Aprelin 14-ü İrəvanda keçirilən ağır atletika üzrə Avropa çempionatının açılışında yerli azarkeşlərdən biri ermənilərə xas olan vandalizmi nümayiş etdirərək Azərbaycan bayrağını yandırıb. Sosial şəbəkələrdə həmin şəxsin dizayner Aram Nikolyan olduğu bildirilir.
Bayrağın yandırılması, idmançılarımıza hörmətsizlik, "İrqi ayrı-seçkiliyin bütün formalarının ləğv edilməsi haqqında" Birləşmiş Millətlər Təşkilatı Baş Assambleyası tərəfindən qəbul olunmuş Beynəlxalq konvensiyaya və bu qəbildən olan bütün əməllərə zidd davranışdır. Politoloq Oqtay Qasımov bildirir ki, baş verən hadisə Ermənistan cəmiyyətinin yoluxduqları narsist-faşist düşüncələrin fonunda heç də gözlənilməz deyildi. Bu, bir daha Ermənistan cəmiyyətinin, vətəndaşlarının ümumiyyətlə bölgədə sülh prosesinə əngəl törətdiyinin sübutudur: "Bu, bir vandalizm aktı və nifrətin, kin-küdurətin təzahürüdür. Ermənistan hakimiyyət dairələri Azərbaycan idmançılarının təhlükəsizliyinə tam təminat verməli və belə bir vandalizm hərəkatının baş verməsinə imkan yaratmamalıydılar. Amma erməni cəmiyyəti 200 ildən bəri antitürk ovqatında köklənmiş bir cəmiyyət olduğuna görə bu cür hadisələr heç də gözlənilməz deyil. Bu, bir daha göstərir ki, Ermənistan bölgə xalqları üçün böyük təhdiddir".
İllərdir davam edən erməni aqressiyası mütəmadi şəkildə özünü büruzə verir. Bu il artıq törədilən 3-cü təxribatdır. Bu vasitə ilə Ermənistan sülhü gecikdirir və öz çirkin əməllərindən əl çəkmir. Politoloq Samir Hümbətov bildirir ki, komandamız bu gün təhlükəsizlik adı altında oteldə girov saxlanılıb: "Bu, əslində Ermənistan tərəfinin danışıqlar prosesini ləngitməsi cəhdi kimi dəyərləndirilə bilər. Nəzərə almaq lazımdır ki, Azərbaycan tərəfi Ermənistandan fərqli olaraq 2015-ci il birinci Avropa oyunlarında erməni əsilli idmançılar üçün hətta Ermənistandan gələnlərə də şərait yaratmışdı. Yəni burada əslində, qeyri-adi heç nə yoxdur. Bu idman yarışlarıdır, Ermənistan isə bunu siyasi oyun alətinə çevirməyə çalışır. Amma əslində sülh danışıqları prosesində bu cür məsələlər diqqətə alınmalıdır. Çünki bu, dövlətlərarası münasibətlərin formalaşmasına şərait yaradır. Bu cür idman yarışlarında, kütləvi-mədəni tədbirlərdə bu kimi hallar baş verirsə, bu, o deməkdir ki, erməni cəmiyyəti hələ buna hazır deyil. Həm də dövlət olaraq bu məsələ maraqlarında deyil. Paşinyan administrasiyası bu məsələdə qeyri-obyektiv mövqe nümayiş etdirir. İndiki halda Ermənistanın bu addımları nəticə etibarilə danışıqlar prosesinə böyük zərbə ola, həm də gələcəkdə xalqlar arasında münasibətlərin normallaşmasına maneə törədə bilər. İstər bayrağımızın yandırılması, istərsə də idmançılarımızın girov götürülməsi olsun, bunlar hamısı ölkələrarası münasibətlərin qurulmasına böyük zərbə vurur".
Qeyd edək ki, Azərbaycan Respublikasına qarşı törədilən bu terror aktı ilə bağlı Baş Prokurorluğun İstintaq İdarəsində Cinayət Məcəlləsinin 12.2, 283.2.1 (zor tətbiq edilməklə milli nifrət və düşmənçiliyin salınması), 12.2, 283.2.2 (qulluq mövqeyindən istifadə etməklə milli nifrət və düşmənçiliyin salınması) və 12.2, 324-cü (Azərbaycan Respublikasının Dövlət bayrağı barədə təhqiredici hərəkətlər) maddələri ilə cinayət işi başlanıb.
Töhfə SƏMƏDOVA,
"Respublika".