PRİQOJİN HƏRBİ HƏRƏKƏTLƏRİ DAYANDIRMAQ HAQDA QƏRAR QƏBUL EDİB
“Vaqner” xüsusi hərbi şirkətin başçısı Yevgeni Priqojin Belarus prezidenti Aleksandr Lukaşenkonun hərbi hərəkətləri dayandırmaq və gərginliyi azaltmaqla bağlı təklifini qəbul edib. “Report” agentliyinin verdiyi xəbərə görə, bu barədə Belarus mətbuatı məlumat yayıb.
Yevgeni Priqojin açıqlamasında deyib: “Moskvaya 200 kilometr məsafəyə qədər gəldik və bir əsgərimizin belə qanı axmadı. Lakin Bundan sonra qan tökülə bilər. Biz isə bunu istəmirik. “Vaqner” kolonunu geri çevirib düşərgəmizə qayıdırıq”.
Bundan əvvəl Lukaşenkonun Yevgeni Priqojinlə danışıqlar apardığı barədə məlumat yayılıb. Məlumatı Belarus prezidentinin mətbuat xidməti də təsdiqləyib. Bildirilir ki, vəziyyətin həlli üçün “Vaqner” döyüşçüləri üçün təhlükəsizlik zəmanəti ilə sərfəli və məqbul variant hazırlanıb.
Qeyd olunur ki, Lukaşenko ilə Priqojin arasında danışıqlar günboyu davam edib.
Eyni zamanda xəbər verilir ki, “Vaqner” qruplaşmasının iyunun 24-də həyata keçirdiyi əməliyyatı nəticəsində Rusiya Müdafiə Nazirliyinə məxsus 6 helikopter və bir “AN-26” tipli hərbi nəqliyyat təyyarəsi vurulub.
MİT “İNTERPOL”UN QIRMIZI SİYAHISINDA OLAN TERRORÇUNU MƏHV EDİB
Türkiyə Milli Kəşfiyyat Təşkilatı (MİT) “İnterpol” tərəfindən qırmızı kateqoriyada axtarılan PKK/KCK terror təşkilatının “icra məclis üzvü” Əbdürrəhman Çadırcını Suriyanın şimalındakı Kamışlıda zərərsizləşdirib. Bu barədə “TRT” telekanalı məlumat yayıb.
Verilən xəbərə görə, PKK/KCK-nın “icra şurası”nda olan, “Esad Faraşin”, Avropada məsul səviyyədə fəaliyyət göstərdiyi zaman isə “Assad Europe” kod adlarından istifadə edən terrorçu MİT-in də hədəf siyahısında idi.
Axtarışda olan terrorçular siyahısında qırmızı kateqoriyada olan və “İnterpol” tərəfindən təqib edilən Ə.Çadırcının Suriyada olduğunu öyrənən MİT bu ölkənin şimalındakı Kamışlı şəhərində araşdırma aparıb. Terrorçu MİT-in təşkil etdiyi əməliyyatla zərərsizləşdirilib.
Qeyd edilir ki, Türkiyə Milli Müdafiə Nazirliyinin terrorçulara qarşı əməliyyatları davam etdikcə PKK-dan qaçışlar davam edir. Nazirliyin sosial media hesabında paylaşılıb: “İraqın şimalındakı sığınacaqlarından qaçan daha 4 PKK terrorçusu Habur və Silopi sərhəd məntəqəmizdə təslim oldu. Terrorçuların yeganə çıxış yolu Türkiyə ədalətinə sığınmaqdır”.
GÜRCÜSTAN RUSİYA İLƏ SƏRHƏDİ BAĞLAMAYACAQ
Gürcüstan Rusiya ilə sərhədi bağlamaq niyyətində deyil. “Sputnik” informasiya agentliyinin məlumatına görə, bu barədə ölkənin Daxili İşlər Nazirliyinin yaydığı bəyanatda qeyd olunur.
“İctimaiyyətin artan marağını nəzərə alaraq bildiririk ki, Daryal sərhəd-keçid məntəqəsində vəziyyət sakitdir, keçid məntəqəsi həmişəki rejimdə fəaliyyət göstərir”, - deyə DİN-in məlumatında vurğulanır.
Bununla yanaşı, Daxili İşlər Nazirliyindən verilən açıqlamaya əsasən, heç bir istiqamətə sərnişin və ya avtonəqliyyat vasitələrinin axını müşahidə olunmur.
Qeyd edək ki, iyunun 24- də Gürcüstan prezidenti Salome Zurabişvili Rusiyada baş verən hadisələrlə əlaqədar ölkə sərhədlərinə nəzarəti gücləndirməyə çağırıb. Salome Zurabişvili baş nazir İrakli Qaribaşviliyə təcili olaraq Təhlükəsizlik Şurasının iclasını çağırmağı tapşırıb.
ABŞ KƏŞFİYYATI: “COVID-19” BİOLOJİ SİLAH KİMİ HAZIRLANMAYIB
ABŞ kəşfiyyatında Çinin Uhan Virusologiya İnstitutunda baş verən hadisənin koronavirus pandemiyasına səbəb olduğuna dair heç bir sübut yoxdur. Bu barədə Amerika kəşfiyyat xidmətlərinin ABŞ Konqresinə göndərilmiş hesabatında bildirilir.
Məlumata görə, sənədin məxfilikdən çıxarılan variantı ölkənin milli kəşfiyyat direktorunun ofisi tərəfindən ixtisarlarla açıqlanıb.
Həmçinin sənəddə qeyd olunur ki, ABŞ kəşfiyyat cəmiyyətinin bütün departamentlərinin qiymətləndirməsinə əsasən “SARS-CoV-2” virusu bioloji silah kimi hazırlanmayıb.
Bundan əlavə, qiymətləndirmələrə görə, bir sıra Uhan Virusologiya İnstitutunun alimləri ənənəvi laboratoriya üsullarından istifadə edərək koronavirusların genetik formalarını öyrəniblər.
Açıqlamada bildirilir ki, ABŞ kəşfiyyatının bu təcrübələrdə “SARS-COV-2”nin istifadəsinə dair heç bir dəlil yoxdur.
BLİNKEN “G7” XARİCİ İŞLƏR NAZİRLƏRİ İLƏ RUSİYADAKI VƏZİYYƏTİ MÜZAKİRƏ EDİB
ABŞ dövlət katibi Antoni Blinken Rusiyadakı vəziyyəti “G7” xarici işlər nazirləri və Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Josep Borrel ilə telefonla müzakirə edib. “Report” agentliyinin verdiyi xəbərə görə, bu barədə ABŞ Dövlət Departamentinin sözçüsü Metyu Miller danışıqların yekunlarına dair yazılı açıqlama verib.
“Dövlət katibi Blinken Rusiyadakı mövcud vəziyyəti müzakirə etmək üçün iyunun 24-də Kanada, Fransa, Almaniya, İtaliya, Yaponiya, Böyük Britaniya və Aİ-nin xarici işlər və təhlükəsizlik siyasəti üzrə ali nümayəndəsi ilə telefon danışıqları aparıb”, - deyə diplomat vurğulayıb.
Eyni zamanda, Metyu Miller qeyd edib ki, hadisələrin gedişi daha da inkişaf etdikcə ABŞ müttəfiqləri və tərəfdaşları ilə sıx koordinasiyanı davam etdirəcək.
Bununla yanaşı, Jozep Borrel Aİ-nin Rusiyadakı hadisələrlə əlaqədar böhranlara reaksiya mərkəzini aktivləşdirdiyini açıqlayıb: “Aİ Xarici Əlaqələr Şurasının bazar ertəsi planlaşdırılan iclasından əvvəl Aİ daxilində fəaliyyətləri əlaqələndirirəm və böhranlara reaksiya mərkəzinin işini aktivləşdirmişəm”.
TÜRKİYƏ VƏ ÖZBƏKİSTAN HƏRBİ ƏMƏKDAŞLIĞI YENİ SƏVİYYƏYƏ YÜKSƏLDİR
Türkiyə və Özbəkistanın Müdafiə nazirlikləri hərbi-texniki əməkdaşlığı yeni səviyyəyə yüksəltmək niyyətindədirlər. “Sputnik” informasiya agentliyinin verdiyi xəbərə görə, bu barədə Özbəkistan Müdafiə Nazirliyinin mətbuat xidməti məlumat yayıb.
Mətbuat xidmətinin açıqlamasına görə, Özbəkistan və Türkiyənin müdafiə nazirləri general-leytenant Bahodir Kurbanov və ordu generalı Yaşar Gülər telefon danışığında ikitərəfli əməkdaşlıq məsələlərini müzakirə ediblər.
“Tərəflər hərbi-texniki əməkdaşlığı yeni səviyyəyə qaldırmaq, döyüş hazırlığı və hərbi təhsil sahəsində əlaqələrin daha da intensivləşdirilməsi barədə razılığa gəliblər”, - deyə Müdafiə Nazirliyinin saytında yerləşdirilən məlumatda qeyd olunur.
Eyni zamanda, nazirliyin mətbuat xidməti əlavə edib ki, Kurbanov türkiyəli həmkarını Özbəkistana rəsmi səfərə dəvət edib.
ALMANİYA hökumƏtindƏN İXTİSASLI İŞÇİLƏRLƏ BAĞLI YENİ QANUN LAYİHƏSİ
Almaniya Bundestaqı Avropa İttifaqı xaricindən olan ixtisaslı işçilərin ölkəyə girişini asanlaşdıracaq yeni qanun layihəsinin lehinə səs verib. Bu barədə “Report” agentliyi Almaniya mətbuatına istinadən məlumat yayıb.
Bildirilir ki, əsasən hakim koalisiyadan - Almaniya Sosial Demokrat Partiyası, Yaşıllar və Azad Demokrat Partiyasından olan 388 deputat qanun layihəsinin “lehinə” səs verib. Layihənin əleyhinə 234 deputat səs verib, 31 deputat isə bitərəf qalıb.
Xüsusilə, yeni qanun ixtisaslı mütəxəssislərə hələ işəgötürənlə müqaviləsi olmasa belə, işə daxil olmaq hüququ verir. Bu halda onlar alman dilini, diplomunu və iş təcrübəsini təsdiqləməlidirlər.
Eyni zamanda, iş vizası üçün müraciət edənin qohumlarının artıq Almaniyada yaşaması ölkəyə daxil olma şansını artıracaq. Həmçinin əcnəbilərə iş axtarmaq üçün bir il vaxt da veriləcək.
Almaniyanın daxili işlər naziri Nensi Fezer sənədi miqrasiya sahəsində ən mükəmməl qanun layihəsi adlandırıb.
Hazırladı:
Vamiq ABBASOV,
“Respublika”.