ƏRDOĞAN: TÜRKİYƏNİN RUSİYA İLƏ BAĞLI MÖVQEYİ DƏYİŞMƏyƏcƏk

“Türkiyənin anti-Rusiya sanksiyaları ilə bağlı mövqeyi dəyişməyəcək”. “Trend” agentliyinin verdiyi xəbərə görə, bunu Türkiyə prezidenti Rəcəb Tayyib Ərdoğan bəyan edib.

Eyni zamanda, dövlət başçısı vurğulayıb ki, Türkiyə Rusiya Federasiyasına qarşı sanksiyaların tətbiqi ilə bağlı Qərbin tələblərini yerinə yetirmək fikrində deyil.

Rəcəb Tayyib Ərdoğanın sözlərinə görə, rəsmi Ankaranın anti-Rusiya sanksiyalarına qoşulması məqsədəuyğun deyil, çünki Rusiya Türkiyənin ən böyük ticarət-iqtisadi tərəfdaşıdır.

Bununla yanaşı, Ərdoğan qeyd edib ki, Türkiyə ABŞ və Qərb ölkələri, eləcə də Rusiya Federasiyası və Çinlə münasibətlərini bərabər səviyyədə saxlamağa çalışır.

İRANDA ETİRAZ AKSİYALARI YENİDƏN ALOVLANIB

İranda rejim əleyhinə etirazlar yenidən alovlanıb. “Report” agentliyinin verdiyi xəbərə görə, bu barədə ABŞ-ın Müharibə Araşdırmalaları İnstitutunun məlumatında qeyd olunur.

Açıqlamaya əsasən, bunun başlıca səbəbi ölkədə edamların sayının artmasıdır. “Mayın 19-da rejim əleyhinə 10 etiraz aksiyası keçirilib. Bu, son bir həftə ərzində rekord göstəricidir. Həmçinin cümə günü 3 nəfər edam edilib”, - deyə ABŞ-ın Müharibə Araşdırmalaları İnstitutu vurğulayıb.

Eyni zamanda, Qərb analitiklərinin fikrincə, edamlar rejim əleyhinə əhvali-ruhiyyəni ciddi şəkildə gücləndirməyə davam edəcək.

Qeyd edək ki, fevralın 15-dən İranda tələbə qızların kütləvi zəhərlənməsi halları geniş yayılıb. Bu səbəbdən tələbələrin valideynləri də mütamadi olaraq etirazlar keçirir.

Xatrıladaq ki, İranda etiraz aksiyaları ötən il sentyabrın 17-də 22 yaşlı Məhsa Əmininin işgəncə nəticəsində öldürülməsindən sonra başlayıb.

AĞ EV: VAŞİNQTONDA  DÖVLƏT BORCU ÜZRƏ CİDDİ FİKİR AYRILIĞI MÖVCUDDUR

Respublikaçılar və Vaşinqton administrasiyasının rəsmiləri arasında ABŞ-da defoltun qarşısını almaq üçün məsləhətləşmələrdə ciddi fikir ayrılığı qalmaqdadır. “Trend” agentliyinin verdiyi xəbərə görə, bunu mayın 20-də Ağ Evin mətbuat katibi Katin Jan-Pyer “G7” liderlərinin sammitinin keçirildiyi Hirosimada brifinq zamanı bəyan edib.

“Şübhə yoxdur ki, aramızda ciddi fikir ayrılıqları mövcuddur. Bu dialoq olduqca çətin olacaq və biz bunun fərqindəyik”, - deyə mətbuat katibi vurğulayıb.

Katin Jan-Pyer həmçinin qeyd edib ki, ABŞ prezidenti Cozef Baydenin köməkçiləri ikipartiyalı həllə nail olmaq üçün çalışmağa davam edəcəklər.

Eyni zamanda, mətbuat katibinin sözlərinə görə, Cozef Bayden gündəlik olaraq məsləhətləşmələrin gedişi barədə məlumatlandırılır.

Yanvarda ABŞ qanunla təyin edilən 31,4 trilyon dollarlıq borc limitini keçib, bundan sonra ölkənin Maliyyə Nazirliyi maliyyə əməliyyatlarını davam etdirmək üçün təcili tədbirlər görməyə məcbur olub. ABŞ administrasiyası son aylarda Konqresi borc limitini artırmağa çağırır.

KREML ALMAZ TİCARƏTİ İLƏ BAĞLI Aİ-NİN QƏRARINA MÜNASİBƏT BİLDİRİB

“Qlobal bazar alternativ istiqamətlərlə zəngindir”. “Sputnik” informasiya agentliyinin verdiyi xəbərə görə, bunu Rusiya prezidentinin sözçüsü Dmitri Peskov jurnalistlərə müsahibəsində Aİ-nin Rusiyadan almaz ticarətini məhdudlaşdırmaq niyyətini şərh edərkən bildirib.

“Qərarları gözləyək. Praktika göstərir ki, digər mallar və məhsullar üçün harada alışı dayandırsalar, başqa yerdən almağa başlayırlar. Burada boşluq yoxdur, dünya bazarı mobildir, alternativ istiqamətlərlə zəngindir”, - deyə Kremlin mətbuat katibi vurğulayıb.

Qeyd edək ki, Avropa Şurasının prezidenti Şarl Mişel “G7” sammiti öncəsi Hirosimada keçirilən brifinqdə bildirib ki, Avropa İttifaqı Rusiya almazlarının ticarətini məhdudlaşdırmağa çalışacaq.

Eyni zamanda, bir müddət öncə Böyük Britaniyanın baş naziri Rişi Sunak Rusiyadan almaz, mis, nikel və alüminium idxalına qadağa qoyduğunu açıqlamışdı.

“G7” LİDERLƏRİ YEKUN KOMMÜNİKE QƏBUL EDİBLƏR

“Böyük Yeddilik” (G7) ölkələrinin liderləri Hirosimada keçirilən sammitin bitməsinə bir gün qalmış yekun kommünikeni qəbul ediblər. “Report” agentliyinin verdiyi xəbərə görə, sənəddə onlar Ukraynanı dəstəkləməyə davam edəcəklərini təsdiqləyiblər.

Məlumata əsasən, “Böyük yeddilik” ölkələri Ukrayna ətrafındakı vəziyyətlə bağlı Rusiya və onun dəstəkçiləri üçün də tədbirlər görəcəklər.

Eyni zamanda, “G7” liderləri Çinlə konstruktiv və sabit münasibətlər qurmağa hazır olduqlarını, Tayvan boğazında sabitliyin vacibliyini bir daha təsdiqlədiklərini və “vahid Çin” siyasətinə sadiq olduqlarını bildiriblər.

Bununla yanaşı, sammit iştirakçıları nüvə silahı olmayan dünyaya və kimyəvi, eləcə də bioloji silahlara dair konvensiyaların effektiv şəkildə həyata keçirilməsinə çağırıblar.

İSRAİL XİN: ƏR-RİYADLA MÜNASİBƏTLƏR GEC-TEZ NORMALLAŞACAQ

İran və Səudiyyə Ərəbistanı arasında əlaqələrin bərpası İsraillə Səudiyyə Ərəbistanı arasında münasibətlərin normallaşması perspektivlərinə mane olmayacaq, münasibətlər gec-tez normallaşacaq. “Trend” agentliyinin verdiyi xəbərə görə, bunu İsrailin xarici işlər naziri Eli Koen “The Jerusalem Post” qəzetinə müsahibəsində bəyan edib.

Qəzet qeyd edib ki, İsrailin baş naziri Benyamin Netanyahu Səudiyyə Ərəbistanı ilə münasibətlərin normallaşdırılmasını əsas prioritet hesab edir. Bu prosesin perspektivlərindən danışan Eli Koen, gec-tez bunun baş verəcəyinə əminliyini ifadə edib.

“Məsələ bunun baş verib-verməyəcəyi deyil, nə vaxt olacağıdır. Səudiyyə Ərəbistanı ilə eyni maraqlarımız var”, - deyə XİN rəhbəri əlavə edib.

Eyni zamanda, Eli Koenin fikrincə, Ər-Riyad və Tehran arasında münasibətlərin bərpası İsrail-Səudiyyə Ərəbistanı əlaqələrinin qurulmasına mane olmamalıdır. “İran Səudiyyə Ərəbistanının bir nömrəli düşmənidir. Səudiyyə Ərəbistanı onların nüvə silahına sahib olmasının qarşısını almaq üçün hər şeyi edəcək. İranla razılaşma səudiyyəlilərin amerikalılara İranın nüvə ambisiyalarının qarşısını almaqda daha fəal iştirak etmək üçün siqnal göndərmək üçün bir yol idi”, - deyə E.Koen vurğulayıb.

BURKİNO-FASODA SİLAHLILAR 20 DİNC SAKİNİ QƏTLƏ YETİRİB

Burkino-Fasonun şimalında silahlıların hücumun nəticəsində onlarca insan qətlə yetirilib. “Report” agentliyinin verdiyi xəbərə görə, bu barədə yerli mətbuat məlumat yayıb.

Bildirilir ki, naməlum silahlılar Sahel bölgəsindəki Kaonqo və Tondobi kəndlərinə hücum ediblər. Hücum zamanı 20 nəfər həyatını itirib. Hadisəyə görə məsuliyyəti heç bir qruplaşma üzərinə götürməyib.

Məlumat üçün qeyd edək ki, qonşu Malinin “Əl-Qaidə” və İŞİD-ə bağlı terror qruplaşmaları 2015-ci ildən Burkino-Fasonun şimalında və şərqində tez-tez hücumlar təşkil edir.

Rəsmi açıqlamalara görə, 2015-ci ildən 2021-ci ilin dekabrına qədərki hücumlarda təhlükəsizlik qüvvələrinin 600 əməkdaşı da daxil olmaqla, 2 min nəfər insan həyatını itirib, daha 2 milyon nəfər evlərini tərk etmək məcburiyyətində qalıb.

Hazırladı:

Vamiq ABBASOV,

“Respublika”.