HULUSİ AKAR TÜRKİYƏ TƏYYARƏSİNƏ HÜCUMUN DETALLARINI AÇIQLAYIB

“Türkiyə vətəndaşlarını Sudandan təxliyə etmək üçün C-130 tipli təyyarələrimizdən biri paytaxt Xartumdakı aeroporta eniş edib. İkinci təyyarəmiz enişə hazırlananda atəşə tutulub”. “Report” agentliyinin məlumatına görə, bunu Türkiyənin milli müdafiə naziri Hulusi Akar bildirib.

Nazirin sözlərinə görə, buna rəğmən, təyyarə təhlükəsiz şəkildə eniş edib: “Təyyarəyə dəyən ziyan araşdırılır. Şəxsi heyət arasında itki və yaralı yoxdur. Mövcud vəziyyətə görə, logistika dəstəyi barədə qərar veriləcək”.

Eyni zamanda, Hulusi Akarın qeyd etdiyinə görə, təyyarələrdən biri artıq geri qayıdıb.

Hulusi Akar həmçinin əlavə edib ki, hadisələr diqqətlə izlənilir: “Məqsədimiz vətəndaşlarımızın problemsiz şəkildə təxliyə edilməsidir. Bu məsələdə müvafiq qurumlarla koordinasiyanı davam etdiririk. İlkin məlumata görə, təyyarədə ciddi fəsad yoxdur".

Qeyd edək ki, aprelin 28-də Sudanda təxliyə prosesini həyata keçirən Türkiyənin “C-130” təyyarəsi atəşə tutulub.

DONALD TRAMP: ABŞ YENİ BÖYÜK DEPRESSİYA İLƏ ÜZLƏŞƏ BİLƏR

Cozef Baydenin hazırkı administrasiyasının yürütdüyü siyasət nəticəsində ABŞ yeni Böyük Depressiya ilə üzləşə bilər. “Trend” agentliyinin verdiyi xəbərə görə, bunu ABŞ-ın keçmiş prezidenti Donald Tramp Nyu-Hempşirdə tərəfdarları qarşısında çıxışı zamanı bəyan edib.

Donald Tramp qeyd edib ki, 2024-cü il prezident seçkilərində qalib gəlsə, hasilatı artıraraq enerji qiymətlərinin aşağı düşməsinə nail olacaq.

Keçmiş prezident iddia edib ki, enerji qiymətləri düşərsə, digər qiymətlərdə də enmə müşahidə olunacaq. “Faiz dərəcəsini aşağı salıb ölkəmizi geri qaytaracağıq. Çünki indi getdiyimiz istiqamətə görə biz depressiya təhlükəsi ilə üz-üzəyik. 1929-cu il kimi depressiyaya doğru gedirik, lakin biz buna imkan verməyəcəyik”, - deyə Donald Tramp vurğulayıb.

Məlumat üçün qeyd edək ki, Böyük Depressiya 1929-cu ildə başlanmış və 1939-cu ilə qədər davam etmiş dünya iqtisadi böhranıdır.

RAFAEL QROSSİDƏN “AKKUYU” AES-i İLƏ BAĞLI AÇIQLAMA

Beynəlxalq Atom Enerjisi Agentliyinin (BAEA) baş direktoru Rafael Qrossi “Akkuyu” Atom Elektrik Stansiyasının  Türkiyə üçün uzun illər təmiz nüvə enerjisi istehsal edəcəyini bəyan edib. Bu barədə “TRT” telekanalı məlumat yayıb.

Baş direktor aprelin 27-də Türkiyə prezidenti Rəcəb Tayyib Ərdoğan və Rusiyanın dövlət başçısı Vladimir Putinin canlı bağlantı ilə qatıldığı “Akkuyu” AES-in birinci nüvə yanacağının yüklənməsi mərasimində Türkiyənin bu gün iqtisadi inkişafında yeni mərhələyə qədəm qoyduğunu və ölkənin nüvə enerjisini sülh yolu ilə qəbul etdiyini bildirib.

Rafael Qrossi qlobal istiləşmə və iqlim dəyişikliyi dövründə yaşadığımızı diqqətə çatdırıraq deyib: “Nüvə enerjisi təmiz enerji mənbəyi kimi bu gün ziyarət etdiyim bu qeyri-adi obyektdə çox mühüm inkişafları təmin edəcək və ölkənin elektrik enerjisinin 10 faizdən çoxunu təmin edəcək. Bu, ölkə üçün çox böyük uğurdur”.

“INTEL”də MALİYYƏ BÖHRANI DAVAM EDİR

ABŞ-ın texnologiya şirkəti olan “Intel” maliyyə cəhətdən çökməyə davam edir. “Trend” agentliyinin məlumatına görə, 2023-cü ilin ilk rübünün nəticələrini açıqlayan ən böyük çip istehsalçısı, səhm satışında illik 133 faiz azalma yaşadığını açıqlayıb.

Verilən xəbərə görə, “Intel”in gəliri ötən illə müqayisədə 36 faiz azalaraq 11,7 milyard dollara düşüb.

Bildirilir ki, şirkətin maliyyə çöküşünün bir neçə səbəbi var. Birincisi, şirkətin ən güclü istehsal xətti olan kompüter çiplərinin satışı arzuolunan səviyyədə deyil. Əvvəlki hesabat qlobal kompüter tədarükünün təxminən 30 faiz azaldığını göstərib.

Bununla yanaşı, masaüstü kompüter və noutbukları gücləndirən çiplərin istehsalı ilə məşğul olan departamentin gəlirləri illik müqayisədə 38 faiz azalaraq 5,8 milyard dollar gəlir əldə edib. Məlumat mərkəzi və süni intellektə əsaslanan server çipləri bölməsi isə 39 faiz azalaraq 3,7 milyard dollara düşüb.

ABŞ-dan “SEPAH” VƏ FTX-yə QARŞI SANKSİYALAR

ABŞ Rusiyanın Federal Təhlükəsizlik Xidmətinə (FTX) və İranın İslam İnqilabı Keşikçiləri Korpusunun (“Sepah”) kəşfiyyatına qarşı “Amerika vətəndaşlarının qeyri-qanuni saxlanılmasına” görə sanksiyalar tətbiq edib. “Report” agentliyinin verdiyi xəbərə görə, bu barədə Vaşinqton administrasiyasının yüksəkrütbəli nümayəndəsi hakimiyyətin bu qərarına həsr olunmuş xüsusi brifinqdə bildirib.

Məlumata əsasən, administrasiya rəsmisinin sözlərinə görə, sanksiyaların birinci paketi ABŞ prezidenti Cozef Baydenin “Rusiya və İranda amerikalıları əvvəllər və ya hazırda girov tutan və ya haqsız yerə saxlayan qurumlara” qarşı sərəncamı əsasında tətbiq edilir.

ABŞ rəsmisi bu “subyektlərin” Amerika vətəndaşlarından “siyasi rıçaq və ya ABŞ-dan güzəşt əldə etmək üçün” istifadə etməyə çalışdıqlarını vurğulayıb. Belə ki, onun fikrincə, bu cür hərəkətlər beynəlxalq siyasi sistemin sabitliyi və bütövlüyünə, həmçinin xaricdəki amerikalıların təhlükəsizliyinə təhdid olub.

“FTX və “Sepah” ABŞ vətəndaşlarının xaricdə qanunsuz saxlanılmasına əmrlər vermək, nəzarət və ya başqa üsullarla rəhbərlik etdiyinə görə məsuliyyət daşıyırlar”, - deyə administrasiya rəsmisi diqqətə çatdırıb.

ZELENSKİ UZAQMƏNZİLLİ SİLAHLARA VƏ AVİASİYAYA EHTİYAC OLDUĞUNU BİLDİRİB

Ukrayna prezidenti Volodimir Zelenski Çex Respublikasının yeni prezidenti Petr Pavel və Slovakiyanın dövlət başçısı Zuzana Çaputova ilə görüşüb. Bu barədə “Report” agentliyi məlumat yayıb.

Zelenski çexiyalı həmkarına səfərə görə təşəkkür edib və Çexiyanın ilk günlərdən Ukraynaya kömək etdiyini qeyd edib. Zelenski daha sonra Slovakiya prezidenti ilə görüşüb və ona Ukraynanı dəstəklədiyinə görə təşəkkür edib.

Volodimir Zelenski Çexiya və Slovakiya prezidentlərinin iştirakı ilə keçirilən mətbuat konfransında çıxışı zamanı deyib: “Ukrayna Silahlı Qüvvələrinin uzaqmənzilli silahlara, aviasiyaya, lazımi qədər artilleriyaya və zirehli texnikaya ehtiyacı var, ona görə də belə yardımda heç bir qadağa ola bilməz”.

V.Zelenski qeyd edib ki, Ukrayna üçün hər bir süni məhdudiyyət Rusiya üçün növbəti fürsətidir. Onun sözlərinə görə, ukraynalı hərbçiləri müdafiə üçün lazım olan hər şeylə təmin etmək tamamilə ədalətli olardı.

Eyni zamanda, Ukraynanın dövlət başçısı vurğulayıb ki, əks-hücuma hazırlaşırlar və bunu hamı bilir, ona görə də sazişlərin təfərrüatlarını açıqlamayacaq.

QAZAXISTAN ÇİNLƏ STRATEJİ TƏRƏFDAŞLIĞI GÜCLƏNDİRİR

Qazaxıstan Çinlə strateji tərəfdaşlığa üstünlük verir. “TurkicWorld” portalının məlumatına görə, Çinin Sian şəhərində keçirilən Mərkəzi Asiya-Çin xarici işlər nazirlərinin dördüncü müşavirəsi çərçivəsində Çinin xarici işlər naziri Tsin Qanla Qazaxıstanın xarici işlər naziri Murat Nurtleu görüşüb.

Görüş zamanı, M.Nurtleu və T.Qan beynəlxalq gündəlikdəki aktual məsələlər ətrafında fikir mübadiləsi aparıb, siyasi, ticarət, iqtisadi, mədəni və humanitar sahələrdə Qazaxıstan-Çin əməkdaşlığının cari vəziyyəti və perspektivlərini müzakirə ediblər.

Bununla yanaşı, may ayında keçiriləcək ilk Mərkəzi Asiya-Çin sammitinə diqqət yetirilən görüşdə, həmçinin nəqliyyat və logistika infrastrukturunda qarşılıqlı əlaqənin təkmilləşdirilməsi, elektron ticarətin inkişafı və iştirakçı ölkələrin müvafiq qurumları arasında qarşılıqlı fəaliyyət üçün yeni mexanizmlərin yaradılması sahəsində əməkdaşlıq imkanları müzakirə edilib.

Hazırladı:

Vamiq ABBASOV,

“Respublika”.