İkinci Qarabağ savaşında qələbənin qazanılmasında adını qanı ilə şanlı tariximizə yazan Araz Babalı oğlu İbadlı Lənkəran rayonunun Ürgə kəndində boya-başa çatmışdı. Araz müharibənin ilk günündən döyüşlərə atılıb. İgid əsgər dəfələrlə ağır döyüşlərdən zəfərlə çıxıb. Yağı düşmənin çoxlu sayda canlı qüvvəsini, döyüş texnikasını məhv edib. Araz Füzuli rayonu istiqamətində gedən döyüşlərdə atılan artilleriya atəşi nəticəsində ölümcül yaralansa da, döyüşə-döyüşə şəhidlik zirvəsinə ucalır. Milyonların ürəyində özünə əbədi yer edən Araz dövlət tərəfindən “Vətən uğrunda”, “İgidliyə görə” və “Şuşanın azad olunmasına görə” medalları ilə təltif edilib.
Ürgəlilərin ikinci qürur duyduğu, fəxr etdiyi igid Zabil Fikrət oğlu İbadzadədir. Zabil Vətənin yaşaması, xalqın xoşbəxt gələcəyi naminə müharibə meydanında düşmənə layiqli cavab verə bilibdir. Qəlbi erməni dığaların tapdağı altında olan torpaqların azad edilməsi istəyi ilə alışıb-yanan Vətən sevdalısı şərəfli döyüş yolu keçib. Çiyin-çiyinə vuruşduğu əsgər yoldaşları ilə bərabər elə bir tarix yazıbdır ki, bu heç zaman unudulmaz. Zabil noyabrın 5-də Qubadlı döyüşləri zamanı 24 yaşında şəhid olub. Azərbaycanın yeni, şanlı tarixində adı olan qəhrəman Zabil İbadzadə ölümündən sonra “Vətən uğrunda”, “Cəsur döyüşçü”, “Qubadlının azad olunmasına görə” və “Cəbrayılın azad olunmasına görə” medallarına layiq görülüb.
Ürgə kəndində hər iki ölməz qəhrəmanın xatirəsinə bulaq kompleksi ucaldılıb. Açılış mərasiminə bütün kənd sakinləri qatılmışdı. Lənkəran Şəhər İcra Hakimiyyətinin başçısı Taleh Qaraşov bulaq kompleksinin açılışını şəhid atası Babalı İbadovla birgə etdikdən sonra Dövlət himni oxundu, Vətən torpaqlarına öz qanları bahasına azadlıq gətirən şəhidlərin xatirəsi bir dəqiqəlik sükutla yad olundu. İcra başçısı öz çıxışında bildirdi ki, şəhidlərin xatirəsinin əbədiləşdirilməsi ilə bağlı görülən işlər və irəli sürülən təşəbbüslər gənc nəslin vətənpərvər ruhda tərbiyə almasında misilsiz əhəmiyyətə malikdir. 44 günlük Vətən müharibəsində qazandığımız zəfər canını fəda edən, düşmənlə üz-üzə qorxmadan dayanan və daim irəli getmək əzmində olanların çoxu gənc nəslin nümayəndələridir. Belə qəhrəman övladların yetişməsində valideynlərin rolu əvəzsizdir. Biz həmişə onlara minnətdar olmalıyıq. Bundan sonra da dövlət başçısı İlham Əliyevin və Birinci vitse-prezident Mehriban xanım Əliyevanın xüsusi diqqət və qayğısı nəticəsində hünər göstərib Vətəni yaşadan şəhidlərin adlarının əbədiləşdirilməsi və xatirəsinin yad edilməsi istiqamətində işlər mütəmadi həyata keçiriləcək.
“Artıq 30 il həsrətində olduğumuz torpaqlarımız azaddır. Bu sevinci öz xalqına yaşadan Vətəni canlarından üstün tutan qəhrəman oğullardır. Şəhidlərin həyatı doğma Azərbaycana şərəfdir... Doğrudur övlad itkisi çətindir. Xalqım mənim Arazımın adını uca tutur. Dövlətimdən, insanlardan qayğı görürəm. Görülən hər işə görə hamıya minnətdaram”. Bu qürurverici fikirləri isə şəhid atası Babalı İbadov söylədi.
Zəfər ORUCOĞLU.
