Azərbaycan Respublikasında sosial-iqtisadi sabitliyin təmin edilməsi, insanların sağlamlığının, rifahının və mənəvi-əxlaqi dəyərlərinin qorunması məqsədilə narkomanlığa, narkotiklərin qanunsuz dövriyyəsinə qarşı mübarizə ümumdövlət vəzifəsi kimi müəyyən olunub. Hazırda bütün sahələrdə olduğu kimi, narkomanlıq və narkotik vasitələrin qanunsuz dövriyyəsinə qarşı mübarizə sahəsində də ardıcıl və məqsədyönlü addımlar atılır. Bunun üçün ölkədə müvafiq normativ hüquqi baza formalaşdırılıb, təsisatlar yaradılıb və milli proqramlar hazırlanıb həyata keçirilib. Son dərəcə vacib olan bu sahədə hüquq-mühafizə orqanları əməkdaşlarının peşə vərdişlərinin daha da inkişaf etdirilməsi prioritet istiqamətlərdəndir.

Baş Prokurorluğun mətbuat xidmətindən AZƏRTAC-a bildiriblər ki, bununla bağlı Baş Prokurorluğun Elm-Tədris Mərkəzi tərəfindən təşkil edilən "Narkotik vasitələrin və psixotrop maddələrin qanunsuz dövriyyəsi ilə əlaqədar cinayətlərin tövsifinin, habelə bu qəbildən olan işlərin istintaqının hüquqi (maddi, prosessual) əsasları və qaydaları" mövzusunda təlim kursu uğurla yekunlaşdırılıb.

Narkotik vasitələrin qanunsuz dövriyyəsinə qarşı mübarizənin aktuallığı və praktiki əhəmiyyəti nəzərə alınaraq, Baş Prokurorluqla Daxili İşlər Nazirliyinin səmərəli əməkdaşlığı çərçivəsində əldə edilmiş razılığa əsasən, təlimdə prokurorluq işçiləri ilə yanaşı, daxili işlər orqanlarının əməkdaşları da iştirak ediblər.

Tədbirə təlimçi qismində Baş Prokurorluğun müvafiq struktur qurumlarının təcrübəli nümayəndələri, dinləyici qismində isə 21 rayonda (şəhərdə) xidmət edən 69-u prokurorluq və 40-ı daxili işlər orqanları əməkdaşı olmaqla 109 nəfər cəlb olunub.

Kurs üzrə tədris tədbirləri carı il fevralın 7-dən 11-dək dinləyiciləri iş yerindən ayırmadan, internet üzərindən "ZOOM" proqramı vasitəsilə distant formada və canlı vaxt rejimində həyata keçirilib. Təlimlərdə təhlil materiallarından və müasir informasiya-kommunikasiya texnologiyalardan geniş istifadə olunub.

Kurs çərçivəsində dinləyicilərə "Narkotik vasitələrin qanunsuz dövriyyəsinə qarşı milli mübarizə strategiyası, bu sahədə olan problemlərin mahiyyəti və aktuallığı", "Narkotik vasitələrin qanunsuz dövriyyəsi ilə mübarizə sahəsində Avropa Məhkəməsinin presedent hüququ", "Xarici ölkələrin narkotik vasitələrin qanunsuz dövriyyəsi ilə mübarizə təcrübəsi", "Qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma cinayətlərinin tövsifi məsələləri və istintaq metodikası", "Narkotik vasitələrin və ya psixotrop maddələrin istehlakına təhrik etmə və ya qanunsuz olaraq tərkibində narkotik maddələr olan bitkiləri kultivasiya etmə cinayətlərinin tövsifi məsələləri və istintaq metodikası", "Narkotik vasitələrin qanunsuz dövriyyəsi ilə bağlı cinayətlərin aşkar edilməsi və açılması ilə əlaqədar əməliyyat-axtarış tədbirlərin növləri, xüsusiyyətləri, sənədləşdirilməsi qaydası, əməliyyat-axtarış fəaliyyəti nəticəsində toplanmış materialların sübutetmədə istifadəsi", "Narkotik vasitələrin, psixotrop maddələrin və ya onların prekursorlarının ölkəyə qanunsuz daxil olmasına və tranzitinə qarşı mübarizənin aktual problemləri, onların həlli yolları", "Narkotiklərin qanunsuz dövriyyəsi ilə mübarizədə yol verilən tipik qanun pozuntuları, bu qəbildən olan cinayət işləri üzrə baxış, axtarış, şəxsi axtarış, götürmə, habelə digər istintaq hərəkətlərinin icrasının aktual problemləri" və sair mövzular üzrə "PowerPoint" proqramı vasitəsilə hazırlanmış təqdimatların müşayiəti ilə məşğələlər tədris olunub.

Dinləyicilər məşğələlər zamanı tədris olunan materiallara maraq göstərib, təlimçilərlə aktiv ünsiyyətdə olublar. Tədris edilmiş əksər məşğələlərin elektron mətni onlara təqdim edilib. Kursun yekununda aparılan müzakirələr zamanı dinləyicilər əldə etdikləri bilik və bacarıqlardan məmnunluqlarını bildiriblər.

AZƏRTAC