Bunu revanşist xəyallara düşən haylar və havadarları da unutmasınlar
"Bu gün Ermənistanda revanşist qüvvələr baş qaldırmaqdadır, ölkəmizə qarşı ərazi iddiaları davam edir". Bu fikirləri Prezident İlham Əliyev Hindistanın ölkəmizdə yeni təyin olunan fövqəladə və səlahiyyətli səfirinin etimadnaməsini qəbul edərkən bildirib. Ermənistanın sürətlə silahlanmasının yeni təhlükələr yaratdığını deyən dövlət başçısı qeyd edib ki, əgər doğrudan da Ermənistan Azərbaycan ilə sülh istəyirsə, onda nə üçün 100 milyonlarla dollar dəyərində silah alır?! Dövlət başçısı vurğulayıb ki, bu siyasət bölgə üçün yeni təhdidlərə gətirib çıxara bilər.
Cənubi Qafqazda vəziyyəti yenidən gərginləşdirmək istəyən qüvvələr müxtəlif təxribatlara əl atır, bölgədə sülhün və təhlükəsizliyin təmin olunmasını istəməyən ölkələr öz çirkin planlarını həyata keçirməyə çalışırlar. Bununla da Ermənistan bu dövlətlərin əlində alətə çevrilməklə özünü daha da çətin vəziyyətə salır. Lakin bütün bu çirkin niyyətli qüvvələr mühüm bir məsələni unudurlar. Bu, Azərbaycanın yaratdığı reallıqdır. Prezident, Ali Baş Komandan İlham Əliyevin rəhbərliyi ilə rəşadətli ordumuz döyüşərək, öz qanı və canı hesabına ərazi bütövlüyünü təmin etdi. Bu, çoxəsrlik Azərbaycan tarixinin ən parlaq səhifəsidir. Lakin 30 il ərzində işğala göz yumanlar bu gün regionda yaranan yeni reallıqları həzm edə bilmirlər. Artıq 3 ilə yaxındır ki, yeni bir dövr başlayır. Azərbaycan sülh və təhlükəsizlik naminə münasibətlərin normallaşması üçün şərtlərini təklif edir. Xalqımıza, tariximizə, mədəni-dini irsimizə, təbiətimizə, yeraltı və yerüstü sərvətlərimizə qarşı edilən bütün terror və vandalizm aktlarını və soyqırımı cinayətlərini heç vaxt yaddan çıxarmaq olmaz. Biz bunu unutmururq və heç bir zaman da unutmayacağıq.
Bu gün regionda diktə edən tərəf qalib Azərbaycandır və Ermənistana dayanıqlı sülh təklif edirik. Bu, ən böyük güzəştdir. Ermənistan yeni reallıqları qəbul etməlidir. Əgər Ermənistan bizim ərazi bütövlüyümüzü tanımasa, biz də onların ərazi bütövlüyünü tanımayacağıq. Bunun nəticəsi nə olacaq, bunu Ermənistan və onun arxasında duran riyakar ölkələr yaxşı bilməlidirlər. Müzəffər liderimiz Talış kəndində də mesaj verdi - əgər kimsə fikirləşir ki, bizə qarşı cızılmış çirkin planlar həyata keçə bilər, səhv edir. Azərbaycan sülhə nail olmaq üçün bütün imkanları səfərbər edir.
Azərbaycan özünün ən şərəfli, məsuliyyətli və tarixi dövrünü yaşayır. Ölkə başçısının irəli sürdüyü və həyata keçirdiyi davamlı inkişaf konsepsiyası dövlətimizin və xalqımızın tərəqqisinə, onun parlaq gələcəyinə hesablanmışdır. Prezident İlham Əliyev öz fəaliyyəti ilə həm partiya sədri, həm Prezident, həm də Ali Baş Komandan kimi hər bir vətəndaşımızın maraqlarını müdafiə etmiş, hər bir azərbaycanlının Prezidenti olduğunu dəfələrlə sübuta yetirmişdir. Ölkə başçısı ümummilli lider Heydər Əliyevin ideyalarını daha da inkişaf etdirərək uğurlu daxili və xarici siyasət həyata keçirir. Bunun nəticəsində Azərbaycan müstəqil dövlət olaraq daha da güclənir, dünya miqyasında söz sahibi olan dövlətə çevrilir. İldən-ilə biz ölkə başçısının həm daxili, həm də xarici siyasətində əldə etdiyi nailiyyətləri görürük. Bunu həm də dünya görür. Baxmayaraq ki, Azərbaycan kiçik bir ölkədir, lakin Prezident İlham Əliyevin siyasi müdrikliyi nəticəsində dünyada önəmi artır. Bu gün əksər regional və ya beynəlxalq layihələr Azərbaycanın iştirakı olmadan reallaşmır.
İqtisadi yüksəliş və güclü ordu hər bir dövlətin qüdrətini şərtləndirən amillərdir. Bu gün qürurla deyə bilərik ki, ölkəmiz iqtisadi və siyasi nailiyyətlərə imza atmaqla yanaşı, ordu quruculuğu prosesində də böyük uğurlar əldə edib. Dünya ictimaiyyəti etiraf edir ki, Azərbaycan Ordusu Cənubi Qafqazın ən güclü ordusudur. Ali Baş Komandan İlham Əliyevin qətiyyət və ardıcıllıqla davam etdirdiyi ordu quruculuğu prosesi xalqımızın zəngin və şərəfli ənənələrini qorumaqla həyata keçirilməkdədir. Bu gün öz gücü və qüdrəti ilə seçilən, qarşıya qoyulan bütün vəzifələri layiqincə yerinə yetirmək imkanına malik olan Azərbaycan Ordusu dövlət müstəqilliyinin bərpasından ötən illər ərzində müasir inkişaf səviyyəsinə gəlib çatdı. Bu gün xidməti yüksək səviyyədə aparmaq üçün bütün imkanlar yaradılmışdır. Ölkə rəhbərliyinin bu sahəyə olan yüksək diqqət və qayğısının nəticəsidir ki, dünyada orduların reytinqlərini tərtib edən sanballı qurumlar bu gün Azərbaycan Ordusunun dünyanın güclü orduları sırasında olduğunu təsdiqləyirlər. Xüsusilə qeyd olunmalıdır ki, müasir ordu quruculuğunu xarakterizə edən, Milli Ordumuzun möhkəmlənməsinə geniş imkanlar yaradan əsas amil dinamik iqtisadi inkişaf və ölkəmizin iqtisadi qüdrətinin artmasıdır. İqtisadi inkişaf ordumuzun bütün istiqamətlər üzrə potensialının yüksək səviyyəyə çatdırılmasına və Azərbaycanda hərbi-sənaye potensialının gücləndirilməsinə geniş imkanlar yaradır.
Dövlət başçısının diqqət və qayğısı sayəsində Azərbaycan Ordusunda hərbi quruculuq işləri yeni mərhələyə yüksəlməkdədir. Belə ki, ordunun döyüş hazırlığının yüksək səviyyədə saxlanılması, təminat və təchizat işlərinin modern tələblər səviyyəsində qurulması və dünyanın əsas güc sahibi olan dövlətlərlə hərbi əməkdaşlığın əhatə dairəsinin genişləndirilməsi mühüm istiqamətlərdəndir. Erməni kimi məkrli qonşuyla uzun sərhədə malik olmağımız hərbi qüdrətimizin yüksəlməsini və özünümüdafiə qabiliyyətinin daim artırılmasını vacib şərtə çevirir. Qürur duyulası haldır ki, qısa zaman kəsiyində böyük inkişaf yolu keçmiş qüdrətli Azərbaycan Ordusu bu gün ölkəmizin təhlükəsizliyinin qarantı olmaqla, müqəddəs bir vəzifəni yerinə yetirir. Yaxşı təlim görmüş əsgərlərimiz ölkəni hər an müdafiə etməyə hazırdır. Bu sadəcə yüksək döyüş ruhu yox, həm də modern silahlar sayəsində mümkün olub.
Onu da qeyd etmək lazımdır ki, bütün bu reallıqlara baxmayaraq, Qarabağda gərginlik hələ də qalmaqdadır. Bunun əsas səbəbi qanunsuz erməni hərbi birləşmələrinin bölgədən çıxarılmamasıdır, əslində isə kapitulyasiya sənədinə əsasən separatçı rejim və erməni ordusu Azərbaycan ərazilərini dərhal tərk etməli idi. Amma bu öhdəlik Ermənistan tərəfindən yerinə yetirilmədi, hətta düşmən adəti üzrə təxribatları və terror əməliyyatlarını davam etdirdi. 2021-ci il 11 yanvar və 26 noyabr tarixlərində yenidən Rusiyanın vasitəsilə əlavə 2 bəyannamə qəbul olundu ki, burada da bütün nəqliyyat kommunikasiyalarının, o cümlədən Azərbaycanın qərbi ilə Naxçıvanı birləşdirəcək Zəngəzur dəhlizinin açılması, sərhədlərin müəyyənləşməsi - delimitasiya və demarkasiya prosesinin başlanması nəzərdə tutulur. 10 noyabr Bəyanatından 2 ildən çox vaxt keçməsinə baxmayaraq, Ermənistan hələ də sülh müqaviləsinə aparan yolları bağlayır, prosesləri sabotaj edir, hərbi təxribatlar törədir. Rusiyanın vasitəçiliyi ilə üçlü formatdan başqa, bir də Avropa İttifaqının təşəbbüsü ilə Brüsseldə 5 görüş keçirilmiş və hər birində də ermənilərə bu öhdəliklərin həyata keçirilməsi xatırladılsa da, Ermənistanda revanşist çıxışlar davam etməkdədir.
"Bizə qarşı hər bir çirkin plana güclü iradəmiz, Müzəffər Ordumuz cavab verəcək". Bu sözləri martın 18-də Prezident İlham Əliyev Tərtər rayonunun Talış kəndində Azərbaycan xalqına müraciətində söyləyib: "İkinci Qarabağ müharibəsi dövründə bizə qarşı nə qədər təzyiqlər oldu, Ermənistana nə qədər yardımlar göndərildi. Ermənistanın müttəfiqləri bizi müxtəlif yollarla dayandırmağa çalışırdılar. Heç kim bizim qabağımızda dura bilmədi, bu gün də dura bilmir, sabah da dura bilməyəcək".
Mustafa KAMAL,
"Respublika".