri şagird kontingentinin təhsil şəraitini tamamilə dəyişir, tədrisin səviyyəsini yüksəldir. Bütün bu tədbirlər Prezident İlham Əliyevin “Uşaqlar yaxşı məktəblərdə oxumalı, müəllimlər də yaxşı məktəblərdə işləməlidirlər” fikrini reallığa çevirir.
Tədbirdə Milli Məclisin deputatı Bəhruz Məhərrəmov, Səfərbərlik və Hərbi Xidmətə Çağırış üzrə Dövlət Xidmətinin Biləsuvar rayon şöbəsinin rəisi Nağı Cəfərov, Milli Qəhrəman M. İbrahimov adına bağça- lisey--məktəb kompleksinin direktoru Bəhruz Mehdiyev, Nərimankənd kənd ümumi orta məktəbin direktoru Şakir Cəfərov, şəhər 1 nömrəli tam orta məktəbinin müəllimi Nərmin İsmayılova, Təzəkənd kənd tam orta məktəbinin müəllimi Ləyaqət Quliyeva və digərləri çıxış edərək ölkəmizdə bu sahədə görülən işlərdən, müəllim əməyinə verilən yüksək qiymətdən və müəllimlərin qazandığı uğurlardan danışıblar.
Sonda təhsildə fərqləndiklərinə görə bir qrup müəllimə fəxri fərmanlar və hədiyyələr təqdim olunub.
Ərəstun ABDULOV,
“Respublika”.
