2023-cü ilin “Heydər Əliyev İli” elan edilməsi həmçinin 18 Aprel “Beynəlxalq Abidələr və Tarixi Yerlər Günü” ilə əlaqədar 26 aprel 2023-cü il tarixində Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti və Ağstafa Rayon İcra Hakimiyyətinin dəstəyi ilə “Keşikçidağ” Dövlət tarix-mədəniyyət qoruğu ərazisində yerləşən “İlham Əliyev adına zirvə”yə Niva markalı avtomobillərlə yürüş təşkil edilmişdir.
Ağstafa Rayon Heydər Əliyev Mərkəzinin qarşısında ucaldılmış ulu öndər Heydər Əliyevin abidəsi önünə gülqoyma mərasimi ilə başlamış yürüş 44 günlük Vətən müharibəsində qəhrəmancasına canlarından keçmiş şəhidlərimizin ailə üzvləri və cəsurcasına döyüşərək yaralanan qazilərimizin, rayon icra hakimiyyətinin rəhbərliyi və məsul şəxsləri, Dövlət Sərhəd Xidmətinin “N” saylı hərbi hissənin komandanlığı, Azərbaycan Əfqanıstan Veteranlar İctimai Birliyinin Ağstafa rayon filialının rəhbərliyi, Bakı Dövlət Universitetinin Qazax filialının alimləri və rayon ziyalıları, “Ağstafa Gənclər Evi” Sosial Xidmət Müəssisəsi”nin rəhbərliyi və könüllüləri, digər idarə və təşkilatların məsul şəxslərinin, həmçinin qoruq ərazisində elmi-tədqiqat işləri aparmış alimlərin iştirakı ilə baş tutmuşdur.
Yürüş iştirakçıları üçrəngli Azərbaycan bayrağı sancılmış Niva markalı avtomobillərlə “Keşikçidağ” Dövlət tarix-mədəniyyət qoruğunun ərazisinə yola düşmüş, Ağstafa-Poylu-Gürcüstan yolunun 38-ci kilometrliyində qoruğa məxsus məlumat lövhəsinin önündə dayanmış və bununla da yürüşün birinci mərhələsi başa çatdırılmışdır. Sonra yürüşün ikinci mərhələsinə start verilmiş və qoruğa məxsus informasiya mərkəzində dayanaraq bələdçilər tərəfindən iştirakçılara kurqanlar haqqında məlumatlar verilmiş, daha sonra isə qonaqlar “Keşikçidağ olaraq Qarabağda şanlı tarix yazanların yanındayıq” adlı layihə əsasında 44 günlük Vətən müharibəsində torpaq uğrunda canlarından keçən şəhidlərimizin xatirəsinə salınmış “Badam bağı” ilə tanış olmuşlar.
Yürüş iştirakçılarını qarşılayan 5 ədəd Dilbaz atı ilə çaparlar avtomobillərin önündə dayanaraq qonaqları salamlamış, ölkə Prezidenti cənab İlham Əliyevin şərəfinə ucaldılmış “İlham Əliyev adına zirvə”yə çatan qonaqlar milli musiqi sədaları altında qarşılanmışdır. Qonaqlar ölkəmizdə, həmçinin bölgəmizdə yerləşən abidələrdən bəhs edən çap məhsullarından ibarət sərgi ilə tanış olmuşlar. Daha sonra yürüş iştirakçıları qoruq ərazisində yerləşən mağaralar, onların divar və tavanlarında əks olunmuş freskalarla, su quyuları, ərzaq anbarları və digər abidələrlə tanış olmuşlar.
Yürüşün rəsmi hissəsini qoruğun direktoru Musa Mursaquliyev açaraq qonaqları salamlamış və bildirmişdir ki, 2023-cü ilin “Heydər Əliyev İli” elan olunması münasibətilə ölkə ərazisində silsilə tədbirlər keçirilir. “Keşikçidağ” Dövlət tarix-mədəniyyət qoruğu tərəfindən təşkil olunan yürüş də bu tədbirlərdən biridir. Tədbirin bədii hissəsində milli geyimli rəqqasların ifasında milli rəqslərimiz və ustad aşıq, Ağstafa Rayon Ağsaqqallar Şurasının üzvü, fəxri və Əməkdar mədəniyyət işçisi, şəhid atası Hüseyn Əzizoğlunun ifasında isə Azərbaycanın qədim saz havaları nümayiş olunmuşdur. Milli mətbəximizin ən gözəl və ləziz təamlarını nümayiş etdirmək üçün qurulan saclarda göy qutabı hazırlanmış, kəklikotulu samovar çayı, milli şirniyyatlarımız süfrəni bəzəmişdir.
Tədbir ağacəkmə aksiyası ilə davam etdirilmiş, ulu öndər Heydər Əliyevin 100 illiyi münasibətilə 100 ağac əkilmişdir.
Vəli VƏLİYEV,
“Respublika”.
