Naxçıvan Muxtar Respublikasında yeni hərbi hissələrin yaradılması və mövcud infrastrukturunun müasirləşdirilməsi istiqamətində mühüm işlər görülür, böyük əhəmiyyətə malik layihələr icra olunur. Şanlı ordumuzun zəfərlərindən biri olan Günnüt əməliyyatı da məhz görülən bu işlərin nəticəsidir.
2018-ci ilin may ayında Naxçıvan Muxtar Respublikasının və Şərur rayonunun Günnüt kəndi daxil olmaqla 11 min hektardan artıq ərazisi düşməndən azad edilərək Ordumuzun müdafiə zolağının ön xəttinin dövlət sərhədi boyu əlverişli mövqelərə irəli çəkilməsinə nail olunmuşdur. Rəşadətli Azərbaycan ordusu dəniz səviyyəsindən 1683 metr hündürlükdə yerləşən Qızılqaya yüksəkliyini işğaldan azad etməklə, strateji əhəmiyyət daşıyan İrəvan-Yeğeqnadzor-Gorus-Laçın-Xankəndi avtomobil yoluna nəzarəti ələ keçirmişdir. Azad edilən ərazilərin Ümumqoşun Ordu bölmələrinin tam vizual nəzarəti altına keçməsi mühüm hərbi üstünlükdür. Qeyd etmək lazımdır ki, bu ərazilər həm də 44 günlük Vətən müharibəsi zamanı ermənilərin hərəkətlərini müşahidə edərək lazımi tədbirlər görməyə də imkan vermişdir.
Aprel döyüşlərindən iki il sonra, mayın 20-si gecə vaxtı xüsusi hazırlıqlı bölmələrimiz döyüş tapşırığını yerinə yetirərək müxtəlif istiqamətlərdə fəaliyyətə başladılar. Sol və sağ istiqamətdə irəliləyərək növbəti yüksəkliyi və Qızılqaya dağını nəzarətə götürdülər. Müzəffər ordumuz əvvəlcədən əməliyyat planı hazırladığı üçün xain düşmən geri oturduldu. Dəqiqliklə planlaşdırılmış əməliyyatın uğurlu icrası bölmələrimizin ilkin mövqelərindən daha əlverişli ərazilərdə yerləşməsinə imkan yaratdı. Mühəndis-istehkam bölmələri tərəfindən azad olunmuş ərazilərdə minalardan təmizləmə işləri aparıldı. Belə ki, 2000-dən çox piyada və tank əleyhinə mina aşkarlanaraq zərərsizləşdirildi. Naxçıvan Muxtar Respublikasının ərazisində Ermənistan-Azərbaycan qoşunlarının təmas xəttinə yaxın kəndlərdə yaşayan dinc əhalinin təhlükəsizliyi təmin edildi. Belə ki, Ermənistanın hərbi təxribatları yaxın ərazilərdə yaşayan əhalinin təhlükəsizliyini ciddi şəkildə təhdid edirdi. Ərazinin etibarlı müdafiəsi, Ordumuzun manevr qabiliyyətinin yaxşılaşdırılması və təminat-təxliyə məqsədilə 50 kilometrdən artıq yeni yol çəkildi, 60 kilometrdən çox yararsız yollar isə bərpa edildi. Strateji əhəmiyyətli Arpaçay Su Dəryaçasının taktiki cəhətdən etibarlı mühafizəsinin təşkili üçün ətrafdakı hakim yüksəkliklərdə yeni müdafiə mövqeləri quruldu. Düşmən tapdağından azad edilən mövqelərimizin müdafiəsi ordumuz tərəfindən təmin edildi.
Azərbaycanda əsl xalq-dövlət birliyi Vətən müharibəsində özünü bir daha sübut etmişdir. Dövlətin və xalqın dəstəyini üzərində hiss edən ordumuzun özünəinamı daha da artır və torpaqlarımız etibarlı şəkildə müdafiə olunur. Məhz bunun nəticəsidir ki, Günnüt əməliyyatından sonra azad olunmuş mövqelərdə yerli sakinlər rahat və təhlükəsiz hərəkət edə bilir. Bu birliyi qısqanan, döyüş meydanında məğlub edilən düşmən isə hələ də sülh prosesinə kölgə salmağa davam edir.
Xain düşmənin təxribatlarının qarşısının alınması üçün ilk şiddətli döyüşlər kimi 2016-cı ilin Aprel döyüşləri baş verdi və sözügedən əməliyyat zamanı Azərbaycan ordusu tərəfindən düşmənə layiqli cavab verildi, Tərtər rayonunun Talış kəndi ətrafındakı yüksəkliklər və Seysulan kəndi, rayonun Lələtəpə yüksəkliyi və Cocuq Mərcanlı, Goranboy rayonunun Gülüstan kəndləri düşməndən azad olundu. Döyüşlər Azərbaycan Silahlı Qüvvələrinin tam qələbəsi ilə başa çatdı, aprelin 5-də hər iki tərəfin razılığı və beynəlxalq qurumların müşahidəsi ilə yenidən atəşkəs müqaviləsi imzalandı. 2016-cı ildə uyğun zaman və məkan amilini düzgün dəyərləndirən Azərbaycan Ordusu ermənilərin təxribatı zamanı uğurlu döyüş əməliyyatı həyata keçirdi. Dördgünlük döyüşlərin növbəti mərhələsi isə Naxçıvanda uğurla davam etdirildi. Günnüt əməliyyatı Vətən müharibəsindən əvvəl düşmənə edilən ciddi xəbərdarlıq idi.
Nurlan ABDALOV,
"Respublika".