Ölkələr arasında mülki aviasiya sahəsində gələcək əməkdaşlığın məqsəd və vəzifələri AZAL-ın prezidenti Cahangir Əsgərovla Qırğızıstan Baş nazirinin müavini Bakıt Torobayev arasında keçirilən görüşdə müzakirə olunub.
Tərəflər əməkdaşlığın səmərəliliyinin artırılması, həmçinin ölkələr arasında hava əlaqələrinin açılması üçün müəyyən tədbirlərin görülməsinin vacibliyini vurğulayıblar.
Cahangir Əsgərov qeyd edib ki, aviasiya sahəsində səmərəli əməkdaşlıq ölkələr arasında qarşılıqlı münasibətləri əhəmiyyətli dərəcədə möhkəmləndirəcək, iqtisadi, mədəni və turizm əlaqələrinin inkişafına töhfə verəcək.
Bakıt Torobayev Azərbaycanın mülki aviasiya sahəsində əldə etdiyi nailiyyətləri yüksək qiymətləndirib və bu sahədə ölkələr arasında ikitərəfli əməkdaşlığın uğurla inkişaf edəcəyinə əminliyini ifadə edib. İkitərəfli münasibətlərin ölkələr arasında işgüzar və turizm əlaqələrinin möhkəmlənməsinə müsbət təsir göstərəcəyi qeyd olunub.
"Azərbaycan Hava Yolları" QSC-nin Mətbuat xidməti.