Cəlilabad Rayon İcra Hakimiyyətinin başçısı Rafiq Cəlilov və Aparatın məsul əməkdaşları Azərbaycanın ərazi bütövlüyü uğrunda gedən Vətən müharibəsində şəhid olmuş İşiyev Rafail Əhmədağa oğlunun ailəsinə baş çəkdi. Rafiq Cəlilov görüş zamanı şəhidin ailəsinə başsağlığı verərək Prezident İlham Əliyevin rəhbərliyi ilə Vətən müharibəsində qazanılan qələbənin tarixi əhəmiyyətindən, bu qələbədə Silahlı Qüvvələrimizin, onun sıralarında döyüşən cəlilabadlı əsgər və zabitlərin şücaətindən, habelə bu gün ölkəmizdə şəhidlərimizin ailələrinə və qazilərə, eləcə də veteran döyüşçülərə göstərilən dövlət qayğısından danışdı. Rafail İşiyev 4 sentyabr 1979-cu ildə Cəlilabad şəhərində müəllim ailəsində anadan olub. 1996-cı ildə Cəlilabad şəhər 8 saylı orta məktəbi bitirib və hərbi xidmətə yollanıb, ömrünün 16 ilini orduda keçirib. PDM (BMP) mütəxəssisi olan Rafail 2016-cı ilin Aprel döyüşlərində iştirak edib. Döyüş peşəkarlığına görə bir neçə dəfə hərbi paradlarda iştirak edib, medallarla təltif edilib. R.İşiyev hərbi xidməti dövründə xüsusi keyfiyyətlərinə, əməliyyatlarda göstərdiyi şücaətə görə III dərəcəli, “Qüsursuz xidmətə görə” Azərbaycan Silahlı Qüvvələrinin 90 illiyi, 95 illiyi, 100 illiyi yubiley medalları ilə təltif edilib.
Vətən müharibəsində Cəbrayıl rayonunun işğaldan azad edilməsi uğrunda gedən döyüşlərdə Rafailin idarə etdiyi BMP vurulmuş, amma yaralanmasına baxmayaraq, iki gün sonra yenidən döyüşlərə qatılmışdır. Yaralı olsa da, döyüş yoldaşının BMP-sini idarə edərək Cəbrayıl, Füzuli uğrunda gedən döyüşlərdə düşmənə ağır zərbələr vurmuşdur. İkinci dəfə də texnikası vurularaq yaralanmışdır. Bir müddət sonra erməni qəniməti olan 3-cü BMP ilə döyüşlərə qatılaraq düşmənə zərbələr vurmuşdu. 3 noyabrda Xocavəndin azad olunması uğrunda gedən ağır döyüşdə qəhrəmancasına şəhidlik zirvəsinə ucaldı və doğulduğu Cəlilabad şəhərində dəfn olundu. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısına qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Prezidenti İlham Əliyevin müvafiq sərəncamlarına əsasən Rafail Əhmədağa oğlu İşiyev ölümündən sonra “Vətən uğrunda”, “Şuşanın azad olunmasına görə”, “İgidliyə görə”, “Füzulinin azad olunmasına görə”, Cəbrayılın azad olunmasına görə” və “Xocavəndin azad olunmasına görə” medalları ilə təltif edilib.
Şəhidin ailə üzvləri göstərilən diqqət və qayğıya görə dövlətimizin başçısı İlham Əliyevə və Birinci vitse-prezident Mehriban xanım Əliyevaya minnətdarlıqlarını bildirdilər.
Ərəstun ABDULOV,
“Respublika”.