Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə rəşadətli Azərbaycan Ordusu böyük şücaət və yüksək döyüş hazırlığı göstərərək 27 sentyabr 2020-ci il tarixdən başlayaraq 44 gün müddətində torpaqlarımızı işğaldan, düşmən tapdağından azad etdi. Vətən müharibəsində tarix yazan qəhrəman Ordumuz, əsgər və zabitlərimiz Azərbaycanın haqq uğrunda müharibə aparmaq əzmini, əsl döyüş ruhunu bütün dünyaya nümayiş etdirdi. Neftçala rayonunda Vətən müharibəsindəki qələbəmizdə şanlı tarix yazan şəhidlərimizdən Məmmədov Şahlar Şahin oğlunun xatirə kompleksinin açılışı oldu.
Açılışda Neftçala Rayon İcra Hakimiyyətinin başçısı Mirhəsən Seyidov, RİH məsul şəxsləri, hüquq- mühafizə orqanlarının, idarə, müəssisə, təşkilatların rəhbərləri, din xadimləri, şəhid ailələri, qazilər və məktəblilər iştirak edirdi. Azərbaycan Respublikasının dövlət himni səsləndirildikdən sonra, Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi zamanı şəhid olan hərbi qulluqçuların ruhu bir dəqiqəlik sükutla yad olundu. Tədbirdə çıxış edən şəhid Şahlar Məmmədovun ailə üzvləri və döyüş yoldaşları şəhidimizin həyat yolundan, döyüş şücaətindən danışdılar.
Şəhidin ailə üzvləri şəhid ailələrinə göstərilən diqqət və qayğıdan razılığını ifadə edərək Azərbaycan Prezidenti, Ali Baş Komandan İlham Əliyevə və Birinci vitse-prezident Mehriban xanım Əliyevaya minnətdarlıqlarını bildirdilər.
Çıxış edən Neftçala Rayon İcra Hakimiyyətinin başçısı Mirhəsən Seyidov Prezident, Ali Baş Komandan İlham Əliyevin rəhbərliyi ilə ötən ilin sentyabrın 27-də başlanan və 44 gündə qələbə ilə başa çatan Vətən müharibəsinin tarixi əhəmiyyətindən danışaraq, şəhidlərimizin qanının yerdə qalmadığını diqqətə çatdırdı. Rayon rəhbəri qeyd etdi ki, şəhid ailələri və qazilərin sosial müdafiəsinin gücləndirilməsi, onların problemlərinin vaxtında həlli hər zaman Prezident İlham Əliyev tərəfindən diqqətdə saxlanılır. Neftçala rayonunda da şəhid ailələrinə, qazilərə diqqət və qayğı göstərilməsi günün tələblərinə uyğun yüksək səviyyədə təşkil olunub.
27 sentyabr Anım Günü ilə əlaqədar olaraq təşkil olunan yürüş zamanı 44 günlük Vətən müharibəsində şəhid olan hərbçi və sivil vətəndaşların fotolarından ibarət plakatlar Azərbaycan Respublikasının Prezidenti İlham Əliyevin tapşırığına uyğun olaraq yürüşdən sonra şəhid fotoları ilə olan plakatlar xatirə olaraq şəhidlərimizin ailələrinə təqdim olunub. Təşkil olunan tədbirdə yürüşə çıxarılan fotoplakat və Ali Baş Komandan İlham Əliyevin əmri ilə işğalçı düşmənə qarşı bir yumruq altında birləşən Azərbaycan xalqının simvolik rəmzi olan “Dəmir Yumruq” xatirə hədiyyəsi şəhid Şahlar Məmmədovun ailəsinə təqdim olundu.
Tədbir məktəb şagirdlərinin hazırladıqları kompozisiyalar ilə davam etdirildi.
Ərəstun ABDULOV,
“Respublika”.