Respublikada pambıq yığımı davam edir.  Kənd  Təsərrüfatı  Nazirliyinin  mətbuat   xidməti   bildirir  ki, bugünədək fermerlər tərəfindən kondisiya çəkidə 285743 ton pambıq yığılaraq tədarük məntəqələrinə təhvil verilib.  Hazırda respublika üzrə pambığın orta məhsuldarlığı  hər   hektardan 27. 4 sentner təşkil edir.  Ağcabədi, Ağdam, Beyləqan, Bərdə, İmişli, Saatlı,  Tərtər, Yevlax və Zərdab rayonlarında orta məhsuldarlıq göstəricisi ümumrespublika göstəricisindən daha yüksəkdir.  

Qeyd  edək  ki,  bu il Azərbaycanın 16 rayonunda ümumilikdə 100 min hektardan artıq sahədə pambıq əkini aparılıb.  Ən çox pambıq Saatlı,   Ağcabədi,   Sabirabad və Bərdə rayonlarının ərazisində əkilib.  Bu rayonların hər   birinin  ərazisində pambıq əkinlərinin sahəsi 11 min hektardan çoxdur.  Ümumilikdə respublika üzrə pambıq əkini sahələrinin 45 faizdən çoxu məhz bu 4 rayonun payına düşür.  

Pambıq yığımı prosesinə 447 kombayn və 3085 traktor yedəyi cəlb olunub.  Pambıqyığan kombaynların say çoxluğu sahələrdən məhsulun 100 faizə yaxınını texnika vasitəsilə yığmağa imkan verir.  

Dövlət dəstəyinin genişləndirilıməsi fermerlərin pambıq əkininə marağını artırıb.  Aqrar Subsidiya Şurasının qərarına əsasən,   bu ildən tədarük məntəqələrinə təhvil verilən pambığa görə yalnız məhsul subsidiyası verilir.  Eyni qərarla məhsul subsidiyasının məbləği hər tona görə 100 manatdan 170 manata qaldırılıb.  

Kənd Təsərrüfatı Nazirliyinin pambıq tədarükü və emalı müəssisələri ilə apardığı müzakirələr nəticəsində 2022-ci ildə şirkətlər tərəfindən xam pambığın alış qiyməti yanvar və avqust aylarında hər dəfə 50 manat olmaqla iki dəfə artırılıb.  Ötən il 1-ci sort pambığın 1 tonu fermerlərdən 700 manata alınırdısa,   bu il təhvil verilən eyni sort pambığın 1 tonuna görə fermerlərə 800 manat ödənilir.  Məhsul subsidiyasına keçid və pambığın alış qiymətinin artırılması fermerləri aqrotexniki becərməni keyfiyyətlə yaxşı aparmağa,   daha çox məhsul istehsal edərək yaxşı gəlir əldə etməyə sövq edir.  

Beləliklə,  pambıqçılarımız ötən  ilin  yekun  nəticəsnə  (286,  7min   ton) nail  oldular. Lakin  bu  il  pambıq  yığımı   davam  edir,  biz  əmək  adamlarımızdan  yeni  uğurlar  gözləyirik.

Nəriman  CAVADOV, 

“Respublika”.