Vətən müharibəsində fəal iştirak edən şəhid Abdullayev Həmdulla Aslan oğlunun doğum günü münasibətilə İmişli Rayon İcra Hakimiyyətinin başçısı Elçin Rzayev, Aparatın məsul işçiləri və şəhidin yaxınları tərəfindən şəhidin dəfn olunduğu İmişlinin Bəhrəmtəpə qəsəbəsindəki qəbiristanlığında məzarı ziyarət edilib, məzarı üstünə gül dəstələri düzülüb, ruhuna dualar oxunub, əziz xatirəsi ehtiramla yad edildi. Elçin Rzayev şəhidin ata ocağını ziyarət etdi. Rayon rəhbəri bildirdi ki, ölkə başçısı Prezident İlham Əliyevin göstəriş və sərəncamlarına əsasən Vətən müharibəsində şəhid olmuş hərbçilərimizin xatirəsi daim uca tutulur, onların ailə üzvləri dövlətimizin qayğısı ilə əhatə olunur. Qeyd etdi ki, Azərbaycan Ordusunun qazandığı tarixi qələbədə payı olan Həmdulla Abdullayev kimi qəhrəman oğullarımızla hər birimiz fəxr etməliyik. Bu qələbəmizdə Azərbaycanın tarixi zəfərinin mənbəyi xalqımızın həmrəyliyi, Ali Baş Komandanın ətrafında sıx birləşən xalqımızın inamı, Azərbaycan Ordusunun məğlubedilməzliyi, hünəri və qətiyyəti idi.
Mərasimdə çıxış edənlər şəhid Həmdulla Abdullayevin şərəfli həyat yolundan və onun Qarabağ müharibəsində göstərdiyi qəhrəmanlıqlarından söz açdılar. Bildirdilər ki, Vətənimizin ərazi bütövlüyü uğrunda şəhid olan oğullarımız hər zaman xalqımızın qəlbində yaşayacaq.
Abdullayev Həmdulla Aslan oğlu 1994-cü il mart ayının 19-da İmişli rayonunun Bəhrəmtəpə qəsəbəsində anadan olub. Vətən müharibəsində ölkəmizin ərazi bütövlüyünün bərpası uğrunda gedən ağır döyüşlərdə iştirak edib. Noyabr ayının 7-də Şuşanın azadlığı uğrunda gedən ağır döyüşlərdə qəhrəmancasına şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Həmdulla Aslan oğlu Abdullayev ölümündən sonra “Vətən uğrunda”, “Cəsur döyüşçü” və “Xocavəndin azad olunmasına görə” medalları ilə təltif edilib.
Şəhidin ailə üzvləri göstərilən diqqət və qayğıya görə Azərbaycan Prezidenti İlham Əliyevə və Birinci vitse-prezident Mehriban xanım Əliyevaya minnətdarlıqlarını bildirdilər.
Ərəstun ABDULOV,
“Respublika”.