Bakıda "Sağlam həyat" günləri davam edir
İnkişaf və Sülh Naminə Beynəlxalq İdman Günü münasibətilə Gənclər və İdman Nazirliyinin təşkil etdiyi "Sağlam həyat" günləri davam edir. Aprelin 10-dək davam edəcək tədbirdə iştirakçılar 14 yaş qrupunda (6-8, 9-10, 11-12, 13-15, 16-17, 18-24, 25-29, 30-34, 35-39, 40-44, 45-49, 50-54, 55-59 və 60+ yaş), iki müxtəlif məkanda - Qış Parkında və Böyükşor Bulvarında quraşdırılan xüsusi zonalarda özlərini sınayırlar. Tədbir hər gün saat 10:00-dan 18:00-dək davam edir. Sağlam həyat tərzini təbliğ edən tədbirdə qaçış, yerindən uzunluğa tullanma, ağırlıqqaldırma, turnik, topatma, dayaqlı vəziyyətdən qolların bükülüb-açılması və qarın əzələlərinin möhkəmləndirilməsi ("jim" və "press") üzrə müvafiq normativləri yerinə yetirənlərə "qızıl", "gümüş" və "bürünc" stikeri olan sertifikatlar təqdim olunur.
Ölkə çempionatında finalçılar müəyyənləşib
Qadın voleybolçular arasında Azərbaycan çempionatında yarımfinalın son matçında "Abşeron" və "Murov" klubları üz-üzə gəliblər. Komandaların ilk iki oyununda tərəflərin hər biri qələbə qazandığından əlavə oyuna ehtiyac yaranıb. Həlledici görüşdə "Abşeron" klubu 25:16, 25:21 və 25:21 hesabları ilə oyunu öz xeyrinə yekunlaşdırıb və meydandan 3:0 hesablı qələbə ilə ayrılıb. Beləliklə, rəqibinə qalib gələn "Abşeron" finala vəsiqə qazanıb. Komandanın rəqibi "Azərreyl" olacaq. "Murov" isə bürünc medal uğrunda UNEC-ə qarşı yarışacaq.
Komandamız beynəlxalq Qran-Pridə mübarizə aparacaq
Azərbaycanın bədii gimnastika üzrə böyüklərdən ibarət qrup hərəkətləri komandası Fransanın Tiye şəhərində keçiriləcək 34-cü beynəlxalq Qran-Pridə iştirak edəcək. Ölkəmizi Güllü Ağalarzadə, Ləman Əlimuradova, Kamilla Əliyeva, Zeynəb Hümmətova, Yelizaveta Luzan, Darya Sorokinadan ibarət kollektiv və fərdi gimnast Zöhrə Ağamirova təmsil edəcəklər. Yarış aprelin 10-dək davam edəcək.
Gimnastlarımız dünya kuboku
yarışlarının finalına yüksəliblər
Akrobatika gimnastikası üzrə Azərbaycan milli komandasının üzvləri Belçikanın Antverpen şəhərində keçirilən dünya kuboku yarışlarında finala yüksəliblər. Ağasif Rəhimov və Raziyə Seyidlidən ibarət qarışıq cütlük, eləcə də Nəzrin Zeyniyeva, Zəhra Rəşidova və Anahita Bəşiridən ibarət qadın qrupu həlledici mərhələyə vəsiqə qazanıb.
Nərgiz İSMAYILOVA,
"Respublika".