Neftçala rayonunda fermerlərin dediklərinə görə, əvvəlki illərlə müqayisədə bu il daha çox məhsul gözlənilir. Yüksək məhsul əldə etmək üçün əkin sahələrində aqrotexniki becərmə qaydalarına ardıcıl və düzgün əməl olunub, alaq otlarına və ziyanvericilərə qarşı kimyəvi mübarizə tədbirləri vaxtında aparılıb, bitkilər tələbata uyğun optimal müddətdə mineral gübrə və suvarma suyu ilə təmin edilib.
Ölkə başçısının kənd təsərrüfatı sahəsinə olan diqqət və qayğısını, tapşırıq və tövsiyələrinin davamı olaraq bu il Neftçala rayonunda 6949 hektar sahədə pambıq əkini həyata keçirilib.⠀Əkilən pambıq sahələrinin becərilməsində yüzlərlə insan cəlb edilib və onların məşğulluğu təmin olunub. Pambıq sahələrinə göstərilən lazımi aqrotexniki qulluq nəticəsində pambıq tarlalarında bol məhsul yetişdirilib.⠀ ⠀
Neftçala Rayon İcra Hakimiyyətinin başçısı Mirhəsən Seyidov, RİH məsul şəxsləri, Neftçala SSİ-nin, Neftçala DAİM-in, “MKT İstehsal Kommersiya” MMC-nin məsul şəxsləri və fermerlərin iştirakı ilə pambıq sahələrinə baxış keçirilib, pambıq yığımına start verilib. Pambıq sahəsində fermerlər ilə görüş keçirən Neftçala RİH başçısı Mirhəsən Seyidov onları narahat edən məsələlərlə maraqlanıb. Aidiyyəti təşkilatlara müvafiq tapşırıqlar verilib. Pambıq yığımında Rayon İcra Hakimiyyətinin xüsusi nəzarətinin gücləndirilməsi, gündəlik mövcud qrafiklərin hazırlanması, suvarma zamanı sudan səmərəli istifadə, fermerlər arasında ədalət meyarının qorunması məsələsinə xüsusi diqqət çəkilib. Pambıq məhsulunun bu il hər hektar üçün 40 sentnerə çatdırılması fermerlərlə müzakirə olunub. Sahələrdə defolyasiya işləri aparıldıqdan sonra isə pambıqyığan kombaynlarla yığıma kütləvi şəkildə başlanılacağı tarixlərə xüsusi nəzarətin həyata keçirilməsi tapşırılıb. Mütəxəssislərin dediklərinə görə, havaların çox isti keçməsi ilə əlaqədar defolyasiya tədbirlərinə cari mövsümdə ötən illə müqayisədə xeyli tez başlanılıb. Hazırda rayonda pambığın tez və itkisiz yığımını təşkil etmək məqsədilə bütün maşın və mexanizmlərin hazır vəziyyətə gətirilməsi tapşırılıb. ⠀
Fermerlər yaradılan şəraitə, kənd təsərrüfatı sahəsinə göstərilən diqqətə və qayğıya görə Azərbaycan Prezidenti İlham Əliyevə minnətdarlıqlarını bildiriblər.
Hazırda pambıq yığımına 35 ədəd pambıqyığan kombayn, 902 nəfər işçi qüvvəsi cəlb olunub və 1237,24 ton pambıq yığımı həyata keçirilib.
Ərəstun ABDULOV,
“Respublika”.