Aranla Qarabağ Ağcabədidə qovuşur, bu yerlərdə torpaqlar münbit, məhsuldardır. İnsanları isə zəhmətkeşdir, hər qarış torpağın qədrini yaxşı bilirlər. Vaxtilə ölkənin ən iri pambıqçılıq rayonlarından biri olan Ağcabədi indi də "ağ qızıl" istehsalında respublikada birinciliyi əlində saxlayır. Çünki bu rayonda pambıqçılıqda yaxşı ənənələr yaranıb və bu gün o, yüksək səviyyədə davam etdirilir.
Qarabağ iqtisadi rayonuna daxil olan Ağcabədinin ənənəvi təsərrüfat sahəsi olan pambıqçılıq son illərdə inkişaf edir və təbii ki, pambıqçılığın inkişafına verilən dövlət dəstəyi rayonun zəhmət adamlarında böyük ruh yüksəkliyi yaradır. Hazırda rayonda çiyid səpini başa çatıb, yaz aylarında əkin sahələrində aqrotexniki becərmə qaydalarına ardıcıl və düzgün əməl olunur. Cərgələrarası becərmələr, alaq otlarına və zərərvericilərə qarşı kimyəvi mübarizə tədbirləri vaxtında aparılır, bitkilər tələbata uyğun optimal müddətdə mineral gübrə və suvarma suyu ilə təmin edilir. Buna görə də pambıqçılar yüksək məhsuldarlığa nail olurlar. Pambıqçılıqdan qazandıqları qazancla öz ailə-məişət problemlərini yüksək səviyyədə həll edən, əmək qəhrəmanı kimi şan-şöhrət qazanan, orden və medallarla təltif olunan insanların yaratdıqları yaxşı ənənələr əkinçilərin həmişə köməyinə çatır.
Təcrübəli "ağ qızıl" ustaları deyirlər ki, pambıq bitkisinin gövdəsi də, çiyidi də, ləçəyi də yararlıdır. Belə ki, pambıq mahlıcı toxuculuq sənayesində çox əhəmiyyətli məhsul hesab olunur. Çiyiddən alınan bitki yağı məişətdə əsas yerlərdən birini tutur, ondan hazırlanan qüvvəli yem heyvandarlıqda əvəzedilməzdir, gövdəsindən də kənd adamları yanacaq kimi istifadə edirlər. Qeyd edək ki, son illər rayonda pambıqçılığın dirçəldilməsi istiqamətində mühüm addımlar atılıb. Ağcabədinin iqlim şəraiti, əkinçilərin pambıqçılıq sahəsində təcrübəsi məhsul istehsalını artırmaq üçün böyük stimul yaradır. Ötən il rayonda 11 min 838,6 hektarda pambıq yetişdirilib, pambıqçılar 40 min tondan çox məhsul istehsal ediblər. Aqrar sahəyə, o cümlədən pambıqçılığa göstərilən dövlət dəstəyinin nəticəsində fermer və torpaq mülkiyyətçiləri təsərrüfatlarını genişləndirir, kənd təsərrüfatı məhsulları istehsalını ilbəil artırırlar.
İndi Ağcabədi rayonunda yaz-tarla işləri öz axarı ilə davam edir. Bu il rayon üzrə "MKT-İK", "Azərpambıq", "P-Agro", "Aztəsərrüfat", "Cotton Trade" və "AŞİB" MMC-lər tərəfindən 11 min hektardan çox ərazidə çiyid səpini aparılıb. 1540 nəfər xüsusi mülkiyyətçi və fermerlə pambıq əkini üçün müqavilə bağlanılıb. Qeyd edək ki, pambığın hər tonuna görə dövlət tərəfindən ödənilən subsidiyanın məbləği 100 manatdan 170 manata yüksəldilib.
Pambığın hər tonunun alış qiymətinin 50 manat artırılması nəticəsində fermerlər təhvil verdikləri xam pambığın hər tonuna görə əlavə 120 manat qazanc əldə edə biləcəklər. Regional inkişafa dair Dövlət Proqramı bölgələrin sosial-iqtisadi həyatında köklü dəyişikliklərə, yeni iş yerlərinin açılmasına, həyat şəraitinin yaxşılaşmasına, kənd təsərrüfatı məhsulları istehsalının artırılmasına, su mənbələrindən səmərəli istifadə edilməsinə, müasir texnologiyaların tətbiqinə yeni bir stimul yaradır. Bu, Ağcabədi rayonunda daha çox hiss olunur. Rayonun iqtisadiyyatında aparıcı yer tutan kənd təsərrüfatında, o cümlədən pambıqçılıqda uğurlu nəticələr əldə edilir. Dövlət tərəfindən aqrar sahəyə göstərilən diqqət və qayğı, fermer və sahibkarların güzəştli şərtlərlə kredit, toxum, gübrə, texnika almaq imkanlarına malik olması kənd təsərrüfatının inkişafına səbəb olur.
Salman ALIOĞLU,
"Respublika".
