Aqrar  sahədə  elm  və   texnikanın   yeniliklərindən, müasir   texnologiyadan   getdikcə   geniş  istifadə  olunur. Kənd Təsərrüfatı Nazirliyinin mətbuat   xidməti   bildirir   ki, nazirliyin  tabeliyindəki Dövlət Toxum Fondu, Əkinçilik Elmi-Tədqiqat İnstitutunun tövsiyəsi ilə fermerlər üçün ilk dəfə olaraq əkin kalkulyatoru istifadəyə verilib. Dövlət Toxum Fondunun sədri Sərxan Sərxanov bildirib ki, kalkulyatorun istifadəyə verilməsində əsas məqsəd fermerləri əkin xərcləri və gəlirləri barədə daha ətraflı məlumatlandırmaqdır. Artıq fermerlər və aqrar sahədə çalışanlar Dövlət Toxum Fondunun saytı üzərindən kalkulyatordan istifadə etməklə əkin sahələrinin rentabelliyini özləri müstəqil olaraq hesablaya biləcəklər.

Əkin kalkulyatorundan istifadə üsulu isə çox sadədir. İstənilən şəxs kalkulyatora fəaliyyət göstərdiyi rayonu, toxumun sortunu və reproduksiyasını, həmçinin əkin sahəsinin miqdarını daxil etməklə əldə edəcəyi məhsulun həcmini, əkinə çəkiləcək xərcləri və gəliri  asanlıqla hesablaya bilər.

Hazırda payızlıq buğda və arpa bitkiləri üzrə əkin sahəsinə çəkiləcək xərcləri və gəlirləri kalkulyator üzərindən hesablamaq mümkündür. Növbəti mərhələlərdə tərəvəz və digər bitkilər üzrə əkin sahəsinə çəkiləcək xərcləri və gəlirləri də kalkulyator vasitəsilə hesablamaq mümkün olacaq.

Nəriman  CAVADOV,

“Respublika”.