Respublikamızın hər yerində olduğu kimi, Masallı rayonunun Xıl kəndində də Vətən naminə şərəfli ölümü ilə el-obaya başucalığı gətirən, şəhidlik zirvəsinə yüksələn igid oğulların adlarını həmişə müqəddəs tutur, onlarla fəxr edirlər. Həm də kəndin ən səfalı guşəsində şəhidlərin xatirəsinə möhtəşəm abidə-kompleksi ucaldılıb. İndi hər bir xıllının and yerinə dönən bu abidə-kompleksinin açılış mərasiminə yüzlərlə adam gəlmişdi.
Mərasimdə vətənin ərazi bütövlüyü uğrunda canından keçən şəhidlərin əziz xatirəsi bir dəqiqəlik sükutla anılıb və çıxışlar başlandı. Masallı Rayon İcra Hakimiyyətinin başçısı Araz Əhmədov dedi: - Xıl kəndi Birinci Qarabağ müharibəsində, həm də Vətən müharibəsində şəhidlər verib. Doğulub boya-başa çatdıqları kənddə xatirələrinə ucaldılmış bu abidə-kompleksi şəhidlərə göstərilən böyük ehtiramdan irəli gəlir. Vətən torpaqlarının işğaldan azad edilməsi naminə canlarını qurban vermiş hər şəhidin əziz xatirəsi xalqımız tərəfindən Masallı camaatı arasında daim uca tutulur, məhəbbətlə, iftixarla anılır. 44 gün çəkən Vətən müharibəsində rəşadətli Azərbaycan Ordusu Müzəffər Ali Baş Komandan İlham Əliyevin rəhbərliyi altında tarixi qələbə qazanıb, 30 il işğal altında qalan Vətən torpaqlarını erməni faşizmindən birdəfəlik azad etdi. Xalq-iqtidar-ordu birliyi bizə Qələbə sevincini yaşatmaqla Zəfər Gününü qəhrəmanlar beşiyi Azərbaycanımızın şanlı tarixinə yazdı.
Azərbaycanın Milli Qəhrəmanı Elşad Hüseynovun qızı Aytən Hüseynova, şəhid Elgün Mikayıllının atası Aqil Nağıyev, şəhid Nurlan və İntiqam Əsgərli qardaşlarının anası, Masallı elinin xanım-xatın, mərd, Vətən qeyrətli qadını Ziba xanım, Milli Qəhrəman Elşad Hüseynovun qardaşı Əliqadir Eynullayev və başqaları şəhidlərin qısa, şərəfli həyat yolundan, Vətən uğrunda göstərdikləri şücaətdən, 44 günlük Qarabağ müharibəsində qazanılan şanlı qələbədən, tarix yazan ordumuzdan, şəhid ailələrinə dövlət tərəfindən olan diqqət və qayğıdan danışdılar.
Tədbirin sonunda məktəblilər Vətənə, onun yolunda can qoyan qəhrəman şəhidlərə həsr olunmuş şeirlər, şair Tahir Heydərlinin Milli Qəhrəman Elşad Hüseynova həsr etdiyi "Vətən oğlu" adlı poemasından parçalar söyləyiblər.
Bəli, torpağı Vətən, Vətəni bütöv edən və elə özləri Vətən qədər müqəddəs olan şəhidlərin xatirəsi qəlbimizdə yaşayacaq.
Zəfər ORUCOĞLU.
