Azərbaycanın beynəlxalq aləmdə artan nüfuzu onun etibarlı tərəfdaş olmasını təsdiqləyir. Məlumdur ki, torpaqlarımız yerüstü, həm də yeraltı təbii sərvətlərlə zəngindir. İnkişaf etməkdə olan texniki imkanlar, yaşıl enerji ilə bağlı atılmış addımlar, bir çox qonşu ölkələrə ötürülən neft-qaz resursları və s. ölkəmizin gündən-günə artan inkişafının aydın nümunəsidir. Buna görə də qonşu dövlətlər arasında rəqabətdə Azərbaycanın önə çıxması bəzi ölkələrdə qıcıq yaradır. Bu siyahıda ən başda riyakar, xain Hayastan gəlir.

Dünya ictimaiyyətinə də məlum olan bu qısqanclıq son 30 ildə özünün ən pik formasını ortaya qoydu. XX əsrdə ermənilərin torpaqlarımıza köçürülərək sığınmalarına baxmayaraq, qısqanclıqları da artdı. İllərlə törətdikləri vəhşiliklər, vandallıqlar minnətdarlıqdan uzaq olan bu ölkənin bütün əməllərini ortaya qoydu. 30 il boyunca həm yerüstü, həm də yeraltı sərvətlərə malik olan doğma Qarabağı çapıb-talayıblar. Bu da onu deməyə əsas verir ki, onlar bu torpaqlarda gedəri olduqlarını bildikləri üçün, necə deyərlər, "görməmişcəsinə at oynadıblar". Bir çox ölkələrin Ermənistana dəstək verməsi də elə həmin dövlətlərin Azərbaycana duyduqları qısqanclıqdan irəli gəlir. Prezident İlham Əliyevin uğurlu strateji siyasəti bu kin-küdurətin qarşısını layiqincə alır.

Azərbaycanın son illərdə imzaladığı və beynəlxalq aləmdə böyük əhəmiyyət kəsb edən sənədlər, memorandumlar və bəyannamələr dünyanın gündəmində yer alır. Ölkəmiz ötən ilin iyulunda Avropa İttifaqı ilə "Enerji sahəsində Strateji Tərəfdaşlığa dair Anlaşma Memorandumu"nu da imzalayıb. Memoranduma əsasən, 2027-ci ilə qədər illik qaz ixracının 20 milyard kubmetrə çatdırılması gözlənilir. Avropa Komissiyasının Prezidenti Ursula Fon der Lyayen çıxışı zamanı qeyd edib ki, artıq Azərbaycanın timsalında daha etibarlı və etimad doğuran tərəfdaşlara üz tuturlar. Ümumilikdə, Azərbaycan bir çox Avropa ölkələrinin qaz istehlakının 80 faizini təmin edir. Bu addımlar ABŞ prezidenti tərəfindən də dəstəklənir. O, Azərbaycan Prezidentinə ünvanladığı son məktubunda qeyd edib ki, Azərbaycan Avropanın enerji təhlükəsizliyinin sabitləşdirilməsində həlledici rol oynayır.

Təsadüfi deyil ki, ən çox qısqanclıq sərgiləyən ölkələr Hayastan və onun havadarlarıdır. Son illərdə bunu aşkar şəkildə büruzə verən isə cənub qonşumuz İrandır. Ekspertlər də bildirir ki, istər cümhuriyyət dövründə, istərsə də indi İran hakimiyyətində ölkəmizə qarşı həmişə qısqanclıq olub və hələ də var. Çünki ölkəmiz Güney Azərbaycan türklərinə nümunə ola biləcək bir dövlətdir. Bunun nümunəsini isə 44 günlük mühəribə zamanı açıq şəkildə gördük. Ermənistana gizli yollarla etdiyi yardımları, atılan addımları saman altından bloklamağa çalışması isə nəhayət ki, gün üzünə çıxdı. Qısqanclıq nümunələri saysız-hesabsızdır, Azərbaycan Prezidenti və onun xalqı da bunu çox gözəl bilir. Çıxışı zamanı Prezident İlham Əliyev də bunu təsdiqləmişdi: "Bütün Azərbaycan ictimaiyyəti görüb ki, Avropa Şurası anti-Azərbaycan mövqedədir və bu təşkilatda anti-Azərbaycan meyilləri, azərbaycanofobiya hökm sürür və bizə ünvanlanmış bütün ittihamların təməlində məhz Azərbaycanofobiyadır". Avropa Şurası Parlament Assambleyasının Azərbaycana qarşı qərəzinin və ikili standartlarla yanaşmasının əsasında da qısqanclıq dayanır. Bu hərəkətlər Azərbaycanın bir daha beynəlxalq arenada güclü, etibarlı, qüdrətli ölkə olduğunu göstərir.

Töhfə SƏMƏDOVA,

"Respublika".