Nəqliyyat, Rabitə və Yüksək Texnologiya İşçiləri Həmkarlar İttifaqının Respublika Komitəsinin təşkilatçılığı ilə şahmat turnirinə start verilib. Yarışda Rəqəmsal İnkişaf və Nəqliyyat Nazirliyi və onun tabeliyində olan qurumların əməkdaşları iştirak edirlər.

Rəqəmsal İnkişaf və Nəqaliyyat Nazirliyinin mətbuat xidmətindən bildirilir ki, üç gün ərzində davam edəcək yarışlar Ümummilli Lider Heydər Əliyevin anadan olmasının 100 illiyi ilə əlaqədar silsilə tədbirlər çərçivəsində təşkil olunub. Turnirin keçirilməsində məqsəd ölkəmizdə şahmatın inkişaf strategiyasının əsasını qoymuş Ulu Öndər Heydər Əliyevin əziz xatirəsini yad etmək və bu intellektual idman növünün kütləviliyinə nail olmaqdır.

Açılış mərasimində çıxış edənlər qeyd edib ki, ulu öndər Heydər Əliyev hər zaman gənclərə diqqət və qayğı göstərib, idmanın inkişafı ilə bağlı tədbirlər həyata keçirib. Bu ənənənin davamı olaraq bu gün də cənab Prezident İlham Əliyev tərəfindən şahmatın inkişafına xüsusi diqqət yetirilir.

Doqquz turdan ibarət olan və 64 nəfərin qatıldığı yarışda iştirakçılar fərdi şəkildə mübarizə aparırlar.

Əli SADIQOV,

“Respublika”.