44 günlük Vətən müharibəsində sağlamlığını qurban vermiş neçə-neçə oğullarımız qazi oldu. Ayağını, qolunu, gözünü itirdi. Bədənində hələ də fiziki ağrıların olmasına baxmayaraq, onların ürəyində həyat eşqi, Vətən məhəbbəti bir an sönmədi. İmişli Rayon İcra Hakimiyyətinin başçısı Elçin Rzayev Aparatın məsul əməkdaşları, Yeni Azərbaycan Partiyası İmişli rayon təşkilatının sədri Səfa Ağayev və hüquq-mühafizə orqanlarının rəhbərləri ilə birlikdə Tovuz döyüşləri zamanı ağır yaralanan İmişli şəhər sakini, qazi Zeynalov Məhiyəddin Elsevər oğlunu evində ziyarət etdilər.
Görüş zamanı RİH-in başçısı Elçin Rzayev bildirdi ki, Tovuz döyüşləri Azərbaycanın tezliklə ərazi bütövlüyünü bərpa edəcəyinə, həm xalqın, həm də ordunun şəxsi heyətinin inamını daha da artırdı. Həmçinin xalqımızın, eləcə də ordumuzun hər bir əsgər və zabitinin Ali Baş Komandan cənab İlham Əliyevin ətrafında daha sıx birliyini dünyaya nümayiş etdirdi. Xalqımız inandı ki, təcavüzkarı hərbi müstəvidə hər an acı məğlubiyyətə düçar etməyə qadir, hazır olan güclü ordumuz vardır. Rayon rəhbəri qazi Məhiyəddinin səhhəti və eyni zamanda ailənin qayğılarına diqqət yetirdi. Söhbət zamanı qazi keçdiyi döyüş yolundan danışıb, öz təəssüratlarını bölüşdü.
Qeyd edək ki, Zeynalov Məhiyəddin Elsevər oğlu 2020-ci il iyulun 12-də Ermənistan silahlı qüvvələrinin bölmələri tərəfindən Azərbaycan-Ermənistan dövlət sərhədində atəşkəs rejiminin pozulması zamanı hərbi xidmətdə olarkən döyüş zamanı ağır yaralanmış və həkimlərimizin səyi nəticəsində yenidən sağlamlığına qovuşmuşdur. Məhiyəddinin müalicə aldığı müddətdə ailəsinə baş çəkən RİH başçısının tapşırığı ilə tikintisi yarımçıq qalmış 3 otaq, eyvanı və mətbəxdən ibarət fərdi yaşayış evinin tikintisinin tamamlanması üçün lazım olan vəsait ayrılaraq qazinin evində təmir-bərpa işləri aparılmışdır. Təmir işləri başa çatdıqdan sonra, su-kanalizasiya və istilik sistemləri quraşdırılmış, eyni zamanda otaqlarda dekorativ bəzək işləri aparılaraq bütünlükdə ev müasir tələblərə uyğun təmir edilərək ailənin istifadəsinə verilmişdir. Qazi Zeynalov Məhiyyəddin Elsevər oğlunun ailə üzvləri şəhid ailələrinə və qazilərə göstərilən diqqət və qayğıya görə Azərbaycan Prezidenti İlham Əliyevə və Birinci vitse-prezident Mehriban xanım Əliyevaya minnətdarlıqlarını bildirdilər.
Ərəstun ABDULOV,
“Respublika”.