Şuşa xüsusi sessiyası çərçivəsində SOCAR ilə BP arasında Əməkdaşlıq Müqaviləsi imzalanıb.
AZƏRTAC xəbər verir ki, sənədi SOCAR-ın birinci vitse-prezidenti Rövşən Nəcəf və BP-nin Regional prezidenti Qəri Counz imzalayıb.
Bakı Enerji Həftəsi çərçivəsində Şuşa şəhərində imzalanan saziş hər iki şirkətin Azərbaycanda enerji keçidinin sürətləndirilməsinə dəstək vermək niyyətini əks etdirir. Şirkətlər öz təcrübələrini bölüşmək və bərpa olunan enerji mənbələri də daxil olmaqla Azərbaycanda təmiz, təhlükəsiz və sərfəli enerji həllərini irəli aparmaq imkanlarının qiymətləndirilməsi istiqamətində birgə işləmək arzusundadır.
Bu sənəd SOCAR və BP-nin Azərbaycanda innovativ texnologiyalar tətbiq etməklə, enerji səmərəliliyinin artırılması imkanlarından istifadə etməklə, əməliyyatçısı olduqları obyektləri elektrikləşdirməklə və onların işi nəticəsində yaranan emissiyaları azaltmaq üçün lazım olan digər ciddi tədbirlərə investisiyaları artırmaqla mövcud neft və qaz əməliyyatlarının dekarbonizasiyasına nail olmaq planlarını dəstəkləyir.
SOCAR-ın birinci vitse-prezidenti və prezident vəzifəsinin müvəqqəti icraçısı Rövşən Nəcəf deyib: "SOCAR və BP arasında uzun illərdir uğurlu əməkdaşlıq ənənəsi var. Xüsusən də, regionun və dünyanın enerji təhlükəsizliyinə mühüm töhfə vermiş Azərbaycanın müəllifi olduğu beynəlxalq enerji layihələrinin icrasında BP-nin etibarlı tərəfdaş kimi həmişə xüsusi rolu olub. Bu gün Şuşada imzaladığımız sənəd gələcək əməkdaşlığımız üçün yeni perspektivlər açır. Əminəm ki, birgə səylərimiz möhtəşəm nəticələrə gətirib çıxaracaq.
SOCAR-ın gələcəyə uzunmüddətli baxışı dəyər yaratmaq və dayanıqlı inkişafı təmin etməklə yanaşı, eyni zamanda, yeni sahələrdə öz mövqeyini möhkəmləndirməyi nəzərdə tutur. Bu baxımdan SOCAR-ın 2035-ci ilədək Korporativ Strategiyası enerji keçidi, rəqəmsallaşma və innovasiya sahəsində yeni perspektivlər üçün strateji təşəbbüslər müəyyənləşdirir. Bunun üçün SOCAR quruda və dənizdə bərpa olunan enerji mənbələri üzrə imkanları araşdırır və nəzərdən keçirir. SOCAR və BP arasında bərpaolunan enerji mənbələrinin birgə işlənməsinə dair əməkdaşlıq sazişi bu strategiyanın əsas tərkib hissələrindən biridir".
BP-nin Azərbaycan, Gürcüstan və Türkiyə üzrə regional prezidenti Qəri Counz deyib: "Bu gün biz SOCAR-la əməkdaşlığın yeni mərhələsinin təməlini qoyuruq. Biz 30 il birgə işləyərək Azərbaycanın neft və qaz ehtiyatlarının uğurla işlənməsinə nail olmuşuq. Bu da ölkənin regionda və dünyada etibarlı enerji təchizatçısı kimi mövqeyini gücləndirib. İndi isə enerji hasilatına olan diqqətimizi yeniləmək və tərəfdaşlığın yeni mərhələsinə başlamaq vaxtıdır. Biz birlikdə çox şeyə nail ola bilərik.
BP olaraq biz dayanıqlı karbohidrogenlərin təchizatına davam edəcək, müştərilər üçün rahatlıq və mobillik təkliflərini gücləndirəcək və bərpaolunan enerji və digər təmiz enerji mənbələrinə investisiyalarımızı əhəmiyyətli dərəcədə artıracağıq - bu bizim strategiyamızdır, yəni dünyanın bu gün ehtiyac duyduğu karbohidrogenləri aşağı emissiya ilə təmin etməklə yanaşı, enerji keçidinin sürətləndirilməsinə investisiyalar qoyacağıq, o cümlədən Azərbaycanda da. Enerji işlənmələrinin növbəti mərhələsinə aparan yolun əvvəlində SOCAR-la əməkdaşlığa başlamaqdan məmnunuq".
AZƏRTAC
