ƏRDOĞAN: QƏLƏBƏMİZ CHP-də SABİTLİYİ POZUB
Parlament seçkilərinin “Cümhur İttifaqı”nın qələbəsi ilə başa çatması və prezident seçkilərində ciddi fərq Cümhuriyyət Xalq Partiyasının (CHP) sədrinin və komandasının rahatlığını pozub. “Report” agentliyinin verdiyi xəbərə görə, bunu Türkiyə prezidenti Rəcəb Tayyib Ərdoğan bildirib.
Türkiyə lideri qeyd edib ki, CHP rəhbərliyi mayın 14-də nəticələri bildiyi halda “qalib gəldik” teatrı səhnələşdirib və bunu da bütün xalq televiziyalardan izləyib. “Nəticələr məlum olduqca, onların yalanları üzə çıxdı. Buna baxmayaraq, nə qəsdən səhv istiqamətləndirdikləri seçicilərindən, nə də ictimaiyyətdən üzr istədilər”, - deyə Ərdoğan vurğulayıb.
Eyni zamanda, dövlət başçısının sözlərinə görə, qarşı tərəf yenə də insanlığa sığmayan kampaniyalarını davam etdirir: “Onlar səslərini ala bilmədikləri zəlzələ bölgəsindəki vətəndaşlarımıza yardımları dayandırır, otellərə yerləşdirdikləri insanları oradan çıxarmaq kimi vicdansızlıqlara əl atırlar. Dövlət-millət həmrəyliyi ilə, inşallah, yaralarımızı birlikdə sağaldacağıq. Zəlzələdən əziyyət çəkən qardaşlarımızı tək qoymayacaq, yanlarında olacağıq”.
Xatırladaq ki, mayın 14-də keçirilən seçkilərdə prezidentliyə namizədlərdən heç biri 50 faizdən çox səs toplamadığı üçün səsvermənin ikinci turu mayın 28-də keçiriləcək.
ABŞ RUSİYA VƏ İRANa QARŞI MÜBARİZƏ ÜZRƏ QANUN LAYİHƏSİ HAZIRLAYIR
ABŞ senatoru Ted Kruz sanksiyalar tətbiq etməklə Rusiya və İran arasında hərbi-texniki əməkdaşlığa qarşı mübarizəni nəzərdə tutan qanun layihəsini təqdim etmək niyyətindədir. “Trend” agentliyinin verdiyi xəbərə görə, bunu respublikaçı senator Vaşinqtonun Hudzon Universitetində çıxışı zamanı bildirib.
“Rusiya ilə İran arasında əməkdaşlıq genişmiqyaslıdır və dərinləşir. Bayden administrasiyası isə buna qarşı durmağa belə çalışmır. Buna görə də mən Bayden administrasiyasını bir sıra cəbhələrdə İran və Rusiya arasında əməkdaşlığa qarşı çıxmağa məcbur edən qanun layihəsinin dəstəklənməsi üçün çalışıram”, - deyə Ted Kruz qeyd edib.
Senatorun açıqlamasına əsasən, qanunvericilik təşəbbüsü Rusiya və İranın hərbi-texniki əməkdaşlıqda istifadə etdiyi “banklara, neft tankerlərinə, təyyarələrə, hava limanlarına, gəmilərə və gəmiqayırma zavodlarına qarşı sanksiyaların tətbiqini” nəzərdə tutur.
Bundan əlavə, senatorun qeyd etdiyi kimi, bu qanun layihəsi “İranın xaricdəki milyardlarla dollarını bloklamaq” məqsədi daşıyır. Ted Kruzun sözlərinə görə, məsələ ondadır ki, “atomla bağlı daha bir sövdələşmə” bağlanacağı təqdirdə Tehran bu vəsaitlərə çıxış əldə edə bilməyəcək.
UKRAYNA HƏRBÇİLƏRİ BAXMUTDA DAHA BİR NEÇƏ KİLOMETR İRƏLİLƏYİB
“Bu gün biz Donetsk vilayətinin Baxmut şəhərində 1700 metr irəliləmişik”. “Report” agentliyinin məlumatına görə, bunu Ukrayna Silahlı Qüvvələrinin Şərq Qrupunun nümayəndəsi Sergey Çerevatı bildirib.
Eyni zamanda, Sergey Çerevatının sözlərinə görə, Ukrayna Silahlı Qüvvələri şəxsi heyət və sursat baxımından qarşı tərəfdən üstün olmasa da, cinahlarla irəliləməyə davam edir. O, həmçinin əlavə edib ki, Baxmut hərbi əməliyyatların episentri olaraq qalır.
Bununla yanaşı, Sergey Çerevatı qeyd edib ki, Rusiya Silahlı Qüvvələri gün ərzində Baxmut istiqamətində 77 dəfə artilleriya, 6 dəfə isə təyyarə ilə zərbələr endirib. “Döyüşlərdə qarşı tərəfin 130 hərbçisi məhv edilib, 145-i yaralanıb, 4-ü isə əsir götürülüb”, - deyə ukraynalı rəsmi əlavə edib.
Xatırladaq ki, bu ərəfədə ABŞ-ın Müharibə Araşdırmaları İnstitutu bildirib ki, Rusiya artıq Baxmutda üstünlüyü itirib.
11 MİLYONA YAXIN BRİTANİYALI KREDİTLƏRİNİ ÖDƏMƏKDƏ ÇƏTİNLİK ÇƏKİR
Kreditlərin və kommunal ödənişlərin ödənilməsində problem yaşayan britaniyalıların sayı son bir ildə 40 faiz artaraq 2022-ci ilin may ayındakı 7,8 milyondan 10,9 milyon nəfərə çatıb. “Trend” agentliyinin verdiyi xəbərə görə, bu barədə Böyük Britaniyanın Maliyyə Bazarlarında Davranış Normasına Nəzarət Təşkilatının hesabatında qeyd olunur.
Eyni zamanda, tənzimləyicinin məlumatına görə, Böyük Britaniyada təxminən 5,6 milyon insan son altı ayın ən azı üçündə kommunal ödənişlər və ya kredit ödənişlərini gecikdirib. Həmçinin il ərzində onların sayı 1,4 milyon nəfər artıb.
Verilən xəbərə görə, ölkənin yetkin əhalisinin təxminən yarısı və ya təxminən 28,4 milyon insan bu ilin yanvarında altı ay daha əvvəl ilə müqayisədə yaşayış dəyərinin artması ilə bağlı daha çox narahatlıq və ya stress hiss edib.
Məlumat üçün qeyd edək ki, Böyük Britaniyada aprel ayında inflyasiya 10,1 faiz təşkil edib. İngiltərə Bankı cari il üçün istehlak qiymətlərinin artım tempinin 5,1 faiz təşkil edəcəyini, 2024-cü ilin sonunda isə 2,3 faizə qədər azalacağını proqnozlaşdırır.
COZEF BAYDEN YAPONİYADAN ÜZR İSTƏMƏK NİYYƏTİNDƏ DEYİL
ABŞ prezidenti Cozef Bayden 1945-ci ildə Xirosima və Naqasakiyə atom bombalarının atılmasına görə Yaponiyadan üzr istəməyəcək. “Teleqraf.com”un verdiyi xəbərə görə, bu barədə ABŞ prezidentinin müşaviri Ceyk Sallivan məlumat yayıb.
Jurnalistlərin Baydenin bu olaya ABŞ-ın adından üzr istəmək niyyətində olub-olmadığını soruşduqda, Sallivan belə cavab verib: “Prezident Sülh Memorialında (Xirosimada) açıqlama verməyəcək”.
Müşavirin sözlərinə görə, ABŞ lideri “G7” ölkələrinin digər liderləri ilə birlikdə memoriala gül dəstələri qoyacaq və digər tədbirlərdə iştirak edəcək.
Qeyd edək ki, bu il “G7”yə Yaponiya sədrlik edir. Məlumata görə, liderlərin sammiti mayın 19-dan 21-dək davam edəcək.
BMT-DƏN BEYNƏLXALQ İCTİMAİYYƏTƏ ÇAĞIRIŞ
BMT Afrikanın Sahel bölgəsindəki silahlılarla mübarizə aparmaq və bölgənin təhlükəsizliyini təmin etmək üçün beynəlxalq dəstəyə ehtiyac olduğu ilə əlaqədar çağırış edib. Bu barədə “TRT” telekanalının yaydığı məlumatda qeyd olunur.
BMT baş katibinin Afrika üzrə köməkçisi Marta Pobe Təhlükəsizlik Şurasındakı çıxışında Sahel bölgəsində silahlı qrupların hücumlarının artdığına diqqət çəkərək, bölgəyə daha çox dəstəyin verilməsinin əhəmiyyətini vurğulayıb.
Eyni zamanda, Marta Pobe Burkina Faso, Çad, Mavritaniya və Nigerin silahlı təşkilatlara qarşı birgə hərəkət etdiyini, lakin yanvar ayından bu yana effektiv hərbi əməliyyat həyata keçirə bilmədiklərini diqqətə çatdırıb.
Fransanın Mali ilə yaşanan böhran səbəbindən qoşunlarını Nigerə yerləşdirdiyini qeyd edən Marta Pobe bölgəyə rus muzdlularının yerləşdirildiyini də bəyan edib.
Bununla yanaşı, Marta Pobe Burkina Faso, Niger və Malinin təhlükəsizlik sahəsində əməkdaşlıq etdiklərini, lakin sərhəd bölgələrində təhlükəsizliyin təmin edilməsinin mümkün olmadığını əlavə edib.
PLANETİMİZDƏ HAVANIN TEMPERATURU GETDİKCƏ İSTİLƏŞƏCƏK
BMT-yə bağlı Ümumdünya Meteorologiya Qurumu 2023-2027-ci illərdə dünyada rekord hava istiliyinin müşahidə olunacağını ilə bağlı hesabat dərc edib. “TRT” telekanalının xəbərinə görə, hesabata əsasən, istixana qazı emissiyaları və “El Nino” hava hadisəsi temperaturu daha da artırıb.
Məlumata görə, 2023-2027-ci illər arasında ən azı bir ilin ən isti il olacağı və 5 ilin hamısının qlobal hava istiliyinin rekord səviyyələrə çatdığı bir dövr olacağı ehtimalı 98 faiz qeyd edilib.
Bildirilir ki, sözügedən dövrdə 66 faiz ehtimalla illik ortalama havanın istiliyi ən azı 1,5 dərəcə yüksək olacaq.
Eyni zamanda, havanın temperaturu dünyanın müxtəlif yerlərində yağan yağışlara təsir göstərəcəyi üçün yağıntılar regional miqyasda artacaq və ya azalacaq.
Bununla yanaşı, istixana qazı emissiyaları okeanların istiləşməsinə və turşulaşmasına, buzlaqların əriməsinə, dəniz səviyyəsinin qalxmasına və ekstremal hava hadisələrinə də səbəb ola bilər.
Hazırladı:
Vamiq ABBASOV,
“Respublika”.