Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu böyük şücaət və yüksək döyüş hazırlığı göstərərək 27 sentyabr 2020-ci il tarixdən başlayaraq 44 gün müddətində torpaqlarımızı işğaldan, düşmən tapdağından azad etdi. Vətən müharibəsində tarix yazan qəhrəman ordumuz, əsgər və zabitlərimiz Azərbaycanın haqq uğrunda apardığı mübarizə əzmini, əsl döyüş ruhunu bütün dünyaya nümayiş etdirdi.
Torpaqlarımızın bütövlüyü uğrunda gedən döyüşlərdə qəhrəmancasına şəhid olanlardan biri də Beyləqan rayonunun Əlnəzərli kənd sakini İsmayılov Elvin Tələt oğludur. E.İsmayılov ölkəmizin ərazi bütövlüyünün təmin edilməsi uğrunda aparılan döyüş əməliyyatlarında şəhidlik zirvəsinə yüksəlib. Şəhidimizin doğum günü münasibətilə Beyləqan Rayon İcra Hakimiyyəti başçısının müavini, ictimai-siyasi və humanitar məsələlər şöbəsinin müdiri Yeganə Məmmədova, aparatın şöbə müdirləri İlqar Quliyev, Heybət Əliyev, Rayon Təhsil şöbəsinin müdiri Suliddin Əsgərov, şəhidin ailə üzvləri və yaxınları, ictimaiyyət nümayəndələri şəhidin məzarını ziyarət edərək önünə qərənfillər düzüb, əziz xatirəsinə ehtiramlarını bildirdilər.
Elvin Tələt oğlu İsmayılov 1989-cu il martın 9-da Beyləqan rayonunun Əlinəzərli kəndində anadan olub. Müharibəyə gedərkən Elvin yenicə ailə həyatı qurmuşdu. İsmayılov Elvin 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi uğrunda başlanan Vətən müharibəsi zamanı Füzuli rayonu istiqamətində gedən döyüşlərdə olub. Döyüşlərdən bir addım belə geri atılmayan qəhrəmanımız Cəbrayılın Nüzgar kəndi uğrunda gedən ağır döyüşlər zamanı qəhrəmancasına şəhidlik zirvəsinə qovuşub. Beyləqan rayonu, Şəhidlər xiyabanında dəfn edilib.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısına qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Prezidenti İlham Əliyevin müvafiq sərəncamlarına əsasən İsmayılov Elvin Tələt oğlu ölümündən sonra “Vətən uğrunda”, "İgidliyə görə", "Cəbrayılın azad olunmasına görə", “Füzulinin azad olunmasına görə” medalları ilə təltif edilib.
Ərəstun ABDULOV,
“Respublika”.