Postmüharibə dövründə şəhid ailələri üzvləri və müharibə iştirakçıları olan 9,5 min şəxs üçün özünüməşğulluq proqramı çərçivəsində təsərrüfatlar yaradılıb. Əmək və əhalinin sosial müdafiəsi naziri Sahil Babayev və Şirvan Şəhər İcra Hakimiyyətinin başçısı İlqar Abbasov özünüməşğulluq proqramı üzrə Şirvan şəhərində müharibə veteranları üçün yaradılmış kiçik təsərrüfatlara baxış keçiriblər.

Nazirliyin ictimaiyyətlə əlaqələr və kommunikasiya şöbəsindən verilən məlumata görə, İkinci Qarabağ müharibəsi veteranları Qəhrəmanov Rəşad Rafiq oğlu bərbərxana xidmət sahəsini, Mustafayev Muxtar Əlisəfa oğlu isə qapı və pəncərə istehsalı sexini yaratmaları üçün özünüməşğulluq proqramı çərçivəsində avadanlıqlarla təmin ediliblər. R.Qəhrəmanov və M.Mustafayev diqqət və qayğıya, sosial dəstək tədbirlərinə görə Prezident İlham Əliyevə minnətdarlıqlarını ifadə ediblər. Hər iki müharibə veteranı özünüməşğulluq proqramının dəstəyi ilə yaratdıqları təsərrüfatlarını inkişaf etdirmək üçün səylə çalışdıqlarını bildiriblər.

Qeyd edək ki, dövlət başçısının göstərişinə uyğun olaraq postmüharibə dövründə şəhid ailələrinin üzvləri və müharibə iştirakçıları ilə bağlı genişmiqyaslı sosial dəstək proqramı həyata keçirilir. Nazirlik tərəfindən icra olunan sosial dəstək proqramı çərçivəsində həmin kateqoriyalara aid 122 min şəxsə 264 min xidmət göstərilib. O cümlədən 16,5 min şəxs aktiv məşğulluq proqramlarına cəlb olunub ki, onlardan 9,5 min şəxs üçün özünüməşğulluq proqramı çərçivəsində kiçik təsərrüfatlar yaradılıb.

M.MUSTAFAYEV,

"Respublika".