Gəgiran Lənkəranın ucqar dağ kəndidir. İndi Gəgiran kəndi qəhrəmanlar diyarı kimi tanınır. Kənddən Vətən müharibəsində 48 gənc düşmənlə döyüşmüş, onların səkkizi şəhidlik zirvəsinə ucalaraq, əbədiyyət adlı dünyasına qovuşubdur.
Haqq savaşımızda son nəfəsinədək odun-alovun içində ölümə meydan oxuyan səkkiz igidin biri 18 yaşında canını doğma Azərbaycana qurban verən şəhidi Baloğlan Şakir oğlu Əhədlidir. Üç bacının bir qardaşı Baloğlanın döyüş yolu Suqovuşanın azadlığı uğrunda başlayıb. Daha sonra Füzuli, Cəbrayıl və Şuşa istiqamətlərində gedən ağır döyüşlərdə sözün əsl mənasında tarix yazır, bir sıra strateji yüksəkliklərin alınmasında misilsiz fədakarlıq və şücaət göstərib. Vətənin qəhrəman oğlu Baloğlan 7 noyabrda Şuşa şəhəri istiqamətində gedən döyüşlərdə düşmən tərəfindən atılan artilleriya atəşi nəticəsində şəhid olub. Vətəninə, millətinə şərəf gətirən şəhid Baloğlan Əhədli ölümündən sonra “İgidliyə görə”, “Vətən uğrunda”, Qubadlının, Füzulinin, Şuşanın azadlığına görə medallarla təltif edilib.
Doğma kəndində Vətən müharibəsi şəhidi Baloğlan Şakir oğlu Əhədlinin xatirəsinə bulaq kompleksi ucaldılıb. Lənkəran Şəhər İcra Hakimiyyəti başçısının müavini Mikayıl Cəfərzadə xatirə kompleksinin açılışını şəhidin atası Şakir Əhədovla birgə etdilər. Vətənin azadlığı uğrunda canından keçən şəhidlərin xatirəsinin bir dəqiqəlik sükutla yad olunduğu tədbirdə icra başçısının müavini söylədi ki, şəhidlər öz qanları ilə Azərbaycanın yeni, şanlı tarixini yazdılar. Məhz buna görə də bu zəfərin müəllifləri daim qəlblərdə yaşayacaq. Adı qürurla çəkilən şəhid Baloğlan Əhədli də belə qəhrəmanlardandır. 44 günlük Qarabağ müharibəsində bütün azərbaycanlılar ya şəhid, ya qazi olmaq amalı ilə “Dəmir Yumruq” ətrafında birləşib ortaya qoyulan iradəni zəfərlə başa vurdular.
Övlad itkisinin ağır olduğunu deyən şəhid atası Şakir Əhədov bildirdi ki, oğlumun keçdiyi yol qısa, şərəfli oldu. O, ağır məqamlarda Vətənindən ötrü canından keçməyi bacardı. Mənim ağrı və acılarıma bütün xalqım şərik olur. Bir də şəhid ailələri hər zaman dövlətimizin başçısı İlham Əliyevin və Birinci vitse-prezident Mehriban xanım Əliyevanın qayğı və diqqətini görürlər. Ölkədə öz şəhidinə qarşı ehtirama görə hamıya minnətdaram.
Sonra məktəblilərin ifasında qəhrəman Vətən övladlarını vəsf edən şeirlər səsləndi.
Zəfər ORUCOĞLU.