2022 -ci ilin yanvar-fevral aylarında Əmək və Əhalinin Sosial Müdafiəsi Nazirliyi və qurumları üzrə 307 min 544 vətəndaş qəbul edilib. Onlardan 9 min 200-nün nazirliyin və qurumların rəhbər vəzifəli şəxsləri tərəfindən qəbulu həyata keçirilib.
Bu barədə Əmək və Əhalinin Sosial Müdafiəsi Nazirliyində keçirilən kollegiya iclasında bildirilib.
Kollegiyanın sədri, əmək və əhalinin sosial müdafiəsi naziri Sahil Babayev qeyd edib ki, Prezident İlham Əliyevin tapşırıqlarına əsasən aparılan sosial islahatların əsas məqsədi vətəndaş rifahının və məmnunluğunun təminatıdır. Bu məqsədlə geniş miqyasda tədbirlər həyata keçirilir.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, kollegiya iclasında qeyd edilib ki, sosial islahatlar ardıcıl xarakter almaqla, sosial ödənişlərin mütəmadi artırılması təmin olunur. 2022-ci ilin əvvəlindən ölkəmizdə yeni sosial islahat paketi kimi, əməkhaqqı, pensiya və s. sosial ödənişlər növbəti dəfə artırılıb. 3,4 milyon şəxsi əhatə edən həmin artımlar üçün illik əlavə olaraq 2,1 milyard manat ayrılıb.
S.Babayev vurğulayıb ki, vətəndaşlara xidmətlərin keyfiyyətinin artırılması üçün mühüm islahatlar həyata keçirilib. Birinci vitse-prezident Mehriban xanım Əliyevanın təşəbbüsü olan DOST konsepsiyası dövlət sosial xidmətlərinin "bir pəncərə"dən, operativ, tam şəffaf və müasir, vətəndaş məmnunluğuna uyğun qurulmasına imkan verib. 2019-cu ilin may ayından bəri DOST Agentliyi və bundan sonra 5 DOST mərkəzi açılıb, paytaxtın bütün rayonları və Abşeron rayonu DOST xidmətləri ilə əhatə olunub. Ötən il DOST mərkəzlərində 410 min vətəndaşa xidmət göstərilib.
Qeyd olunub ki, Azərbaycanın DOST təcrübəsindən faydalanmaq istəyən ölkələrin də sayı artmaqda davam edir. Bu gün bir sıra ölkələrlə həm DOST konsepsiyası, həm də nazirliyin fəaliyyət sahələrində geniş şəkildə tətbiq olunan innovativ yeniliklərlə bağlı fəal təcrübə mübadilələri aparılır.
Ümumilikdə, beynəlxalq əməkdaşlıq müstəvisində icra olunan layihələrin və əməkdaşlıq istiqamətlərinin sayı da 2018-ci ilə nisbətən iki dəfəyə qədər artaraq 2021ci ildə 38-ə çatıb.
Bu gün nazirlik 30-a yaxın beynəlxalq təşkilat və 30-dan çox ölkə ilə fəal əməkdaşlıq həyata keçirir. Ötən il bir sıra ölkələrlə (Serbiya, Səudiyyə Ərəbistanı Krallığı və s.) müvafiq fəaliyyət sahələrində əməkdaşlığa dair sənədlər imzalanıb. Bu il də müxtəlif ölkələrin müvafiq qurumları ilə yeni əməkdaşlıq sənədlərinin imzalanması nəzərdə tutulur.
İclasda vətəndaşların qəbulu və müraciətlərinə baxılması, beynəlxalq əlaqələr, daxili nəzarət və audit, kadr məsələləri, sənədlərlə və vətəndaşların müraciətləri ilə iş, ictimaiyyətlə əlaqələr və s. sahələrdə görülmüş işlər və qarşıda duran hədəflər, doğulanlar arasında cins nisbətinin pozulmasının aradan qaldırılması sahəsində təşviqata dair təkliflər müzakirə olunub. Həmçinin 2021-ci ildə təsdiq edilmiş aktual peşə və ixtisasların siyahısına yenidən baxılaraq, onlara əlavə və dəyişikliklərin edilməsi qərara alınıb.
AZƏRTAC
