Azərbaycanda İslamofobiya konfransı

Müasir dünyada insanların dinlərinə də müdaxilələr mövcuddur. Bu mübarizədə bəzən İslam dini radikal qrupların hədəfinə tuş gəlir. Fransada dəfələrlə İslamın müqəddəs kitabı, "Qurani-Kərim"in yandırılması, anti-İslam hərəkatları buna əyani nümunədir. Məsələn, ötən il Fransanın Korsika adasında yerləşən Ayaçço şəhərində bir qrup maskalı şəxs müsəlmanların ibadət üçün toplaşdığı məscidə hücum edərək məkanı alt-üst edib. Daha sonra orada olan "Qurani-Kərim" kitablarını yandıran cinayətkarlar "Ərəblər, rədd olun!", "Bura bizim evimizdir!", - deyə şüarlar səsləndiriblər. Bununla yanaşı, Fransa mətbuatı və siyasi elitası da İslama qarşı mübarizə aparır.

Fransanın "Le Parisien" qəzetində yayımlanan bir məqalədə şiddət və antisemitizm yaymaq iddiası ilə bəzi Quran ayələrinin çıxarılması tələbləri göstərilib. Məqalədə qeyd edilir ki, qərarın qəbul edilməsi məqsədilə imza atanlar arasında üç sabiq baş nazir, o cümlədən keçmiş prezident Nikola Sarkozi, yəhudi və xristian icmalarının nümayəndələri və yazıçılardan ibarət 300 nəfər olub. Bu da bir daha onu sübut edir ki, Fransa digər ölkələrə, azlıqlara hörmət etmədiyi kimi, insanların dinlərinə də müdaxilə edir. İslam dininə ibadət edən insanların Avropa ölkələrində demoqrafik vəziyyəti ilə bağlı 2017-ci ildə Vaşinqtonda yerləşən "Pew Research Center" adlı beyin mərkəzi tərəfindən dərc olunmuş araşdırmada qeyd edilir ki, 2016-cı ilin ortaları üçün Fransa əhalisinin 8,8 faizini (5,7 milyon nəfər) müsəlmanlar təşkil edib. Avropa şəhərləri arasında Paris şəhəri və İl-dö-Frans rayonu müsəlman əhalinin sayına görə birinci yerdədir. Burada 2,8 milyon müsəlman əhalinin yaşadığı güman edilir. Müsəlmanların say göstəricisinə görə, 67,5 milyon əhalisi olan Fransa Avropa İttifaqı ölkələri sırasında birinci yeri tutur. Bu rəqəmin 2050-ci ilə qədər iki dəfədən çox artacağı proqnozlaşdırılır. Almaniyanın "Statista" şirkətinin statistik rəqəmlərinə görə də Fransa əhalisinin 8 faizi müsəlmanlardan ibarətdir. Təsadüfi deyil ki, Fransanın "bacısı" da özünü ona oxşatmağa çalışır. Belə ki, Ermənistanın 30 il boyunca işğal altında olan dədə-baba torpaqlarımızdakı dini məbədlərə, məscidlərə rəftarı bütün dünyaya məlumdur. İllər boyu məscidlərdə donuz saxlanılıb, həmin yerlər tövlə kimi istifadə edilib. Bu da onu deməyə əsas verir ki, Fransa və "bacısı" Ermənistan islamofobik ölkələrdir. Mövzuyla əlaqədar Prezident İlham Əliyev İqtisadi Əməkdaşlıq Təşkilatının XIV onlayn Zirvə toplantısındakı çıxışında bildirilib ki, bu kimi davranışlar İslam dünyasına qarşı düşmənçilikdir: "Bütün müsəlmanların hisslərini təhqir edən Ermənistanın müsəlman ölkələri ilə əlaqələrini genişləndirmək cəhdləri riyakarlıqdan başqa bir şey deyil. Azərbaycan müsəlman ölkələri arasında həmrəyliyə dəyərli töhfələr vermişdir. Biz müxtəlif beynəlxalq kürsülərdən İslam ölkələrini birliyə çağırmışıq. Azərbaycan İslam dininin zorakılıq və terrorla əlaqələndirilməsini kəskin şəkildə pisləyir. Biz islamofobiyaya qarşı mübarizə aparmalı və İslamın həqiqi dəyərlərini - sülh, tolerantlıq və ədaləti təşviq etməliyik. Bu mənada, qardaş Pakistanın təşəbbüsü ilə İslam Əməkdaşlıq Təşkilatının 15 mart tarixinin Beynəlxalq İslamofobiya ilə Mübarizə Günü elan olunması qərarını alqışlayırıq".

Ölkə başçısının da qeyd etdiyi kimi, 15 mart tarixi İslamofobiya ilə Mübarizə Günü olması ilk dəfə 2020-ci il noyabrın 27-28-də İslam Əməkdaşlıq Təşkilatının Xarici İşlər Nazirləri Şurasının Niger Respublikasının Niamey şəhərindəki toplantısında elan edilib. Həmin günün qəbul edilməsi ilə bağlı bir neçə konfrans və görüş keçirilib, nəticədə Birləşmiş Millətlər Təşkilatının Baş Assambleyası 2022-ci il mart ayının 15-ni İslamofobiya ilə Beynəlxalq Mübarizə Günü kimi qəbul edib. Bu il İslamofobiya Gününün birilliyi münasibətilə paytaxt Bakıda "İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar" mövzusunda beynəlxalq konfrans keçirilib. Konfrans zamanı BMT-nin Baş katibinin müavini, BMT-nin Sivilizasiyalar Alyansının ali nümayəndəsi Migel Anxel Moratinos videobağlantı edib. O, çıxış zamanı İslamı sülh və monoteizm dini kimi təbliğ etməklə islamofobiyaya qarşı mübarizə aparmalı olduğunu vurğulayıb. Həmçinin Bakı Beynəlxalq Multikulturalizm Mərkəzinin icraçı direktoru Rəvan Həsənov öz çıxışı zamanı islamofobiya, Fransanın İslam dininə münasibətindən söz açıb: "Fransada biz islamofobiyanın bir çox təzahürlərini müşahidə edirik. Mən boş yerə Fransanın adını çəkmədim. Çünki Fransada hazırda 5 milyon müsəlman yaşayır. Müsəlmanlıq bəzi cəmiyyətlərdə marginallaşdırılır. Lakin bu, cəmiyyətlərdə dini ayrı-seçkiliyin təməlini atan əsas səbəblərdəndir", - deyə bildirib.

Azərbaycanın İnsan Hüquqları üzrə Müvəkkili Aparatının rəhbəri, İslam Əməkdaşlıq Təşkilatı Müstəqil Daimi İnsan Haqları Komissiyasının üzvü Aydın Səfixanlı Fransa vətəndaşı olan, hətta orada doğulmuş müsəlmanların hər gün qara siyahıya düşdüyünü, polisin hörmətsizliyi və nifrəti ilə qarşılaşdığını bildirib. Əlbəttə, bu konfransın paytaxt Bakıda keçirilməsi də bir çox mənada strateji əhəmiyyət daşıyır. Azərbaycan Respublikasının tolerant ölkə olması, bütün dinlərə hörmət etməsi konfrans üçün ən əlverişli məkan olduğunun nümunəsidir. Ölkəmiz məscidlərlə yanaşı, kilsə və sinaqoqları təmir etdirib qoruması da bunun ən böyük nümunəsidir.

Qeyd edək ki, martın 15-16-da Bakı Beynəlxalq Multikulturalizm Mərkəzi, Beynəlxalq Münasibətlərin Təhlili Mərkəzi və G20 Dinlərarası Dialoq Forumu İslamofobiya ilə Beynəlxalq Mübarizə Gününə həsr olunan "İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar" mövzusunda beynəlxalq konfrans keçirilir. Əsas məqsəd beynəlxalq və milli səviyyədə müsəlmanları və əhalisi müsəlman olan ölkələri hədəf alan dəhşətli tendensiyaları müzakirə etmək üçün akademik platforma yaratmaqdır. Konfransda 32 ölkədən alimlər, beynəlxalq təşkilatların ekspertləri, din xadimləri və qeyri-hökumət təşkilatlarının nümayəndələri iştirak edir, islamofobiya ilə mübarizədə fərqli yanaşma, Avropanın bəzi ölkələrində islamofobiyanın təzahürləri, dünya mediasında islamofobiya mövzularında müzakirələr aparırlar.

Töhfə SƏMƏDOVA,

"Respublika".