İkinci Qarabağ müharibəsində Vətən torpaqlarının azadlığı uğrunda son damla qanına qədər döyüşərək şəhidlik zirvəsinə ucalan qəhrəmanlardan biri də Lerik şəhərində anadan olan Elgün Tahir oğlu Mövlanovdur. Lerikin qartal balası sağ olsaydı, aprelin 2-də ömrünün 21-ci ilini qeyd edərdi.
Elgün bu işıqlı dünyada az yaşasa da, bir tarix yazdı. Məhz buna görə də igid Vətən oğlu cismən aramızda olmasa da, mənən milyonların ürəyində yaşayır. Lerik camaatı Elgünün doğum günündə qəhrəman Vətən sevdalının uyuduğu müqəddəs yeri ziyarət etdi, ehtiram əlaməti olaraq məzarına təzə gül-çiçəkdən çələng düzdü.
Mərasimdə Elgündən böyük qürurla, iftixarla danışıldı. Bildirildi ki, Elgün 44 günlük haqq savaşımızda əzəli, əbədi yurd yerimiz Qarabağın azadlığı naminə əsl qəhrəmanlıq göstərib. Nəsillərə örnək olan qısa ömrü torpağına, el-obasına sonsuz məhəbbət mücəssəməsinə döndü.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamına əsasən Elgün Tahir oğlu Mövlanov ölümündən sonra "Vətən uğrunda" medalı ilə təltif edilib.
Zəfər ORUCOĞLU.