Azərbaycan Moldova Respublikası ilə iqtisadi əməkdaşlığı, o cümlədən kənd təsərrüfatı əlaqələrini gücləndirir. Bununla əlaqədar Moldovanın Kənd Təsərrüfatının İnkişafı və Modernizasiyası Agentliyi ilə Azərbaycanın Kənd Təsərrüfatı Nazirliyinin Aqrar İnnovasiya Mərkəzi arasında kənd təsərrüfatı sahəsində müasir texnologiyaların transferi və davamlı təcrübə mübadiləsi barədə tərəfdaşlıq müqaviləsi imzalanıb. Sənədə əsasən tərəflər Azərbaycan və Moldovada aqrar sahədə rəqəmsallaşma, texnologiya və innovasiyaların tətbiqi ilə bağlı təcrübə mübadiləsi aparacaq, bu sahənin rəqabətqabiliyyətinin artırılması, bazarlarla davamlı əlaqələrin təmin edilməsi, kənd təsərrüfatı mütəxəssisləri arasında bilik və təcrübə mübadiləsinin aparılması istiqamətləri üzrə əməkdaşlıq edəcəklər.
Əməkdaşlıq çərçivəsində dövlət-özəl tərəfdaşlıq yolu ilə fermerlərə kənd təsərrüfatı texnologiyası xidmətlərinin çatdırılması, aqrar sektorun rəqəmsallaşdırılması, müasir texnologiyaların tətbiqi və iqlim dəyişikliyinin kənd təsərrüfatı sektoruna təsirlərinin azaldılması sahəsində təcrübələrin bölüşdürülməsi də nəzərdə tutulur.
Nazirliyin mətbuat xidməti bildirir ki, görüş zamanı hər iki tərəf əməkdaşlıqda maraqlı olduğunu bildirib, gələcək əməkdaşlığın perspektivləri ətrafında fikir mübadiləsi aparılıb.
Nəriman CAVADOV,
“Respublika”.